Seven Samting Blong Tingbaot Taem Yu Ridim Baebol

“Evri yia ol man oli salem plante buk. Be buk ya we oli salem moa long fulwol, hemia Baebol. Evri yia nomo ol man oli stap pem ol Baebol moa i winim ol narafala buk.”—NIUSPEPA YA TIME.

“Sam samtaem mi ridim Baebol, be mi harem we i no pulum intres blong mi nating.”—KEITH, WAN MAN BLONG PLEI MIUSIK LONG INGLAN.

I NARAKAEN blong tingbaot we plante man oli gat Baebol be taem oli ridim Baebol oli harem olsem se oli no kasem wan gudfala samting from. Nating se i olsem, i gat sam man we oli laekem tumas ol tok we oli ridim long Baebol. Tingbaot woman ya we nem blong hem Nancy. Hem i stori se: “Evri moning, mi stap ridim Baebol mo tingting dip long hem. Long taem ya we mi stat blong mekem olsem, i kam kasem tede, mi harem se fasin ya i givhan bigwan long mi. Fasin ya i mekem mi mi naf blong stanap strong nomata wanem trabol i kasem mi. Long 35 yia we i pas, mi traem plante defdefren samting blong harem gud taem tingting blong mi i foldaon olgeta. Be fasin ya nao blong ridim Baebol i givhan moa long mi i bitim olgeta narafala samting ya we mi traem mekem blong harem gud.”

Maet yu neva ridim Baebol. ?Olsem wanem? ?Yu yu sapraes taem yu harem stori blong sam man we Baebol i givhan long laef blong olgeta? Maet yu yu stap ridim Baebol oltaem. ?Olsem wanem? ?Yu wantem ridim Baebol long wan fasin we i givhan moa long yu? Ale i gud yu tingbaot ol seven samting ya we haf ya bambae i tokbaot.

1​—Tingbaot From Wanem Yu Ridim Baebol

◼ Maet yu ridim Baebol from we yu ting se hem i wan gudfala buk blong ol stori. Maet yu ridim Baebol from we yu harem se hemia i olsem wan wok we yu mas mekem. No maet yu ridim Baebol from we yu wantem faenem tok blong lidim yu long wol ya we i fulap long trabol. Be ol tok blong Baebol bambae oli givhan moa long yu sipos yu ridim from we yu wantem save trutok long saed blong God. Antap long hemia, bambae yu kasem plante gudgudfala samting long ol tok blong Baebol sipos yu ridim from we yu wantem faenemaot olsem wanem tok blong hem i save gat paoa long laef blong yu.

Taem man i ridim Tok blong God hem i mas gat wan stret risen. Baebol nomo i soemaot samting ya long yumi taem hem i talem se hem i olsem wan glas: “Man we i stap lesin long tok ya be i no stap mekem ol samting we tok ya i talem, hem i olsem man we i stap lukluk fes blong hem long glas. Hem i save luklukgud fes blong hem, be taem hem i gowe, wantaem nomo hem i no moa save tingbaot we fes blong hem i olsem wanem. Be loa ya we i save mekem man i fri, i stret olgeta. Mo man we i stap luklukgud long hem, mo i stap tingbaot oltaem, hem i no save fogetem ol samting we loa ya i talem. Hem i save mekem ol samting ya, mo taem hem i stap mekem olsem, God i stap mekem hem i harem gud long olgeta laef blong hem.”—Jemes 1:23-25.

Vas ya i tokbaot wan man we i lukluk fes blong hem long glas be i no mekem wan samting blong jenisim samting we hem i luk se i no stret. Maet hem i lukluk hem wan hareap tumas nao i no luksave se wan samting i rong. No maet hem i luk, be i no wantem jenisim wan samting. Long sem fasin, maet yumi ridim Baebol hareap tumas. No maet yumi no mekem ol samting we yumi ridim i wok long laef blong yumi. Sipos i olsem, ol samting ya we yumi ridim bambae oli no mekem i gud long yumi. Be sipos yumi ridim Baebol mo yumi tingbaot blong “mekem” ol tok blong hem oli wok long laef blong yumi, bambae yumi hapi. Bambae yumi hapi from we yumi stap traem mekem ol tingting mo fasin blong yumi oli laenap wetem tingting blong God.

2​—Jusum Wan Baebol We i Gud

◼ Maet i gat defdefren Baebol we ol man oli tanem i kam long lanwis blong yu. Eniwan long ol Baebol ya  oli save givhan long yu. Be i tru se i gat samfala we oli yusum ol toktok we oli ol olfala tok blong bifo, no maet oli yusum ol tok we sipos man i “no skul gud,” bambae i had blong oli kasem save long hem. (Ol Wok 4:13) Mo tu, sam man we oli tanem Baebol i go long lanwis blong olgeta, oli jenisim sam toktok we i stap long tabu buk ya. Oli jenisim ol tok ya blong mekem i laenap wetem ol kastom mo tingting blong man nomo. Olsem fashaf blong magasin ya i soemaot, sam long olgeta oli karemaot nem blong God, hemia Jeova, mo long ples blong nem ya oli putum ol tok olsem “Hae God” no “Masta.” Taswe taem yu jusum wan Baebol, i gud yu traem faenem wan we ol man oli tanem long fasin we i stret mo i isi blong yu ridim mo kasem save long hem, mo i gud yu jusum wan we bambae i pulum yu blong wantem rid moa.

Wan Baebol we plante milian man raon long wol oli laekem blong ridim, hemia Baebol ya New World Translation. * Tingbaot wan olfala man long kantri ya Bulgeria. Hem i kam long wan miting blong ol Witnes blong Jeova, mo oli givim Baebol ya New World Translation long hem long lanwis blong hem. Biaen, hem i talem se: “Plante yia finis mi stap ridim Baebol. Be mi neva ridim wan Baebol we i olsem hemia. Ol tok blong hem oli isi blong kasem save, mo oli kasem gud tingting blong mi.”

3​—Prea

◼ Yu save kasem save moa long Baebol sipos yu askem long God we hem nao i stamba blong Baebol, blong hem i halpem yu. Hemia nao samting we man ya we i raetem ol singsing blong presem God, i mekem. Hem i prea se: “Plis yu openem ae blong mi blong mi save luk ol gudgudfala samting long Loa blong yu.” (Ol Sam 119:18) Oltaem, taem yu ridim Baebol, i gud yu prea long God fastaem. Yu mas askem hem blong i halpem yu blong kasem save long Tok blong hem. Mo yu save talem tangkiu tu long hem from we hem i givim Baebol long yu. Sipos yu no gat Baebol bambae yu no save God.—Ol Sam 119:62.

?God i harem yumi taem yumi askem hem blong halpem yumi? Tingbaot wanem i hapen long tu yangfala gel we tufala i sista. Tufala i stap long kantri ya Urugwae. Tufala i stap ridim Baebol mo tufala i konfius long toktok we oli ridim long Daniel 2:44. Ale, tufala i prea long God. Tufala i askem we hem i sanem wan man i kam halpem tufala blong kasem save mining blong vas ya. Tufala i stap sidaon yet wetem Baebol blong tufala, nao tu Witnes blong Jeova tufala i kilkilim doa long haos blong tufala. Tufala Witnes ya, tufala i ridim wan vas blong Baebol long tufala. Vas ya hemia Daniel 2:44 we tufala gel ya i wantem save mining blong hem. Tufala Witnes ya, tufala i eksplenem se vas ya i stap tokbaot ol gavman blong man we i no longtaem bambae oli lus, mo Kingdom blong God we bambae i rul long ples blong olgeta. * Taem tufala yangfala gel ya tufala i harem toktok ya, tufala i kasem save wantaem se God i ansa long prea blong tufala.

4​—Rid Evri Dei

◼ Long Septemba 11, 2001, ol teroris oli mekem tu bigfala stori haos long Yunaeted Stet oli foldaon. Afta long hemia, wan woman we i stap raetem niuspepa i talem se ‘wantaem nomo plante man oli go pem ol Baebol.’ Yes, taem trabol i kamaot, plante man oli lukluk i go long Tok blong God. Be Baebol i talem se yumi mas ridim Tok blong God evri dei, i no long taem blong trabol nomo: “Oltaem, ol tok we yu yu stap tijim ol man long hem oli mas kamaot long buk blong Loa ya. Mo yu mas tingting gud long ol tok blong hem long dei mo long naet, blong yu save mekem olgeta samting we hem i talem. Sipos yu mekem olsem, bambae ol wok blong yu i gat frut blong hem, mo bambae yu save win.”—Josua 1:8.

Fasin blong ridim Baebol evri dei i impoten tumas. Tingbaot wan man we i kasem hatatak. Afta we hem i kasem hatatak, hem i stat tingting nao se hem i mas lukaot gud long ol kakae blong hem. Hemia wan gudfala tingting. Be sipos hem i tingbaot blong kakae gud taem hem i harem hat blong hem i soa nomo, ?yu ting se samting ya bambae i givhan long hem? Nogat. Hem i mas kakae gud evri dei long laef blong hem. Olsem nao bambae hem i givhan long bodi blong hem blong i no kasem hatatak bakegen. Long sem fasin, taem yu ridim Baebol evri dei “bambae yu save win.”

 5​—Jenjenisim Rod Blong Yu Blong Ridim Baebol

◼ Samfala oli stat ridim Baebol long Jenesis i go kasem Revelesen. Hemia i gud. Be i gat sam narafala rod blong ridim Baebol we maet yu yu laekem moa. Hemia sam narafala rod blong ridim Baebol we yu save folem.

Jusum wan man long Baebol we yu wantem ridim stori blong hem. Ridim olgeta japta no buk we oli tokbaot laef blong wan man blong God. Sam long olgeta ya, olsem:

• Josef: Jenesis japta 37 kasem japta 50.

• Rut: Rut japta 1 kasem japta 3.

• Jisas: Matiu japta 1 kasem japta 28; Mak japta 1 kasem japta 16; Luk japta 1 kasem japta 24; Jon japta 1 kasem japta 21. *

Jusum wan tijing. Ridim olgeta vas we oli eksplenem tijing ya moa. Maet yu wantem save long saed blong prea. Ale i gud yu traem faenem moa save long saed blong prea. Yu save ridim olgeta advaes we Baebol i givim long saed blong prea. Mo tu, long Baebol i gat plante prea blong ol man bifo. Maet yu save ridim sam long ol prea ya. *

Rid long bigfala voes. Fasin ya blong ridim Baebol long bigfala voes, i save givhan bigwan long yu. (Revelesen 1:3) Maet yu save sidaon wanples wetem famle blong yu, nao wanwan long yufala i save ridim sam haf blong Baebol. Sipos yufala i ridim wan stori long Baebol, yufala i save jusum wanwan long yufala blong i ridim toktok blong ol defdefren man insaed long stori ya. Sam man oli laekem blong lesin long CD no kaset we oli rikodem Baebol riding long hem. Wan woman i talem se: “Mi traem ridim Baebol mi wan, be i no isi. Ale, mi stat lesin long Baebol riding long CD. Naoia mi laekem Baebol tumas. Mi ting se hem i wan buk we i winim ol narafala buk.”

6​—⁠Tingting Dip

◼ Fasin blong laef tede i mekem ol man oli bisi tumas mo oli mas hareap oltaem blong mekem samting. Laef olsem, i no givhan long man blong tingting dip. Nating se i olsem, yumi mas gat wan taem blong tingting dip long ol samting we yumi ridim long Baebol. Long rod ya nomo, ol tok blong Baebol bambae oli save givhan long yumi. I sem mak olsem taem man i kakae. Bodi i mas tantanem gud evri kakae ya blong mekem se kakae ya i givhan long bodi. Tingting dip i min se yu ridim wan samting finis, ale yu tingtingbak long samting ya bakegen. Yu tingbaot ol kwestin olsem: ‘?Long riding ya, mi lanem wanem long saed blong Jeova God? ?Samting ya we mi ridim, i stret long laef blong mi olsem wanem? ?Olsem wanem mi save yusum save ya we mi ridim, blong givhan long narafala man?’

Taem yumi tingting olsem, yumi stap putum tok blong Baebol i go long hat blong yumi. Ale samting ya i mekem we yumi glad moa blong ridim Tok blong God. Ol Sam 119:97 i talem se: “Hae God. Mi mi laekem Loa blong yu tumas, mi stap tingting long hem i stat long moning, gogo kasem sapa.” Man we i raetem Sam ya i stap tingbaot Tok blong God long ful dei. Taem hem i mekem olsem, samting ya i mekem we hem i laekem tumas ol samting ya we hem i lanem long Tok ya.

7​—Askem Narafala Blong Halpem Yu Blong Kasem Save

◼ God i save se bambae yumi no naf blong kasem save long Tok blong hem yumi wan nomo. Baebol i talem stret long yumi se “sam tok blong hem i strong blong save.” (2 Pita 3:16) Buk blong Ol Wok i tokbaot wan haeman Itiopia we hem i stap ridim wan haf blong Baebol be hem i no kasem save long ol tok we hem i ridim. Ale God i sanem wan man blong Hem i kam blong givhan long man Itiopia ya. Biaen, man Itiopia ya i “folem rod blong hem i go, we hem i glad tumas.”—Ol Wok 8:26-39.

Yu tu yu save kasem plante gudfala samting moa sipos yu askem narafala blong halpem yu blong kasem save long samting we yu stap ridim. Yu save askem ol Witnes blong Jeova long ples blong yu blong oli halpem yu long saed ya. No yu save raet i kam long wan long ol adres we oli stap long pej 4 blong magasin ya, blong askem wan Witnes blong i kam stadi Baebol wetem yu long haos blong yu nomo. Baebol stadi olsem, i fri nomo.

[Ol futnot]