Plante milian man oli folem ol advaes we ol haf insaed ya oli tokbaot, mo oli mekem bigfala jenis blong aotem fasin ya blong no laekem narafala long hat blong olgeta. Be blong talem stret, yumi no save aotem fulwan fasin ya long prapa paoa blong yumi. ?Hemia i min se fasin ya i no save lus fulwan?

Ol gavman blong man oli no naf blong mekem ol man oli lego fasin ya blong no laekem narafala. ?Be hemia i min se i no gat wan gavman we i naf blong aotem fasin ya?

Gavman we bambae i finisim fasin ya blong no laekem narafala, i mas

1. 1. Pulum ol man blong oli wantem jenisim tingting mo filing blong olgeta long saed blong ol narafala.

2. 2. Finisim fasin we i no stret we i mekem se i had blong ol man oli tritim gud ol narafala.

3. 3. Gat ol lida we oli holemstrong long ol gudfala fasin mo oli tinghae long evri sitisen wanwan.

4. 4. Joenem ol man blong olgeta nesen oli kam wan.

Baebol i talem se God i wokem wan gavman olsem. Nem blong hem “Kingdom blong God.”—Luk 4:43.

Tingbaot samting we gavman ya bambae i mekem.

“Ol man we oli stap long graon ya [bambae] oli lanem mining blong stret fasin.”—AESEA 26:9.

“Samting we bambae i kamaot from trufala stret fasin hemia pis, mo frut blong trufala stret fasin, hemia se bambae olgeta samting i kwaet olwe mo oli sefgud.”—AESEA 32:17.

?Hemia i minim wanem? Kingdom blong God bambae i tijim ol man long stret fasin. Taem ol man oli save stret fasin o jastis, tingting blong olgeta bambae i jenis. Evriwan bambae oli luksave stret fasin ya blong lavem enikaen man.

God “bambae i ravemaot wota blong ae blong olgeta, mo bambae i no moa gat man i ded, mo bambae man i no moa sore, mo bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”—REVELESEN 21:4.

?Hemia i minim wanem? Kingdom blong God bambae i finisim evri harem nogud we i kamaot from fasin ya blong mekem i no stret long narafala. Ol man we bifo ol narafala oli tritim nogud olgeta, oli no moa gat risen blong kros long narafala.

“Bambae hem i no jaj folem samting nomo we hem i luk long ae blong hem, no i stretem man folem samting nomo we hem i harem long sora blong hem. Bambae hem i jajem ol man we oli no gat nem folem sem fasin nomo, mo i folem fasin we i stret blong stretem ol man, long bihaf blong ol man long wol we oli gat tingting daon.” —AESEA 11:3, 4.

?Hemia i minim wanem? Jisas Kraes we i King long Kingdom blong God long heven, bambae i rul long stret fasin, mo i mekem i sem mak long olgeta man long wol. Jisas i no leftemap wan nesen moa i bitim narawan, mo hem i naf blong mekem se ol man long olgeta ples long wol oli folem ol loa blong hem we i stretgud.

Kingdom blong God i tijim ol man blong oli “gat wan tingting nomo, [oli] gat sem lav, [oli] joen gud, mo [oli] gat wan tingting nomo long maen blong [olgeta].”—FILIPAE 2:2.

?Hemia i minim wanem? Yuniti we i stap long medel blong ol sitisen blong Kingdom blong God, bambae i wan tru samting, i no jes wan samting blong pulum ae nomo. Bambae oli “joen gud” from we oli lavlavem olgeta tru.