I no gat man i gat foto blong Jisas. Hem i no gat wan pija blong hem we oli droem o katem. Be yet, long ol handred yia we i pas, plante man oli droem o katem pija blong hem.

Be ol man ya tu oli no save se Jisas i luk olsem wanem. Taswe, oli droem ol pija blong Jisas folem kalja blong olgeta, bilif blong olgeta, mo folem tingting blong ol man we oli askem olgeta blong oli droem o katem pija blong Jisas. Be, ol pija ya we oli droem o katem oli save mekem ol man oli gat rong tingting long Jisas mo ol tijing blong hem.

Sam pija blong Jisas we oli droem i soem se hem i bunbun, i slak, hea blong hem i longfala, mo mustas blong hem i longfala mo i soem se hem i no glad. Long sam narafala pija, Jisas i olsem wan spirit mo i gat laet i saen raon long hem o sam man oli stap raon long hem. ?Ol pija olsem oli rili soem stret pija blong Jisas? ?Olsem wanem blong faenemaot? Wan rod, hemia blong luk sam save long Baebol we oli save givhan long yumi blong save se Jisas i luk olsem wanem. Ol save ya oli save givhan long yumi blong gat stret tingting long Jisas.

Hemia toktok we Jisas i talem long prea blong hem maet taem hem i baptaes. (Hibrus 10:5; Matiu 3:13-17) ?Bodi ya i luk olsem wanem? Toti yia bifo long taem ya we Jisas i talem tok ya, enjel Gabriel i kamtru long Meri mo i talem long hem se: “Bambae yu gat bel mo yu bonem wan boe, . . . Pikinini blong God.” (Luk 1:31, 35) Jisas i stret gud olgeta olsem Adam taem God i jes wokem hem. (Luk 3:38; 1 Korin 15:45) Taswe, Jisas i mas gat gudfala bodi, mo maet hem i sem mak long mama blong hem, Meri, we i wan woman Jiu.

Jisas i gat mustas, from we hemia wan kastom blong ol man Jiu we i defren long ol man Rom. Mustas i wan saen blong ona mo respek; be oli no longfala mo doti. Taswe, yumi sua se Jisas i stap katem mustas mo hea blong hem i sot. Olgeta nomo we oli ol Nasiraet, olsem Samson, oli no stap katem hea blong olgeta.—Namba 6:5; Jajes 13:5.

Jisas i wok olsem wan kapenta klosap 30 yia, mo hem i no yusum ol tul blong haos we yumi gat naoia. (Mak 6:3) Hemia i soem se hem i mas gat wan strong bodi blong bildim haos. Smoltaem afta we hem i stat blong prij, hem i go long haos tempol mo i luk “olgeta we oli stap salem buluk, mo sipsip, mo sotleg. Mo hem i luk ol man blong jenisim mane oli stap sidaon. Nao hem i tekem sam rop mo i mekem wip long hem, mo i ronemaot olgeta ya wetem ol sipsip mo ol buluk blong olgeta oli goaot long haos tempol. Mo hem i kafsaedem mane mo tebol blong ol man blong jenisim mane.” (Jon 2:14-17) I nidim wan man we i strong mo i gat paoa blong i mekem olsem. Mo tu, Jisas i yusum bodi we God i rerem finis, blong mekem ol samting we God i wantem se hem i mekem. Hem i se: “Mi mi mas talemaot gud nius blong Kingdom blong God long ol narafala taon tu, from we hemia nao samting we God i sanem mi blong mi mekem.” (Luk 4:43) Jisas i mas helti mo strong blong mekem wok ya long olgeta ples long Palestaen, from we hem i wokbaot nomo blong talemaot mesej ya.

Fes blong Jisas mo ol fasin blong hem i mas mekem ol man oli harem gud tumas, speseli olgeta we oli ‘stap hadwok tumas mo oli stap karem ol hevi samting.’  (Matiu 11:28-30) Fasin blong hem blong fren gud wetem ol narafala mo kaen long olgeta, i soemaot se bae hem i mekem i gud long olgeta we oli rere blong folem ol samting we hem i talem. Ol pikinini tu oli wantem kam klosap long Jisas, from we “hem i putum han blong hem i goraon long ol pikinini.”—Mak 10:13-16.

I tru Jisas i harem nogud long bodi blong hem bifo we hem i ded, be hemia i no min se hem i harem nogud oltaem. Eksampol, hem i go long wan mared long Kena mo i givhan blong jenisim wota i kam waen. (Jon 2:1-11) Long sam nara taem we hem i joen wetem ol man, hem i tijim sam nambawan lesen we yumi neva fogetem.—Matiu 9:9-13; Jon 12:1-8.

Taem Jisas i prij, hem i prij long wan fasin we i mekem se evriwan we oli lesin long hem oli harem gud from we oli gat hop blong laef we i no save finis. (Jon 11:25, 26; 17:3) Taem ol 70 disaepol blong hem oli kam talemaot ol stori blong wok blong prij we oli mekem, hem i “glad bitim mak” nao i talem long olgeta se: “Yufala i mas glad from we God i raetemdaon nem blong yufala finis long heven.”—Luk 10:20, 21.

Ol lida blong skul long taem blong Jisas oli traem faenem rod blong mekem ol man oli leftemap olgeta mo oli tinghae long olgeta. (Namba 15:38-40; Matiu 23:5-7) Be Jisas i no olsem olgeta, hem i talem long ol aposol blong hem tu se oli no mas “mekem i strong tumas” long ol narafala. (Luk 22:25, 26) Mo tu, Jisas i wonem olgeta se: “Yufala i mas lukaot long ol tija blong Loa we oli laekem blong werem ol longlongfala klos mo wokbaot olbaot blong ol man oli luk olgeta. Mo long ples blong maket, oli wantem tumas we ol man oli ona long olgeta.”—Mak 12:38.

Jisas i no mekem olsem ol lida ya, hem i putum klos we i sem mak nomo long ol narafala, mo samtaem ol man oli no luksave hem. (Jon 7: 10, 11) Mo tu, taem hem i stap wetem ol 11 aposol blong hem, hem i no luk defren long olgeta. Hemia nao from wanem Judas i mas kisim hem blong soem “wan saen” long ol man we oli wantem holem hem.—Mak 14:44, 45.

Nating se yumi no gat plante save long saed blong bodi blong Jisas, be i klia nomo se bodi blong Jisas i no sem mak olsem ol pija we ol man oli droem. Samting we i impoten moa bitim pija blong Jisas, hemia se yumi mas gat wanem tingting long hem naoia.

Long sem dei we Jisas i talem ol tok ya oli kilim hem i ded mo oli berem hem. (Jon 14:19) Hem i ded blong givim laef blong hem “olsem wan ransom, blong pembak plante man oli go fri.” (Matiu 20:28) Be long namba tri dei, God i mekem hem i laef bakegen “long bodi we i spirit” mo i “letem hem blong hem i soemaot hem” long sam disaepol blong hem. (1 Pita 3:18; Ol Wok 10:40) ?Jisas i luk olsem wanem taem hem i kamtru long ol disaepol blong hem? Maet hem i luk defren, from we olgeta tu oli no luksave hem kwiktaem. Taem Meri Magdala i luk hem, hem i ting se hem i wan man blong wok long garen. Mo taem tu narafala disaepol we oli stap wokbaot long rod blong Emeas oli luk hem, tufala i ting se hem i wan strenja.—Luk 24:13-18; Jon 20:1, 14, 15.

?Yumi mas luk Jisas olsem wanem tede? Bitim 60 yia afta we Jisas i ded, aposol Jon i luk Jisas long vison blong hem. Jon i no luk se Jisas i ded mo i stap hang long kros. Be hem i luk se Jisas i “King blong ol king, mo Masta blong ol masta” long Kingdom blong God, mo bae i no longtaem hem i winim ol enemi blong God, hemia i minim ol man mo ol enjel tu, mo bae i mekem se ol gudfala man oli harem gud blong olwe.—Revelesen 19:16; 21:3, 4.