Ol man oli givim plante advaes taem yu stap harem nogud from ded blong wan famle. Be sam long ol advaes ya i no save givhan. Maet samfala oli talem se yu no mas krae mo yu no mas soemaot se yu harem nogud. Sam narafala oli talem se yu mas krae mo soemaot se yu harem nogud. Baebol i talem ol gudfala advaes, mo ol stadi we ol man oli mekem tede oli soemaot se advaes ya i stret.

Long sam kantri, ol man oli ting se sipos man i krae from dedman, hem i no man be hem i woman. ?Yu ting se man i mas sem blong krae? Nogat. Ol dokta we oli stadi long ol sik long tingting, oli talem se i stret nomo we man i krae taem wan famle i ded. Krae i save givhan long yu blong yu gohed long laef blong yu, gogo, yu haremgud bakegen. Be sipos yu blokem krae, yu save harem nogud longtaem moa. Baebol i no agri long tingting ya se man we i krae i no wan strong man. Yu traem tingbaot Jisas. Nating se hem i gat paoa blong mekem man i laef bakegen, be hem i krae taem gudfala fren blong hem Lasaros, i ded.​—Jon 11:33-35.

Plante man we oli harem nogud from wan famle we i ded, oli kros, antap moa sipos man ya i ded kwiktaem long wan aksiden no narafala samting olsem. I gat plante risen blong kros. Wan long olgeta, hemia se wan man we yu respektem, i talem ol tok we i no stret mo i stikim yu. Wan man blong Saot Afrika we nem blong hem Mike, i talem se: “Mi mi gat 14 yia nomo taem papa blong mi i ded. Long seves blong berem hem, pasta blong Anglikan i talem se God i nidim ol gudfala man, taswe hem i tekem olgeta bifo we oli olfala. a Mi mi kros, from we mifala i nidim papa blong mifala. Stat long taem ya kam kasem naoia, 63 yia i pas finis, be tok blong hem i stikim mi yet.”

?Olsem wanem sipos yu harem se ded ya i fol blong yu? Yu save gat tingting ya sipos man ya i ded kwiktaem, we yu no tingbaot se bambae hem i ded. Yu save ting se, ‘Maet hem i no ded sipos mi bin mekem olsem no olsem.’ Maet lastaem we yu luk man ya, yutufala i rao. Hemia tu i save mekem yu yu harem se ded blong hem i fol blong yu.

Sipos yu harem se i fol blong yu no yu kros, yu no mas holemtaet ol tingting ya. Be yu mas talemaot long wan fren we i glad blong lesin long yu, mo i talem gudfala toktok blong mekem yu yu save, se plante man we oli krae from dedman oli harem olsemia. Baebol i talem se: “Fren blong yu, oltaem hem i stap soemaot we hem i lavem yu, mo ol brata blong yumi oli stap, blong yumi save givgivhan long yumi long taem blong trabol.”​—Ol Proveb 17:17.

Taem yu stap krae from wan dedman, besfren blong yu hemia Jehova God. I gud yu prea mo yu talemaot evri samting we i stap long hat blong yu, from we Jehova “i stap tingbaot” yu. (1 Pita 5:7) Hem i promes se sipos yu prea olsem, “pis we hem i givim, we i bigfala moa, i bitim save blong yumi,” bambae i mekem tingting mo filing blong yu i kam kwaet. (Filipae 4:6, 7) Mo tu, i gud yu letem God i yusum Tok blong hem, Baebol, blong givhan long yu. Yu save raetemdaon ol vas we oli leftemap tingting blong yu. (Yu luk  bokis long pej ya.) Maet yu wantem lanem sam vas baehat. I gud yu tingting dip long ol vas ya, antap moa, long ol naet we yu stap yu wan mo yu no save slip.​—Aesea 57:15.

 I no longtaem i pas, woman blong Jek i ded from kansa. Jek, we i gat 40 yia, i talem se plante taem hem i harem nogud tumas blong stap hem wan. Be hem i talem se prea i givhan bigwan long hem, i se: “Taem mi prea long Jehova, mi no moa harem se mi stap mi wan nomo. Plante taem, mi wekap long medel naet mo mi no save slip bakegen. Mi ridim sam gudfala vas we oli leftemap tingting blong mi, mi tingting dip long olgeta, mo mi prea blong talemaot evri samting we i stap long hat blong mi. Afta, mi harem se mi gat pis long tingting blong mi, mo hat blong mi i no moa trabol, nao mi save slip bakegen.”

Mama blong Vanesa i ded from wan sik. Vanesa tu i harem se prea i gat bigfala paoa, i talem se: “Long ol prea we mi mekem taem mi harem nogud tumas, mi talem nem blong God nomo, nao mi krae. Be oltaem Jehova i lesin long prea blong mi, mo i givim paoa we mi nidim.”

Sam man we wok blong olgeta i blong givim advaes long ol man we oli harem nogud from wan famle we i ded, oli talem long olgeta blong mekem wan samting blong givhan long narafala, no blong joen long wan grup we i mekem wok blong givhan long vilej. Hemia i save givim glad mo mekem se man i no moa harem nogud tumas. (Ol Wok 20:35) Plante Kristin we oli harem nogud from wan famle we i ded, oli faenemaot se taem oli mekem wan wok blong givhan long narafala, oli harem gud moa.​—2 Korin 1:3, 4.