?YU YU wan Kristin? I gat bitim 2 bilian man long wol we oli talem se oli Kristin, taswe sipos yu talem ‘yes,’ yu tu yu wan long olgeta. Tede i gat plante taosen skul we oli talem se oli Kristin, be oli no joen gud from we bilif mo tijing blong olgeta i no sem mak. Taswe, maet bilif blong yu i defren olgeta long bilif blong ol narafala we oli talem se oli Kristin. ?Olsem wanem? ?Samting we yu bilif long hem i rili impoten? Yes, hem i impoten tumas sipos yu wantem folem tijing blong Kristin skul we Baebol i tokbaot.

Ol man oli singaot ol faswan man blong Jisas Kraes se “ol Kristin.” (Ol Wok 11:26) Oli no nidim wan narafala nem blong makemaot olgeta, from we long taem ya i gat wan Kristin bilif nomo. Ol Kristin long taem ya oli gat wan tingting nomo blong folem ol tijing mo ol advaes blong Jisas Kraes, we hem nao i stanemap Kristin bilif. ?Olsem wanem long skul blong yu? ?Yu yu ting se hem i tijim ol samting we Jisas i tijim mo we ol faswan man blong Kraes oli bilif long hem? ?Olsem wanem yu save sua long samting ya? I gat wan rod nomo blong faenemaot: yu yusum Baebol blong jekem.

Traem tingbaot: Jisas Kraes i gat bigfala respek long Baebol se i Tok blong God. Hem i no glad nating  long ol man we oli putum tijing blong Baebol i go biaen, blong folem kastom blong olgeta fastaem. (Mak 7:9-13) Taswe yumi save talem se bilif blong ol trufala man blong Jisas, i mas stanap long Baebol. Taswe, i gud evri Kristin wanwan i askem se: ‘?Tijing blong jos blong mi i laenap wetem Baebol?’ Blong ansa long kwestin ya, i gud yu skelem tijing blong jos blong yu wetem samting we Baebol i talem.

Jisas i talem se wosip we yumi mekem long God, i mas stanap long trutok, mo trutok ya i stap long Baebol. (Jon 4:24; 17:17) Mo aposol Pol i talem se sipos yumi wantem we God i sevem yumi, yumi mas “save trutok blong hem.” (1 Timoti 2:4) Taswe, i impoten tumas we bilif blong yumi i stanap long trutok blong Baebol. !Yes, laef blong yumi i dipen long samting ya!

Mifala i wantem se yu ridim ol sikis kwestin we oli stap long haf ya, wetem ol ansa we Baebol i givim. Yu tekem Baebol blong yu mo yu jekem ol vas we i stap, mo yu tingting gud long ol ansa ya. Biaen i gud yu askem se: ‘Taem mi skelem tijing blong jos blong mi wetem vas ya, ?mi faenemaot wanem?’

Hemia i wan gudfala rod we yu save yusum blong skelem bilif blong yu. ?Yu yu wantem skelem ol narafala tijing blong jos blong yu wetem samting we Baebol i talem? Ol Witnes blong Jehova oli glad blong givhan long yu, blong yu jekemgud ol trutok blong Baebol. Sipos yu wantem, yu save askem long wan Witnes blong i mekem Baebol stadi blong yu fri nomo. Sipos no, yu save go long Websaet ya jw.org/bi.