Blong mekem Jehova i glad, yumi mas gat bilif. Be Baebol i talem se “i no evri man we oli gat bilif.” (2 Tes. 3:2) Taem aposol Pol i talem tok ya, hem i stap tokbaot “ol rabis man mo ol man blong spolem man” we oli stap mekem i nogud long hem. Be Pol i stap tokbaot ol narafala man tu taem hem i talem tok ya long saed blong bilif. Sam man oli jusum blong no wantem luksave ol klia pruf we oli soemaot se i gat wan God we i krietem olgeta samting. (Rom 1:20) Sam narafala, maet oli talem se oli bilif long sam narafala samting, o long wan man we i gat moa paoa. Be hemia i no trufala bilif we i save mekem Jehova i glad.

Yumi nidim blong trastem fulwan se Jehova i stap, mo se hem bambae i “givim pei” long ol man we oli gat strong bilif. (Hib. 11:6) Bilif i wan long ol frut blong tabu spirit blong Jehova. Taswe blong kasem tabu spirit, man i mas prea from, blong Jehova i save givim long hem. (Luk 11:​9, 10, 13) Wan rod blong kasem spirit ya, hemia taem yumi ridim Tok blong God Baebol. Biaen yumi mas tingbaot samting we yumi ridim mo traem folem long laef blong yumi. Sipos yumi mekem olsem, tabu spirit blong Jehova i save gat paoa long laef blong yumi, mo i save givhan long yumi blong gat bilif ya we i save mekem Jehova i glad.