?OL DOKTA OLI TALEM WANEM?

Wan buk (Harvard Mental Health Letter) i talem se: “Man we i talem tangkiu, i hapi oltaem. Hem i harem gud, i tingting bak long ol gudfala samting we i hapen, helt blong hem i gud moa, i isi moa blong hem i winim trabol, mo hem i fren moa wetem ol narafala.”

?BAEBOL I TALEM WANEM?

Baebol i talem se i gud yumi gat fasin ya blong talem tangkiu. Aposol Pol i givim gudfala eksampol. Taem man i lesin long gud nius, ‘Pol i talem tangkiu long God.’ Mo hem i talem long yumi se: “Oltaem yufala i mas talem tangkiu.” (1 Tesalonaeka 2:13; Kolosi 3:15) Be i no naf blong talem tangkiu sam samtaem nomo. Sipos yumi gat fasin ya oltaem, bambae yumi glad olwe. Bambae yumi no gat ol fasin we oli mekem se narafala i no wantem fren wetem yumi, olsem jalus, kros, mo yumi ting se man i mas givim samting long yumi.

Jehova i soemaot gudfala eksampol blong talem tangkiu, mo hem i mekem olsem long ol man tu. Hibrus 6:10 i talem se: “Oltaem God i stap mekem i stret nomo. Mo hem i no save fogetem ol wok ya we yufala i mekem. Hem bambae i stap tingbaot we yufala i lavem hem.” Yes, Jehova i save se sipos hem i no talem tangkiu, bambae hem i mekem samting we i no stret.

‘Oltaem yufala i mas glad. Mo long olgeta samting we oli stap kamtru long yufala, yufala i mas talem tangkiu long God.’—1 Tesalonaeka 5:16, 18.

SAMTING WE I HAPEN LONG YU

Maet wan man i givim presen long yumi, no i talem wan gudfala toktok, no i givhan long yumi. Taem yumi talem tangkiu wetem fulhat blong yumi, yumi mekem hem i harem se yumi tinghae long hem mo yumi glad long hem. Maet wan strenja i openem doa blong yu pas no wan narafala samting olsem, be hem tu bambae i glad sipos yu talem tangkiu.

?BAEBOL I TALEM WANEM?

Jisas i talem se: “Yufala i mas givim ol samting i go long narafala man, nao God bambae i givim ol samting i kam long yufala. Bambae God i givim ol samting long yufala we bambae i plante we plante, olsem we man i fulumap bag, i seksekem, i ramem gogo i fulap gud, i folfoldaon.” (Luk 6:38) Yu traem tingbaot wan gel Vanuatu we sora blong hem i fas, nem blong hem Ros.

Ros i stap go long ol miting blong ol Witnes blong Jehova, be hem i no kasem wan samting from we hem i no save saen lanwis, mo i no gat narafala long kongregesen we i save. Nao wan man wetem woman blong hem we tufala i savegud saen lanwis, tufala i visitim kongregesen ya, mo tufala i statem wan klas blong tijim saen lanwis. Ros i talem bigfala tangkiu, i se: “Mi glad tumas blong gat plante fren we oli lavem mi.” Taem tufala we i givhan long hem i luk se hem i joen long ol miting mo i glad tumas, tufala i harem gud bitim mak. Ros i talem bigfala tangkiu tu long olgeta we oli traehad blong lanem saen lanwis blong oli save toktok wetem hem.—Ol Wok 20:35.

“Man we i stap talem tangkiu long mi, . . . i olsem we hem i stap mekem prapa sakrefaes long mi.”—Ol Sam 50:23.

?BAEBOL I TALEM WANEM?

Samting we yumi tingbaot i save mekem se yumi kasem wan filing. Deved i prea long God se: “Mi stap tingbaot olgeta wok ya we yu yu mekem, mo mi stap tingting long olgeta samting ya we yu yu mekem long mi.” (Ol Sam 143:5) Yes, Deved i wan man we i tingting dip long ol impoten samting. From we hem i tingbaot wok we God i mekem oltaem long laef blong hem, hem i wantem talem tangkiu long hem.—Ol Sam 71:5, 17.

Baebol i talem ol nambawan advaes ya se: “Yufala i mas putum tingting blong yufala i stap strong long ol fasin olsem. Ol fasin ya oli tru, mo oli hae, mo oli stret, mo oli klin gud, mo oli save mekem yumi harem gud, mo ol man oli stap ona long olgeta we oli stap mekem ol fasin ya.” (Filipae 4:8) Ol tok ya ‘putum tingting i stap strong,’ i soemaot bakegen se yumi mas tingting dip oltaem. Hemia nao samting we i save givhan long yumi blong talem tangkiu.

‘Taem mi tingting dip, mi mi kasem save.’—Ol Sam 49:3.