Mi mi bon long wan vilej blong Saxony, we biaen i kam German Democratic Republic (GDR). Laef long haos i gud mo i gat lav, papa mo mama oli tijim mi long ol gudfala fasin. GDR i wan Komunis kantri, mekem se plante man long Saxony, oli no tinghae long ol skul. Mi mi bilif se i no gat God. Tu bigfala samting we i gat paoa long mi blong fas 18 yia long laef blong mi, hemia: bilif ya se i nogat wan God mo bilif blong Komunis.

?From wanem mi bilif long Komunis? From mi laekem tingting ya se evri man oli sem mak. Taswe, mi bilif se ol man oli mas seraotem ol samting folem stret fasin, from we fasin ya bambae i mekem se evri wan oli gat samting, mo i no gat man i pua. Ale mi joen long wan ogenaesesen blong ol yangfala we oli joen long Komunis mo mi bisi gud. Taem mi gat 14 yia nomo, mi spenem plante taem blong wok long wan projek blong envaeronmen, blong wokem gud ol pepa bakegen. Ol haeman blong taon ya Aue oli glad tumas long wok blong mi, ale oli givim presen long mi. Nating se mi yangfala nomo, be mi save sam haeman blong politik long GDR. Mi harem se mi stap mekem wan gudfala samting, mo bae mi gat wan gudfala fiuja.

Be wantaem nomo evri samting i jenis. Long 1989 Stonwol blong Belin mo ol Komunis kantri blong Is Yurop, oli foldaon. Wan trabol i mekem se i gat plante narafala trabol tu. Sloslo mi faenemaot se rabis fasin i fulap long GDR. Eksampol, oli luk ol man we oli no sapotem Komunis olsem ol man nating nomo. ?Olsem wanem samting ya i save hapen? ?Ol Komunis oli no moa bilif se evri man oli sem mak? ?Bilif blong Komunis i wan giaman bilif? Mi mi wari bigwan.

Ale mi no moa mekem ol samting ya we mi ting se oli impoten, mo mi stat blong lanem miusik mo pentem ol pija. Taem mi stap stadi long wan skul blong miusik, i luk olsem se mi save go long wan yunivesiti blong miusik. Ale mi plan blong kam wan man blong plei miusik. Samting we i nogud moa se, mi lego ol gudfala fasin we mi lanem taem mi smol. Samting we i moa impoten long mi long taem ya, hemia blong gat gud taem, olsem blong frenem plante gel wantaem. Be miusik, pentem ol pija, mo gud taem we mi gat, oli no tekemaot ol wari blong mi. Ol pija we mi pentem tu oli soemaot se mi fraet. Mi stap tingbaot se, ?Laef long fiuja bambae i olsem wanem? ?Mo from wanem yumi laef?

 Taem mi faenem ansa blong ol kwestin ya, mi sek bigwan. Wan aftenun long skul, mi sidaon wetem wan grup blong ol studen we oli stap tokbaot fiuja. I gat wan gel tu we i stap, nem blong hem Mandi, * mo hem i wan witnes blong Jehova. Hem i talem wan gudfala advaes long mi, i se: “Andrias, sipos yu wantem faenem ansa blong ol kwestin blong yu long saed blong laef mo fiuja, yu mas stadi Baebol.”

Mi no trastem tumas Baebol, be mi mekem desisen blong traem faenem ansa blong ol kwestin blong mi long Baebol. Mandi i talem long mi blong ridim Daniel japta 2, mo samting we mi ridim i mekem mi mi sek. Profet tok ya i tokbaot ol wol paoa mo ol gavman we bambae oli gat bigfala paoa kam kasem long taem blong yumi. Mandi i soem ol narafala profet tok blong Baebol tu, we oli tokbaot fiuja. !Naoia mi jes faenem ansa blong ol kwestin blong mi! ?Be hu i raetem ol profet tok ya, mo hu i naf blong talemaot gud fiuja? ?I min se i mas gat wan God we i laef i stap?

Mandi i mekem rod blong Horst mo waef blong hem Anjelika, blong givhan long mi blong save moa long Baebol. Mi luksave kwiktaem se, Ol Witnes blong Jehova nomo oli stap yusum nem blong God, Jehova, mo oli tinghae long nem ya. (Ol Sam 83:18 NW; Matiu 6:9) Mi lanem tu se, Jehova God i wantem se evri man oli laef olwe long paradaes long wol ya. Ol Sam 37:9 i talem se: “Olgeta we oli trastem [Jehova] bambae oli tekem graon ya i blong olgeta.” Mi kasemsave se, promes ya i go long evriwan we oli traehad blong folem ol haefala rul blong God we i stap long Baebol.

Nating se i olsem, mi faenem i had blong jenisim ol fasin blong mi blong laef folem wanem we Baebol i talem. Wok blong mi blong plei Miusik i mekem mi gat flas tingting. Taswe, fastaem mi mas lanem blong gat tingting daon. Mo tu, i no isi blong mi lego ol rabis fasin blong mi. !Be mi talem tangkiu tumas long Jehova from we hem i gat longfala tingting, i gat sore, mo i kasemsave filing blong olgeta we oli stap traehad blong mekem wanem we Baebol i talem!

Bilif blong Komunis mo bilif ya se i nogat wan God, i gat paoa long mi blong faswan 18 yia long laef blong mi, be afta long taem ya, Baebol i jenisim laef blong mi kam kasem naoia. Samting we mi lanem i mekem mi no moa wari long fiuja, mo i mekem se laef blong mi i gat mining. Mi baptaes olsem wan Witnes blong Jehova long 1993. Mo long yia 2000, mi maredem Tabita, we hem tu i wan Witnes. Mitufala i spenem plante taem blong givhan long ol narafala blong oli kasemsave long Baebol. Plante man we mitufala i mitim olgeta oli gat sem laef olsem mi, olgeta tu oli bilif long Komunis mo oli bilif se i no gat wan God. Mi glad tumas taem mi soemaot long olgeta olsem wanem blong save moa long saed blong Jehova.

Taem mi stat blong stadi Baebol wetem ol Witnes blong Jehova, papa mo mama blong mi i no glad. Be stat long taem ya kam kasem tede, tufala i luksave ol gudfala samting we oli kamaot long laef blong mi taem mi joen wetem ol Witnes. Mi glad tumas from we naoia tufala i stap ridim Baebol, mo go long ol miting blong ol Witnes blong Jehova.

Mi mo Tabita i gat wan gudfala mared from we mitufala i traehad blong folem gud ol advaes blong Baebol long saed blong mared. Eksampol, taem mitufala i folem ol advaes blong Baebol long saed blong fasin blong stap tru long mitufala, mared blong mitufala i stap strong.—Hibrus 13:4.

Mi no moa fraet mo wari long fiuja. Mi harem se mi joen long wan bigfala famle long fulwol we oli gat sem bilif, oli gat pis mo oli joen gud. Insaed long famle ya, mifala i save se mifala evriwan i sem mak nomo. Hemia nao samting we mi bilif long hem, mo mi wantem kasem long ful laef blong mi.