Faswan Giaman Tingting: Wan Samting Insaed Long Man i Gohed Blong Laef Afta We Man i Ded

?Giaman tingting ya i kamaot long weples? Namba 11 blong buk ya, The New Encyclopædia Britannica (1988), i talem long pej 25, se sam long ol faswan Kristin we oli tekem tingting blong ol waes man blong wol, oli folem tingting blong ol man Gris. Hemia tingting ya se i gat wan samting insaed long man we i gohed blong laef afta we man i ded. Oli talem se samting ya i joen long bodi blong man taem hem i jes stat long bel blong mama blong hem.

?Baebol i talem wanem? “Hem i gobak long graon; long sem dei ya olgeta tingting blong hem oli finis.”—Ol Sam 146:4, King James Version.

?Olsem wanem? ?Ol man oli gat wan “spirit” we i gohed blong laef afta we man i ded? Baebol i tijim se God i putum paoa blong laef, no spirit, insaed long ol man mo anamol, mo olgeta ya oli mas pulum win blong paoa ya i save wok. Paoa blong laef ya nao i mekem se bodi blong olgeta i muv. Be sipos ol man, mo ol anamol tu, oli no moa pulum win, paoa ya blong laef we God i givim bambae i no moa wok, ale oli ded. Oli no moa save wan samting.—Jenesis 3:19; Prija 3:19-21; 9:5.

Bilif ya se i gat wan samting insaed long man we i no save ded samtaem mo we i gohed blong laef afta we man i ded, i mekem plante kwestin oli kamaot: ?Samting ya i go wea afta we man i ded? ?Wanem i hapen long ol rabis man taem oli ded? Taem ol man we oli talem se oli Kristin, oli folem tijing ya se i gat wan samting insaed long man we i gohed blong laef afta we man i ded, hemia i lidim olgeta blong folem wan narafala giaman tingting bakegen, hemia tijing blong helfaea.

Skelem ol vas ya blong Baebol: Prija 3:19, NW; Matiu 10:28, NW; Ol Wok 3:23, NW.

SAMTING WE I TRU:

Taem man i ded, hem i no moa laef nating