?SAMTAEM, yu harem se yu stap fesem ol problem, yu wan nomo? Yumi laef long wan taem we “i strong tumas mo bambae i had blong winim ol trabol,” taswe tingting blong yumi i save foldaon mo yumi harem se yumi stap yumi wan. (2 Tim. 3:1) Be yumi no nid blong fesem ol problem blong laef yumi wan nomo. Baebol i talem se ol tru fren oli save halpem yumi long “taem blong trabol.”—Prov. 17:17.

Aposol Pol i glad tumas long ol fren we oli folem hem long misinari trip blong hem, from oli givhan bigwan long hem. (Kol. 4:​7-11) Taem Pol i kalabus long Rom, ol fren blong hem oli mekem ol wok we hem i no save mekem hem wan. Eksampol, taem ol brata mo sista long Filipae oli givim ol samting we Pol i nidim, Epafrodaetas i karem ol samting ya i go long hem. (Fil. 4:18) Tikikas i karem ol leta blong Pol i go long ol defdefren kongregesen. (Kol. 4:7) Yes, nating se Pol i stap kalabus long wan haos o i stap hem wan long prisen, be ol fren blong hem oli sapotem gud hem long ol wok we hem i stap mekem. ?Tede, yu save mekem wanem blong stap olsem wan tru fren?

I gat sam eksampol tede tu we oli soemaot se i impoten blong stap olsem wan tru fren blong narafala. Traem tingbaot wan sista we i soemaot se hem i wan tru fren blong Elisabet, we i wan fultaem paenia long Spen. Taem mama blong Elisabet i kasem kansa, sista ya i sanem plante teks mesej we i stanap long Baebol, blong leftemap tingting blong Elisabet. Elisabet i se: “Ol mesej ya oli rili givim paoa long mi evri dei, mo oli mekem mi harem se mi no stap mi wan.”—Prov. 18:24.

Yumi save fren gud moa wetem ol brata mo sista, taem yumi sapotem olgeta long wok blong prij mo long ol miting. Eksampol, ?Yu yu glad blong go pikimap wan olfala brata o sista i go long ol miting o wok blong prij? Sipos yu mekem olsem, i sua se hemia i leftemap tingting blong hem, mo hem tu bambae i leftemap tingting blong yu. (Rom 1:12) Be i gat sam Kristin we oli no save aot long haos. ?Long taem olsem, yu save mekem wanem blong stap olsem wan tru fren blong olgeta?

Sam brata mo sista oli gat problem blong helt o oli fesem sam had taem we i mekem se oli no save go long ol miting long Haos Kingdom. Traem tingbaot eksampol blong David. Hem i gat kansa long blad, mo blong bitim sikis manis, hem i stap kasem tritmen ya chemotherapy. Long olgeta taem ya, David mo waef blong hem, Lidia, i stap joen long ol miting tru long Intenet nomo.

 ?Olsem wanem ol fren blong tufala long kongregesen oli sapotem tufala? Afta long ol miting, samfala long Haos Kingdom bambae oli traehad blong toktok wetem tufala tru long Intenet. Mo taem tufala i givim ol ansa long miting, afta long miting, ol brata mo sista oli sanem mesej blong leftemap tingting blong tufala. ?Wanem i kamaot from? David mo Lidia i harem se tufala i no stap tufala wan nomo.

?Yu yu save mekem plan blong prij wetem olgeta we oli no save aot long haos? Sipos yumi mekem ol smol jenis olsem, yumi soemaot se yumi no fogetem olgeta ya we oli no save mekem plante samting long wok blong Jehova. (Prov. 3:27) I gud we sam samtaem yu mekem plan blong joen wetem olgeta blong prij long telefon o raetem leta. Ol elda oli mekem plan blong i save gat miting blong wok blong prij tru long Intenet. David mo Lidia i glad long plan ya. David i eksplenem se: “Taem mitufala i joen smoltaem long miting blong prij mo long prea, hemia i mekem se mitufala i kasem paoa bakegen.” Samtaem, maet yu save askem long olgeta ya we oli no save aot long haos, sipos yu save tekem wan Baebol stadi blong yu i go long haos blong olgeta, blong oli save joenem yu long stadi.

Taem yu prij wetem ol brata mo sista olsem, mo yu luk ol gudfala fasin blong olgeta, hemia bambae i mekem se yu fren gud moa wetem olgeta. Eksampol, taem yu prij wetem ol pablisa olsem, mo yu luk olsem wanem oli yusum gud Baebol blong kasem hat blong man, bambae yu respektem olgeta moa. Taem yu sapotem ol brata mo sista long wok blong prij, bambae yu gat plante moa niufala fren.—2 Kor. 6:13.

Pol i harem gud taem Taetas i stap wetem hem. (2 Kor. 7:​5-7) I tru se yumi leftemap tingting blong narafala taem yumi soemaot se yumi sore long olgeta we oli gat nid, be stori blong Taetas i soemaot se yumi save leftemap tingting blong ol narafala tu, taem yumi stap wetem olgeta mo mekem samting blong sapotem olgeta.—1 Jon 3:18.

Ol brata mo sista long Rasia oli soemaot wan gudfala eksampol long fasin ya blong givgivhan long olgeta. Tingbaot ekspiriens blong Sergey mo waef blong hem, Tatyana. Afta we ol polis oli kam brekin long haos blong tufala, oli tekem tufala i go blong kwestinim tufala. Biaen oli letem Tatyana i gofri fastaem. Sergey i talem se: “Taem [Tatyana] i kasem haos, kwiktaem nomo wan sista we i no fraet i kamtru long haos. Plante fren oli kam mo halpem mifala blong putum gud ol samting bakegen long haos.”

Sergey i gohed i se: “Oltaem mi laekem vas blong Ol Proveb 17:​17, we i talem se: ‘Wan tru fren i soemaot lav oltaem, mo hem i wan brata we i kamtru long yu long taem blong trabol.’ Ol tok blong vas ya oli gat moa paoa long mi long taem ya we mifala i fesem fasin agens, mo mi harem se mi no save gotru long hadtaem ya mi wan. Jehova i givim ol fren we oli no fraet blong stap long saed blong mi.” a

Naoia we yumi stap fesem plante moa hadtaem, yumi nidim ol fren we oli save sapotem yumi. Bambae yumi nidim olgeta moa long taem blong bigfala trabol. !Taswe, naoia i gud yumi mekem bes blong yumi blong stap olsem wan tru fren blong narafala!—1 Pita 4:​7, 8.