Mi mi bon long Texcoco, wan smol taon long Meksiko. Long taem ya, plante rod blong taon ya i nogat kolta mo oli doti. Ol man we oli stap long ol vilej klosap long taon ya, oltaem oli yusum ol dongki blong karem olting blong olgeta i kam long taon blong salem. Mifala naen pikinini long famle mo mi mi namba seven. Famle blong mi i no rij. Papa blong mi i stap somap ol olfala sandel, blong i save winim mane blong lukaot long mifala. Be hem i ded taem mi mi gat seven yia nomo. Taswe stat long taem ya, mama nomo i wok blong lukaot long mifala.

Bubu man blong mi i stap plei violin mo hem i stap lidim wan grup blong ol man we oli stap plei miusik. Olgeta ya oli ol spesel man blong plei long ol miusik blong jos. Klosap evriwan long famle blong mi oli save plei long wan instramen blong miusik. Mama blong mi i joen long wan grup we oli stap singsing long jos, mo angkel blong mi, hem i wan man blong singsing mo i plei piano tu. Mifala i strong memba blong Katolik. Long jos mi mi givhan long pris, taswe mi wantem kam wan pris blong Katolik. Be long semtaem, mi laekem blong wajem ol muvi blong karate. Taem mi stap gohed blong wajem ol muvi ya, sloslo fasin blong mi i stap kam raf.

Nating se i olsem, mi mi wantem tumas blong kam wan pris blong Katolik. Ale, long taon blong Puebla, mi go long wan skul we i trenem man blong i kam pris. Be long las yia blong mi long skul, wan samting i hapen long mi we i mekem se tingting we mi gat fastaem long Katolik Jos, i jenis. Wan yangfala sista blong Katolik Jos i pulum mi blong slip wetem hem. Nating se mi blokem fasin ya, samting we hem i mekem i pulum mi blong wantem mared. Antap long samting we sista ya i mekem, mi faenemaot tu se i gat sam pris we oli gat fasin tu fes. From samting ya, mi no moa wantem kam wan pris.

 Ale mi go long wan bigfala skul blong lanem miusik long taon blong Meksiko. Afta we mi finisim skul mo kasem setifiket blong mi, mi mared mo i no longtaem biaen, mi mo woman blong mi, mitufala i gat fo pikinini. Mi mi singsing long jos, blong winim mane blong lukaot long famle blong mi.

Smoltaem afta we mitufala i mared, mitufala i stat blong gat sam trabol. Mitufala i stap raorao oltaem from we mitufala i stap jalus long mitufala. Fastaem mitufala i raorao nomo, be biaen mitufala i stat blong faet. Ale long namba totin yia blong mared blong mitufala, mitufala i seraot mo smoltaem biaen, mitufala i divos.

Faswan taem we mi mitim ol Witnes blong Jehova, mi no seraot yet long woman blong mi. I gat tu Witnes we tufala i kam noknok long doa blong mifala, mo tufala i wantem tokbaot Baebol wetem mi. Mi mi ting se mi gat moa save long saed blong ol skul, ale mi agri blong storian wetem tufala, be blong soemaot nomo se tufala i rong. Mi askem ol had kwestin long tufala, from mi ting se i no gat ansa blong hem. Be mi sapraes blong luk se tufala i givim ol ansa we i stret mo i kamaot long Baebol. Sloslo mi luksave se save blong mi long Baebol i smol nomo. Sore tumas, woman blong mi i no glad nating long ol Witnes, mo mi tu mi bisi tumas, mekem se oli stop blong kam long haos blong mi.

Faef yia afta, mi mitim ol Witnes blong Jehova bakegen. Long taem ya mi stap wetem wan narafala woman, nem blong hem Elvira. Elvira i no agensem ol Witnes, taswe i isi moa blong mi stadi Baebol evri wik. Nating se i olsem, i tekem plante yia blong mi lego olfala laef blong mi.

Mi luksave se blong mekem wosip long Jehova long olgeta hat blong mi, mi mas mekem sam bigfala jenis long laef blong mi. Fastaem mi mas stopem wok blong mi blong singsing long jos. Hemia i min se mi mas lukaot wan narafala wok. (Revelesen 18:4) Mo tu, mi mas stretem mared blong mi wetem Elvira.

Mi faenem se i had blong mi bos long kros blong mi. Be i gat tu vas blong Baebol we oli givhan long mi. Faswan hemia Ol Sam 11:5, we i talem se Jehova i no laekem nating fasin blong faet. Mo nambatu hemia 1 Pita 3:7, we i soemaot se sipos mi wantem we Jehova i harem ol prea blong mi, mi mas ona long woman blong mi. Taem mi tingting dip long ol vas ya, mo mi prea long Jehova blong i givhan long mi, sloslo mi naf blong holem gudfala tingting we i save blokem mi blong mi no kros kwik.

Naoia mi gat wan famle we i hapi. Mi traehad blong mekem se bilif blong niufala famle blong mi i stap strong oltaem. Mo tu mi traehad blong mekem se mi joen gud wetem ol boe we mi gat wetem fas woman blong mi.

Taem mi pikinini, mi wantem kam wan pris, mo mi wantem givhan long ol man. Be naoia mi harem se laef blong mi i no blong nating. Mi mi mekem wok ya blong tijim miusik, olsem nao mi save lukaot long famle blong mi. !Mi mi glad tumas se Jehova i gat longfala tingting long mi, nao i givim janis long mi blong mi jenisim ol fasin blong mi, mo mi kam wan gudfala man!