KILIM WOMAN MO REP: Wan ripot long Yunaeted Neson i talem se: “Long evri tri woman, i gat wan long olgeta we man no boefren blong hem i kilim hem no i repem hem. Mo long fulwol, i luk olsem se long evri faef woman, be wan man bambae i repem wan long olgeta, no i traem blong repem hem.”

FAET LONG ROD: Ripot i soem se i gat bitim 30,000 grup blong ol stronghed long Yunaeted Stet, we oli stap gohed blong brekem loa. Long Latin Amerika, ol ripot oli soem se long evri 3 man, i gat 1 long olgeta we ol man oli kilim hem.

KILIM MAN I DED: Long wan long ol yia we i jes pas, oli ting se i gat klosap 500,000 man we ol narafala oli kilim i ded. Namba ya i hae moa i bitim namba blong ol man we oli ded long ol bigfala faet. Namba blong man we ol narafala oli kilim i ded i hae moa long Saot Afrika mo long Sentrol Amerika, mo namba ya hem i fo taem antap long namba blong ol man long fulwol we ol narafala oli kilim i ded. Long Latin Amerika i gat bitim 100,000 man we ol narafala oli kilim i ded long wan yia, mo long Brasil i gat samwe long 50,000. ?Olsem wanem? ?I gat rod blong stopem raf fasin?

?From wanem raf fasin i kam antap moa? I gat plante risen, olsem: kros i kamaot from we samfala oli gat moa samting i bitim ol narawan, ol man oli no kea long laef blong narafala, ol man oli dring mo tekem drag bitim mak, ol pikinini oli gruap long medel blong ol bigman we oli stap faet, mo ol man oli no kasem panis from ol trabol we oli mekem.

I tru se long sam ples, ol man oli traem blong mekem se raf fasin i godaon, mo i luk olsem se i wok. Long Brasil, i gat plante man oli stap long taon ya São Paulo, mo ol ripot oli soem se long ol 10 yia we i pas, namba blong ol man we narafala i kilim i ded, i godaon long samwe 80 pesen. Nating se i olsem, ol man oli gohed yet blong mekem ol defdefren raf fasin long taon ya, mo long evri 100,000 man, i gat 10 we narafala i kilim i ded. ?Wanem nao bambae i mekem se raf fasin i finis blong olwe?

Blong raf fasin i finis, ol man oli mas jenisim fasin mo tingting blong olgeta. Sipos wan man we i gat raf fasin i wantem jenis, hem i mas sakemaot flas fasin, griri fasin, mo fasin ya blong tingbaot hem wan nomo, mo hem i mas gat ol fasin olsem lav, respek, mo intres long ol narafala.

?Wanem i save pulum wan man blong mekem wan bigfala jenis olsem? Tingbaot samting we Baebol i tijim:

• “Sipos yumi lavem God, hemia i min se yumi stap folem ol tok blong hem.”​—1 Jon 5:3.

• “Fasin fraetgud long Jehova i minim fasin blong no laekem nating ol samting we i nogud.” *​—Ol Proveb 8:13, NW.

Taem wan man we i gat raf fasin i lavem God mo i fraet blong mekem hem i harem nogud, hemia bambae i pulum hem blong jenisim laef blong hem. Hem i  no jenisim sam samting nomo, be fasin blong hem tu i jenis fulwan. ?Samting olsem i save hapen?

Tingbaot Alex, * long Brasil. Hem i bin stap long kalabus 19 yia, from we plante taem hem i stap kilim ol narafala. Long yia 2000, hem i kam wan Witnes blong Jehova afta we hem i stadi long Baebol. ?Hem i rili sakemaot raf fasin? Yes, mo Alex i sore tumas we hem i bin mekem ol rabis samting ya. Hem i talem se: “Naoia, mi mi lavem God from we hem i letem mi mi haremsave se hem i fogivim mi. Oltaem mi mi wantem talem tangkiu long Jehova mo mi lavem hem, mo hemia i givhan long mi blong mi jenisim fasin blong mi.”

César long Brasil i stap stil, mo hem i yusum masket tu blong stilim ol samting blong ol narafala. Hem i mekem samting ya blong 15 yia. ?Wanem i mekem se hem i jenis? Taem hem i stap long kalabus, ol Witnes blong Jehova oli toktok long hem, nao hem tu i stadi long Baebol. César i eksplenem se: “Hemia faswan taem we mi faenemaot se i gat wan samting we mi mas mekem long laef blong mi. Mi lanem blong lavem God. Mo mi lanem blong fraetgud long hem, i min se mi fraet blong mekem ol nogud samting bakegen nao Jehova i harem nogud. Mi wantem soemaot long Jehova se mi rili tinghae long hem from we hem i kaen tumas long mi. Lav mo fasin fraetgud ya i pulum mi blong mi jenis.”

?Tufala stori ya i soemaot wanem? Baebol i gat paoa blong jenisim laef blong man fulwan, hemia taem man i jenisim fasin blong hem blong tingting. (Efesas 4:23) Alex we yumi tokbaot hem finis, i talem se: “Samting we mi lanem long Baebol i olsem klin wota we i ron long mi, nao sloslo i wasemaot ol rabis tingting, nao mi mi kam klin. Mi mi neva tingbaot se bambae mi naf blong sakemaot ol rabis tingting ya.” Yes, tok blong Baebol i klin, mo taem yumi fulumap tingting blong yumi wetem, hem i save wasemaot ol rabis tingting. Tok blong God i gat paoa blong mekem man i kam klin. (Efesas 5:26) Frut we i kamaot se, man we i raf mo we i tingbaot hem wan nomo, hem i save jenis i kam wan man we i kaen mo i gat pis. (Rom 12:18) Taem hem i folem ol rul blong Baebol, hem i gat pis long laef blong hem.​—Aesea 48:18.

Bitim 8 milian Witnes blong Jehova long 240 kantri, oli faenem stamba samting we i save finisim raf fasin. Olgeta ya oli kamaot long olgeta laen blong man mo laef blong olgeta i defdefren, be oli lanem blong lavem God mo blong fraetgud long hem, mo oli lanem blong lavlavem olgeta mo blong stap long pis olsem wan famle nomo. (1 Pita 4:8) Olgeta ya oli pruvum se raf fasin i save finis.

Baebol i promes se klosap nao God bambae i tekemaot raf fasin long wol ya. Bambae God i jajem wol ya blong tede we i raf tumas, long “bigfala Dei ya we God bambae i jajem ol man we oli no obei long hem, nao bambae oli lus.” (2 Pita 3:5-7) Bambae i no moa gat man we i gat raf fasin. ?Olsem wanem yumi save sua se God wantem givhan long yumi mo tekemaot raf fasin?

Baebol i talem se God “i no laekem nating olgeta we oli laekem tumas blong mekem faet.” (Ol Sam 11:5) God ya we i wokem olgeta samting, hem i laekem pis mo stret fasin. (Ol Sam 33:5; 37:28) Taswe bambae hem i no letem ol man we oli gat raf fasin oli stap olwe.

Yes, bambae i gat wan niufala wol we pis i stap long hem. (Ol Sam 37:11; 72:14) Taswe i gud yu lanem moa long samting we yu save mekem, blong yu save laef long niufala wol ya we i no gat raf fasin long hem.