Yumi Lanem Samting Long Tok Blong God

?Wan Gavman Nomo Bambae i Rulum Wol?

Ol tok we oli kam biaen oli tokbaot sam kwestin we maet yu yu stap askem, mo oli talem weples yu save ridim ansa blong ol kwestin long Baebol blong yu. Ol Witnes blong Jehova bambae oli glad blong tokbaot ansa blong ol kwestin ya wetem yu.

1. Yumi nidim wan gavman nomo long fulwol. ?From wanem?

Ol trabol we oli stap kasem ol man, oli kamaot long olgeta ples blong wol. Long sam kantri, bighaf blong ol man oli pua mo oli stap aninit long han blong ol man we oli mekem i strong tumas long olgeta. Long sam narafala kantri, ol man oli gat plante samting, i bitim wanem we oli nidim. Sipos wan gavman nomo i rulum fulwol, hem i save seremaot ol samting long olgeta man long wol long fasin we i stret.—Ridim Prija 4:1; 8:9.

2. ?Yumi save trastem hu blong rulum wol?

Plante man oli no wantem we wan man nomo i rulum wol, from we i no gat wan man no wan woman we i save rul long gudfala fasin. I no gat wan man we olgeta man bambae oli laekem hem. Mo tu, taem ol man oli kasem paoa, oli save kam nogud. Ol man oli fraet tumas se man we i rul bambae i kam nogud mo i kam raf.—Ridim Ol Proveb 29:2; Jeremaea 10:23.

Jehova God i jusum Pikinini blong hem Jisas, blong i rul long olgeta man gogo i no save finis. (Luk 1:32, 33) Bifo, Jisas i stap long wol ya. Taswe, hem i save gud ol trabol we i kasem ol man. Taem hem i stap long wol, hem i mekem sikman i gud bakegen, hem i tijim ol man we tingting blong olgeta i stap daon, mo hem i spenem taem wetem ol pikinini. (Mak 1:40-42; 6:34; 10:13-16) From samting ya, Jisas i save rul long fasin we i nambawan.—Ridim Jon 1:14.

 3. ?Wan gavman nomo i naf blong rulum fulwol?

God i putumap Pikinini blong hem long heven blong i rulum wol. (Daniel 7:13, 14) Taem wan man i rul long wan kantri, hem i stap long wan taon nomo, be hem i rulum olgeta ples long kantri ya. Long sem fasin, Jisas i stap long heven, be hem i rulum olgeta ples long wol.—Ridim Matiu 8:5-9, 13.

?Olsem wanem? ?Olgeta man bambae oli wantem we Jisas i rul long olgeta? Nogat. Ol man we oli laekem stret fasin, olgeta nomo bambae oli wantem. Bambae Jehova i waepemaot ol man we oli no wantem se Jisas i rul long olgeta long fasin we i stret.—Ridim Ol Sam 37:9-11.

4. ?Gavman we i rulum fulwol bambae i mekem wanem?

Jisas i olsem wan man blong lukaot long sipsip, we i hivimap ol sipsip blong hem oli kam wanples. Hem i stap hivimap ol man blong olgeta kantri we tingting blong olgeta i stap daon, oli kam wan kampani nomo. Mo hem i stap tijim olgeta blong oli lavlavem olgeta, olsem God i wantem. (Jon 10:16; 13:34) Nao ol man ya oli wantem tumas blong folem Jisas mo obei long hem olsem king. (Ol Sam 72:8; Matiu 4:19, 20) Long olgeta ples long wol, ol man we oli stap aninit long rul blong Jisas, oli wok wetem wan tingting nomo blong talemaot se Jisas i King.—Ridim Revelesen 11:15.

I no longtaem, Jisas bambae i soemaot paoa blong hem, taem hem i spolem ol gavman we oli gat kruked fasin. Hem i jusumaot finis sam gudfala man blong hem, blong oli rul wetem hem long heven. (Daniel 2:44; 7:27) Kingdom blong Jisas bambae i mekem se save blong Jehova i kam fulap long wol. Kingdom ya bambae i mekem fulwol i kam paradaes bakegen, olsem fastaem.—Ridim Aesea 11:3, 9; Matiu 19:28.

Sipos yu wantem save moa, yu save ridim japta 8 blong buk ya ?Wanem Samting We Baebol i Rili Tijim? we ol Witnes blong Jehova oli wokem.