Be sam kapol oli yusum teknoloji long fasin we i no stret. Hemia i save mekem ol problem ya i kamaot . . .

• Stilim impoten taem we tufala i sud spenem tugeta.

• Spenem tumas taem blong wok nating se samtaem i no nid blong mekem olsem.

• Tufala i no moa trastem tufala.

TAEM BLONG TUFALA

Wan hasban we nem blong hem Michael i talem se: “Samtaem mi mo waef blong mi i stap long sem rum nomo, be hem i nogat taem wetem mi from we hem i bisi blong jekem fon blong hem. Mo bae hem i talem se: ‘Naoia nao mi jes gat taem blong jekem ol samting ya.’” Wan hasban we nem blong hem Jonathan i talem se long ol situesen olsem, “hasban mo waef we i stap long sem rum nomo, i save harem olsem we tufala i stap long tu defren ples.”

BLONG TINGBAOT: ?Yu yu letem wan fon kol o mesej i stilim taem we yu sud spenem wetem hasban o waef blong yu?—EFESAS 5:33.

WOK

Sam man oli mas ansarem fon nating se oli gobak long haos, from wok blong olgeta i nidim se oli mekem olsem. Be sam narafala i no nid blong oli mekem olsem, be yet oli mekem. Wan hasban we nem blong hem Lee i talem se: “I had blong no ansarem ol kol o mesej we i kam long wok, nating se mi makemaot taem finis blong spenem wetem waef blong mi.” Wan waef we nem blong hem Joy i talem se: “Mi mi wok long haos, so wok i stap nomo, taswe i had blong save wetaem blong stop. Mi mas traehad blong skelemgud taem blong mi.”

BLONG TINGBAOT: ?Yu yu lesingud taem hasban o waef blong yu i stap toktok long yu?—LUK 8:18.

STAP TRU

Wan risej i soemaot se plante kapol oli rao from we wan long tufala i bin postem sam samting we i narakaen. Sam long olgeta oli talem se i tru we oli bin mekem olsem, mo oli haedem long patna blong olgeta.

Plante man oli talem se i gat fulap samting long sosol media we i save spolem mared laef, mo pulum narafala blong mekem adaltri. Taswe yumi no sapraes we ol loea oli talem se, sosol media nao i mekem plante man oli divos.

BLONG TINGBAOT: ?Yu yu haedem long hasban o waef blong yu se yu stap toktok wetem wan narafala we i no patna blong yu? —OL PROVEB 4:23.

MAKEMAOT TAEM

Man we i no wantem stap kakae, i no save stap helti. Long sem fasin, man we i no wantem spenem taem wetem hasban o waef blong hem, bambae i kasem problem long mared blong hem.—Efesas 5:28, 29.

Tokbaot wetem patna blong yu weswan samting we yutufala i wantem traem, o raetemdaon sam narafala tingting blong mekem se teknoloji i no spolem mared blong yutufala.

• Makemaot wan taem blong kakae tugeta evri dei

• Makemaot taem blong no yusum ol divaes blong yumitu

• Makemaot taem blong mekem wan spesel samting tugeta

• Ofem fon mo putum i stap longwe long bed

• Makemaot 15 minit evri dei blong toktok tugeta, mo ofem ol divaes long taem ya

• Makemaot wan taem evri dei blong no yusum intenet