Yumi Lanem Samting Long Tok Blong God

?Wanem Bambae i Hapen Long Jajmen Dei?

Ol tok we oli kam biaen oli tokbaot sam kwestin we maet yu yu stap askem, mo oli talem weples yu save ridim ansa blong ol kwestin ya long Baebol blong yu. Ol Witnes blong Jehova bambae oli glad blong tokbaot ansa blong ol kwestin ya wetem yu.

1. ?Wanem ya Jajmen Dei?

Plante man oli ting se long Jajmen Dei, plante milian dedman bambae oli stanap long fored blong jea blong God, blong hem i jajem olgeta from ol sin we oli mekem taem oli laef. Olsem we pija ya i soemaot, oli ting se olgeta we God i jajem olgeta se oli stret, bambae oli go long heven, be olgeta we oli no stret bambae oli go long helfaea. Be Baebol i soemaot se God i yusum Jajmen Dei blong tekemaot fasin we i no stret we i mekem ol man oli stap harem nogud. (Ol Sam 96:13) God i putumap Jisas blong i Jaj, mo Jisas bambae i putumbak stret fasin long wol ya.—Ridim Aesea 11:1-5; Ol Wok 17:31.

2. ?Jajmen Dei bambae i putumbak stret fasin olsem wanem?

Taem fas man, Adam, i jusum blong agensem God, hem i mekem olgeta man we oli kamaot biaen long hem oli kasem sin, oli harem nogud, mo oli ded. (Rom 5:12) Blong stretem samting ya, Jisas bambae i mekem plante milian man oli laef bakegen. Buk blong Revelesen i talemaot se samting ya bambae i hapen long wan taosen yia rul blong Jisas Kraes.—Ridim Revelesen 20:4, 11, 12.

God bambae i jajem ol man we oli laef bakegen, i no from ol samting we oli mekem bifo we oli ded, be hem i jajem olgeta folem wanem we oli raetem long “buk” we Revelesen japta 20 i tokbaot. (Rom 6:7) Aposol Pol i talem se long olgeta we bambae oli laef bakegen, i gat “olgeta we oli stret mo olgeta we oli no stret.” Olgeta ya bambae oli gat janis blong lanem ol save long saed blong God.—Ridim Ol Wok 24:15.

  3. ?Jajmen Dei bambae i mekem wanem?

Olgeta man we oli ded we oli no bin save Jehova God, mo oli no mekem wok blong hem, oli gat janis blong jenisim fasin blong olgeta, mo mekem samting we i gud. Sipos oli mekem olsem, i olsem we oli “laef bakegen blong kasem laef.” Be sam long olgeta we oli laef bakegen, bambae oli no wantem lanem ol samting we Jehova i talem. Sipos oli mekem olsem, i olsem we oli laef bakegen blong ‘pas long kot blong God i jajem olgeta.’—Ridim Jon 5:28, 29; Aesea 26:10; 65:20.

Dei ya we God bambae i jajem ol man long hem i blong wan taosen yia. Long en blong taem ya, Jehova bambae i mekem we olgeta man oli kam stret gud olgeta. (1 Korin 15:24-28) !Hemia wan nambawan blesing blong ol man we oli obei long Jehova! Setan i kalabus long bigfala hol ya we i godaon we i godaon, blong wan taosen yia. Long en blong wan taosen yia ya, God bambae i letem hem i fri bakegen. Biaen Setan bambae i traem bakegen blong pulum ol man oli gowe long Jehova. Be olgeta man we oli sakemaot Setan, bambae oli harem gud blong laef olwe long wol ya.—Ridim Aesea 25:8; Revelesen 20:7-9.

4. ?Wanem narafala dei blong jajmen we bambae i givhan long ol man?

Baebol i yusum tok ya “bigfala Dei ya we God bambae i jajem ol man,” blong tokbaot wan samting we bambae i tekemaot rabis fasin long wol ya. Dei ya bambae i kam long taem we man i no save, sem mak olsem Bigfala wota we i ron long taem blong Noa. Bigfala wota ya i bin wasemaot olgeta man we oli stap mekem ol nogud fasin. Yumi glad se taem God bambae i finisim ol man we oli “no obei” long hem, bambae yumi save harem gud long wan niufala wol we “stret fasin nomo bambae i stap long hem.”—Ridim 2 Pita 3:6, 7, 13.

Sipos yu wantem save moa, plis lukluk pej 213-215 long buk ya ?Wanem Samting We Baebol i Rili Tijim? we ol Witnes blong Jehova oli wokem.

[Tok blong pija long pej 16]

“Las Jajmen” blong Gustave Doré, 1832-1883

[Credit Line]

Engravings by Doré