SOO-JEONG, we i wan advaesa long hae skul long Saot Koria, i yusum ol video blong websaet ya jw.org long klas blong hem. Hem i talem se: “Ol studen oli laekem tumas video ya What’s a Real Friend? Sam long olgeta oli talem se: ‘Mi neva tingbaot samting ya bifo. !Hem i wan niufala rod blong tij!’ Samfala oli talem se, sipos oli nidim advaes bambae oli luk websaet ya.” Soo-jeong i gohed se: “Mi mi tokbaot video ya long ol narafala tija tu, nao oli glad blong gat wan gudfala video olsem blong yusum long klas blong olgeta.”

Wan narafala video we plante studen long Saot Koria oli laekem, hemia Yu Save Winim Wan Stronghed. Wan woman we i wok wetem grup blong blokem raf fasin long ol yangfala (Juvenile Violence Prevention Foundation) i soem video ya long wan klas, nao i talem se: “Ol pija oli pulum ae blong ol yangfala. Mo tu, video ya i gud from we i soemaot rod blong winim raf fasin mo blokem raf fasin.” Grup ya i askem long ol bos blong olgeta, sipos oli save yusum video ya long ol tok we oli mekem long ol praemari skul, mo oli letem. Sam polis tu oli stap yusum ol video long jw.org.

?Yu luk websaet ya finis? Sipos no, i gud yu traem luk. I isi nomo blong faenem ol samting, mo yu no pem blong daonlodem ol rikoding, ol video, Baebol, mo plante narafala buk.