RUL BLONG BAEBOL: “Man we i strong blong faet, hem i gud, be man we i save mekem tingting blong hem i longfala, hem i gud moa.”—Ol Proveb 16:32.

?I MINIM WANEM?: Yumi mekem i gud long yumi bakegen taem yumi strong blong kontrolem tingting mo filing blong yumi. Samtaem i stret nomo we yumi kros, be sipos yumi no kontrolem kros ya, yumi save mekem bigfala trabol i kamaot. Ol man we oli stadi long bisnes ya oli talem se plante taem, man we i kros i talem o i mekem samting we biaen hem i sore from.

?YU SAVE MEKEM WANEM? Yu no mas letem kros i kontrolem yu, be yu mas lanem blong kontrolem kros. Samfala oli ting se man we i faerap long kros i wan strong man, be yu yu waes sipos yu luksave se man we i faerap long kros i rili wan slak man. Baebol i talem se: ‘Sipos yu no save holem kros blong yu, bambae yu olsem taon we i no gat bigfala stonwol i goraon long hem.’ (Ol Proveb 25:28) Blong kontrolem kros, yu mas kasemsave gud fastaem long samting we i stap mekem yu yu kros. Baebol i talem se: ‘Man we i luksave samting, i no save kam kros kwik.’ (Ol Proveb 19:11) Sipos yu lesin gud long tugeta saed blong wan problem, ating bambae yu luksave sam samting, nao kros i godaon.

RUL BLONG BAEBOL: “Yufala i mas gat fasin ya blong talem tangkiu.”—Kolosi 3:15.

?I MINIM WANEM? Blong wan man i hapi, hem i mas glad long ol gudfala samting long laef. Ol man we oli lusum wan famle o ol sas samting blong olgeta, olgeta tu oli bilivim samting ya. Oli talem se samting we i givhan long olgeta blong oli no stap  harem nogud bitim mak, hemia taem oli putum tingting blong olgeta long ol gudfala samting long laef, i no long samting we oli lusum.

?YU SAVE MEKEM WANEM? Evri dei, yu mekem wan lis blong ol samting long laef blong yu we yu glad long olgeta. Hemia i no minim ol bigfala samting nomo. Traem tingbaot ol smosmol samting, olsem ol naes kala long skae taem san i girap, wan gudfala storian wetem wan fren o famle, o maet wan niufala dei blong laef nomo. Ol gudfala samting ya oli save mekem yu yu harem gud long tingting mo filing blong yu, sipos yu tektaem blong tingbaot olgeta mo glad from.

I gud blong tingbaot tu, from wanem ol famle mo ol fren oli mekem yu yu glad. Taem yu luksave samting we yu laekem long narafala, talem long hem, maet stret long hem, o long wan leta, wan imel, o long teks mesej. Hemia i save mekem se yutufala i fren gud, mo tu, yu yu glad from we yu givim samting long narafala.—Ol Wok 20:35.

YU KAMAOT TAEM I GAT RAO.

‘Stat blong rao i olsem wan smol hol long bigfala tang, we wota i stap lik long hem. I gud yu gowe bifo we rao i kamaot.’—OL PROVEB 17:14.

YU NO WARI BITIM MAK LONG FIUJA.

“Yufala i no mas wari tumas from ol samting blong tumora. Ol wari blong tumora oli blong tumora. Trabol blong wan dei hem i naf finis blong dei ya.”—MATIU 6:34.

YU TINGTING GUD—NO FOLEM FILING BLONG YU NOMO.

“Fasin ya we yu luksave ol samting mo we yu savegud ol mining blong hem, hem bambae i stap lukaot long yu.”—OL PROVEB 2:11.