“Yufala i no mas wari tumas from ol samting blong tumora. Ol wari blong tumora oli blong tumora.” ​—MATIU 6:34.

?I minim wanem? Evri dei, yumi wari from sam samting. Be i nogud yumi ademap ol wari blong tumora long ol wari blong tede. Traem tingbaot ol wari blong wan dei nomo.

• Wari i save mekem man i tingting tumas. Taswe i gud yu traem hemia: Fastaem, yu mas luksave se yumi evriwan i gat sam wari long laef. Yu no mas wari tumas long ol samting we yu no save jenisim. Seken samting, yu mas kasem save se plante samting we yumi wari se bambae oli hapen, oli no hapen.

‘Yu no stap mekem i strong tumas long yu wan mo ol narafala.’​—FILIPAE 4:5.

?I minim wanem? Yu no ting se yu mas stret gud olgeta. Yu no traem kasem mak we i hae tumas, mo yu no ting se narafala tu i mas kasem.

• Yu no mas mekem ol rul we oli strong tumas, mo yu mas luksave se i gat sam samting we yu mo ol narafala oli no naf blong mekem. Olsem nao, bambae yu daonem wari, mo i isi blong yu mo ol narafala i mekem ol gudfala wok. Mo tu, i gud yu laf. Sipos yu laf, speseli taem evri samting i no ron gud, yu daonem wari mo yu mekem evriwan oli harem gud.

“Man we i gat fasin luksave, hem i no save kros kwik.”—OL PROVEB 17:27, NW.

?I minim wanem? Tingting i no klia taem yu kros, yu wari, o yu no gat longfala tingting. Taswe yu mas traem blong stap kwaet.

• Traem faenemaot samting we i mekem yu yu wari, mo wanem i kamaot from. Hemia i min se taem yu wari, yu makem ol tingting, ol filing, mo ol aksen blong yu, mo i gud yu raetemdaon tu. Samting ya i save halpem yu blong yu daonem wari. Mo tu, i gud sipos yu save karemaot ol samting long laef blong yu we oli mekem yu yu wari. Sipos yu no save mekem, traem faenem rod blong wari i no spolem yu tumas. Maet yu save folem wan gudfala plan blong wok mo blong yusum taem blong yu.

• Traem jenisim tingting blong yu. Samting we yu yu wari from, maet narafala i no wari from. Hem i no gat sem tingting olsem yu. Taswe i gud yu traem folem trifala advaes ya:

  1. Yu no mas hareap blong ting se narafala i minim nomo blong spolem yu. Traem tingbaot sipos yu stap wet blong pem wan samting long stoa, nao narafala i katem laen mo i go fastaem long yu. Sipos yu ting se hem i minim nomo blong spolem yu, bambae yu kros. I moagud yu tingbaot se maet hem i gat wan gudfala risen blong mekem olsem. !Maet tingting blong yu i stret!

  2. Traem luk gudfala saed blong evri samting. Sipos yu mas wet longtaem long epot o long ofis blong dokta, yu save yusum taem ya blong rid, mekem sam wok, o jekem ol imel.

  3. Yu no mas mekem wan smol samting i kam wan bigfala problem. Traem tingbaot se, ‘Tumora o nekis wik, ?bambae i wan bigfala problem yet?’ Luksave sipos problem ya i smol o i bigwan.

“Olgeta samting oli mas hapen long fasin we i stret mo i folem plan.” —1 KORIN 14:40.

?I minim wanem? Traem folem wan plan long laef blong yu.

• Yumi no laekem taem laef blong yumi i olbaot. Wan samting we i save mekem se laef i olbaot mo yu wari, hemia taem yu no finisim ol wok we yu statem. Long taem olsem, laef i fasfas. Taswe, i gud yu traem folem advaes ya:

  1. Mekem wan gudfala program mo folem.

  2. Traem luksave from wanem yu no finisim ol wok ya, mo jenisim tingting blong yu.

“Sipos tingting blong yumi i stap gud, yumi no wari, hemia i winim fasin ya we yumi stap hadwok tumas oltaem, be yumi no winim wan samting nating.”—PRIJA 4:6.

?I minim wanem? Ol man we oli wok bitim mak oli no kasem gudfala samting from “hadwok” blong olgeta. Oli no moa gat taem mo paoa i stap blong harem gud long ol samting we oli wok from.

• Yu mas gat stret tingting long wok mo mane. Sipos yu gat plante mane, hemia i no min se bambae yu glad mo yu no wari. Blong talem stret, plante taem i defren olgeta. Prija 5:12 i talem se: “Rijman hem i no save slip gud, . . . from we i stap tingting tumas long ol samting we hem i gat.” Taswe yu no mas pem tumas samting.

• Tekem taem blong spel. Yu daonem wari taem yu mekem samting we yu harem gud long hem. Be sipos yu no muvmuv, yu wajem TV nomo blong spel, hemia i no save givhan.

• Yu no spenem tumas taem long mobaelfon o tablet blong lukluk ol imel, ol teks mesej, o Intenet. I moa gud yu jekem ol imel long saed blong wok, long taem we yu wok nomo.

“Fasin ya blong trenem bodi, i save givhan long man.”—1 TIMOTI 4:8.

?I minim wanem? Sipos yu mekem eksasaes, bambae helt blong yu i kamgud moa.

• Mekem ol samting we oli givhan long helt blong yu. Eksasaes i save mekem yu yu harem gud mo yu no wari tumas. Kakae gud mo no mestem taem blong kakae. Meksua se yu tekem taem blong spel.

• Blokem ol nogud samting we plante man oli mekem blong “daonem” wari, olsem smok sigaret, tekem drag, o dring bitim mak. Bambae oli jes mekem yu yu wari moa, from we yu save kasem wan sik, o yu westem mane we yu wok had from.

• Sipos wari i stap kam antap bitim mak, i gud yu go luk wan dokta. Yu no mas sem blong askem help blong dokta.

“Faenemaot ol samting we oli moa impoten.”—FILIPAE 1:10.

?I minim wanem? Tingbaot ol samting we oli moa impoten long yu.

• Mekem wan lis blong ol wok blong yu, mo putum ol samting we oli moa impoten fastaem. Hemia bambae i givhan long yu blong yu luksave wok we yu no nid blong mekem kwiktaem, wok we yu save givim long narafala, mo wok we yu save lego.

• Long wan wik, yu raetemdaon olsem wanem yu yusum taem blong yu. Nao yu traem tingbaot ol rod we oli gud moa. Sipos yu yusum gud taem blong yu, bambae yu daonem wari.

• Makemaot taem blong spel. Nating se yu spel smol nomo, be hemia i save givim paoa mo daonem wari.

‘Taem man i stap wari, tingting blong hem i hevi, be gudfala tok blong fren blong hem i save leftemap tingting blong hem bakegen.’—OL PROVEB 12:25.

?I minim wanem? Ol gudfala toktok blong narafala i save leftemap tingting blong yu.

• Tokbaot ol wari blong yu wetem wan man we i kasem save mo i gat sore. Man ya we yu trastem hem, i save halpem yu blong stretem tingting, o faenem wan rod we yu no tingbaot blong winim problem blong yu. Taem yu tokbaot ol trabol, hemia nomo i naf blong mekem yu yu harem gud.

• Askem help blong narafala. Yu save givim wan wok long hem, o askem long hem blong i givhan long yu blong mekem wan wok.

• Sipos wan man we i wok wetem yu i stap mekem yu yu harem nogud, traem faenem wan rod blong winim trabol ya. Maet yu save tokbaot wetem hem long kaen fasin. (Ol Proveb 17:27) Sipos hemia i no wok, i moa gud yu no moa joen tumas wetem man ya.

“Olgeta we oli haremsave se oli nidim God long laef blong olgeta, oli glad.”—MATIU 5:3.

?I minim wanem? I no naf we yumi gat kakae, klos, mo ples blong slip. Yumi nidim God tu long laef blong yumi. Blong glad, yumi mas lukaot God.

• Prea i save givhan bigwan. God i wantem se yu ‘lego ol wari blong yu long hem, from we hem i stap tingbaot yu.’ (1 Pita 5:7) Sipos yu prea mo yu tingting long ol gudfala samting, yu save gat pis long tingting.—Filipae 4:6, 7.

• I gud yu ridim ol samting we oli pulum yu yu kam klosap long God. Ol advaes long magasin ya i kamaot long Baebol, buk ya we i save halpem yu blong fren gud wetem God. Hemia i save mekem yu yu ‘waes, mo yu luksave mining blong ol samting we i had.’ (Ol Proveb 3:21) Traehad blong ridim ful Baebol. Maet i gud yu stat long buk blong Ol Proveb.