Man we i kasem save filing blong narafala, i “tingbaot filing we hem wan bambae i gat sipos i kasem sem trabol we narafala i kasem.” Wan dokta we i stadi long tingting blong man, Rik Hanson, i talem se: “Yumi bon wetem fasin ya we yumi naf blong kasem save filing blong narafala.”

TINGBAOT: Ol anamol oli no gat fasin ya blong kasem save filing blong narafala. ?From wanem yumi gat? Baebol i talem se God i wokem man blong hem i naf blong tekem fasin blong God. (Jenesis 1:26) God i mekem yumi we yumi olsem pija blong hem, i min se yumi save soemaot ol gudfala fasin blong hem. Taem wan man i kasem save filing blong narafala mo i wantem givhan, hem i stap soemaot fasin blong Jehova God we i gat sore mo i kasem save filing blong yumi.—Ol Proveb 14:31.

God i kasem save filing blong yu mo i no wantem se yu safa. Baebol i tokbaot ol man Isrel bifo, we oli wok slef long Ijip, mo biaen oli spenem 40 yia long draeples, i se: “Taem oli harem nogud, God tu i harem nogud.” (Aesea 63:9, NW) Makem se God i no luk nomo se oli harem nogud, be hem i harem save filing blong olgeta. Hem i se: “Mi mi save finis we oli harem nogud tumas.” (Eksodas 3:7) Mo tu, God i talem se: “Taem wan man i kilim yufala, i olsem we man ya i kilim ae blong mi stret.” (Sekaraea 2:8) Taem narafala i mekem yu yu harem nogud, God tu i harem nogud.

Maet yu harem se yu nogud mo i no stret we God i sore long yu, be Baebol i talem se: “God i hae moa long hat blong yumi, mo hem i save evri samting.” (1 Jon 3:19, 20) God i save gud yu, i bitim we yu save yu wan. Hem i save gud evri samting long laef blong yu, wetem ol tingting mo filing blong yu. Mo hem i kasem save.

 Baebol i promes se:

• “Sipos yufala i prea long mi, bambae mi mi harem yufala, mo sipos yufala i singaot i kam long mi, bambae mi mi ansa long yufala.”—AESEA 58:9.

• “Mi save ol plan we mi mekem finis from yufala. Mi mi wantem we bambae yufala i stap gud olwe, trabol bambae i no kasem yufala, mo bambae yufala i stap gogo, yufala i kasem ol samting ya we tingting blong yufala i stap long hem. Nao long taem ya, bambae yufala i kam long mi, yufala i prea long mi, mo mi bambae mi harem yufala.”—JEREMAEA 29:11, 12.

• “Olgeta taem ya we mi stap krae, yu yu makemdaon olgeta finis long buk blong yu.”—OL SAM 56:8.

Taem yumi save se God i kasem save filing blong yumi, hemia i givhan long yumi blong winim ol hadtaem. Tingbaot stori blong Maria:

“Boe blong mi i kasem kansa mo tu yia biaen, taem hem i gat 18 yia, hem i ded. Mi harem se i no stret mo laef i had. !Mi kros long Jehova from we hem i no tekemaot sik blong boe blong mi!

“Sikis yia biaen, mi talemaot filing blong mi long wan gudfala fren long kongregesen we i gat lav mo sore. Hem i lesin gud taem mi talem se Jehova i no lavem mi, mo afta, hem i talem vas blong 1 Jon 3:19, 20, we i se: ‘God i hae moa long hat blong yumi, mo hem i save evri samting.’ Hem i eksplenem se Jehova i kasem save long ol trabol blong mi.

“!Be mi harem nogud yet! Nao mi ridim Ol Sam 94:19, we i talem se: ‘Taem we mi stap tingting tumas, yu mekem tingting blong mi i kam gud bakegen, yu mekem mi mi glad.’ !Mi harem se oli raetem ol vas ya blong mi nomo! Sloslo, mi lanem blong tokbaot ol trabol blong mi wetem Jehova, mo mi harem gud blong save se hem i lesin mo i kasem save.”

!I nambawan tumas blong lanem se God i save gud yumi mo i kasem save filing blong yumi! Be sipos i olsem, ?from wanem yumi safa? ?God i stap panisim yumi from ol rong blong yumi? ?Bambae God i finisim ol trabol we i mekem yumi safa? Bambae yumi tokbaot ol kwestin ya long ol pej we oli kam biaen.