Wol blong tede i fulap long ol rabis pija blong man wetem woman (pornography). * Yumi luk samting ya long ol pablisiti, ol stael blong klos, ol muvi, ol miusik, ol magasin, long televisin, ol video gem, ol samting olsem mobaelfon, Intenet, mo kompiuta. Mo ol man oli save go long Intenet blong serem ol rabis foto blong man wetem woman. Naoia ol man oli tingbaot fasin ya blong lukluk ol rabis pija olsem wan samting we i gud nomo. Long plante moa ples, ol man oli stap lukluk ol rabis pija, i bitim bifo.—Yu lukluk bokis ya,  “Sam Ripot.”

Ol rabis pija blong man wetem woman oli stap jenis tu. Wan tija, Gail Dines i talem se: “Naoia ol rabis pija ya oli stap kam moa nogud, from we oli soemaot klia evri samting we man mo woman i mekem, mo long tingting blong ol man, oli ting se fasin ya i gud nomo.”

?Wanem tingting blong yu long fasin ya blong lukluk ol rabis pija? ?Yu ting se hem i wan samting we man i mekem blong kilim taem nomo, no yu ting se hem olsem wan posen we i save spolem yu? Jisas i talem se: “Gudfala tri, hem i save karem gudfala frut nomo, mo rabis tri, hem i save karem rabis frut nomo.” (Matiu 7:17) ?Wanem frut bambae i kamaot sipos wan man i stap lukluk ol rabis pija? Blong faenem ansa blong kwestin ya, i gud yumi tingbaot ol kwestin we oli kam biaen.

?OL MAN BLONG HAE SAVE OLI TALEM WANEM?: Man we i lukluk ol rabis pija, hem i kam slef blong ol pija ya. Sam man blong stadi mo sam dokta oli talem se ol rabis pija oli sem mak long drag ya koken.

Brian * we i lukluk oltaem ol rabis pija long Intenet, i talem se: “I nogat wan samting i save stopem mi. Mi harem olsem se mi stap drim. Mi mi seksek, mo hed blong mi i soa we i soa. Mi mi traehad blong stop, be plante yia biaen mi mi stap gohed yet blong lukluk ol rabis pija ya.”

Plante taem ol man we oli laekem blong lukluk ol rabis pija, oli stap haedem fasin blong olgeta. Oli haed blong lukluk ol pija ya, mo oli stap giaman blong haedem fasin blong olgeta. Yumi no sapraes se ol man olsem oli harem nogud from we oli nogat fren, oli sem, oli wari, tingting blong olgeta i foldaon, mo oli kros. Mo samtaem, oli save gat tingting ya blong kilim olgeta wan i ded. Serge we i stap daonlodem ol rabis pija long mobaelfon blong hem evri dei, i talem se: “Mi mi no moa tingbaot narafala samting, mi stap tingbaot ol rabis pija ya nomo, mo mi harem nogud we mi harem nogud. Mi harem se mi mi nating nomo, tingting blong mi i stikim mi, mi no gat fren, mo mi harem se mi fas long wan trap. Mi sem we mi sem mo mi fraet blong askem long narafala blong i givhan long mi.”

Nating se wan man i lukluk ol pija ya smoltaem nomo, be oli save spolem hem. Dokta Judith Reisman i stap stadi long samting we ol rabis pija oli mekem long man. Hem i talem se: “Taem man i lukluk ol rabis pija, bren blong hem i jenis wantaem nao i mekem se ol pija ya oli fas strong long tingting blong hem, ale i hadwok blong hem i blong fogetem ol pija ya. Mo samtaem ol pija ya oli stap olwe long tingting blong hem.” Susan we i gat 19 yia, i stap lukluk ol rabis pija long Intenet. Hem i talem se: “Ol rabis pija ya oli fas strong long tingting blong mi. Samtaem, mi mi no tingbaot ol pija ya be oli kamaot wantaem nomo long tingting blong mi. Mi harem olsem se bambae mi neva save ravemaot olgeta long bren blong mi.”

STAMBA POEN: Ol man we oli lukluk ol rabis pija blong man wetem woman, oli kam slef blong ol pija ya mo bambae oli spolem gud olgeta—2 Pita 2:19.

?OL MAN BLONG HAE SAVE OLI TALEM WANEM?: “Fasin ya blong lukluk ol rabis pija i save spolem mared blong man mo woman, mo i save spolem ol famle tu.”—The Porn Trap, we Wendy mo Larry Maltz, tufala i raetem.

Insaed long mared, sipos man no woman i stap lukluk ol rabis pija, hemia bambae i mekem se:

• Tufala i no moa trastem tufala, tufala i no moa fren gud mo tufala i no moa lavlavem tufala.—Ol Proveb 2:12-17.

• Hem i tingbaot hem nomo, i no wantem fren gud wetem ol narafala, mo i no moa harem gud long man no woman blong hem.—Efesas 5:28, 29.

• Hem i stap drim nomo long ol rabis pija ya mo hem i wantem tumas blong mekem ol nogud fasin ya.—2 Pita 2:14.

• Hem i save fosem man no woman blong hem, blong i mekem samting nogud ya we hem i stap lukluk long ol rabis pija ya.—Efesas 5:3, 4.

• Oli wekemap ol filing blong hem, ale hem i save go slip wetem narafala man no woman.—Matiu 5:28.

Baebol i talem long ol man mo woman we oli mared se oli ‘no mas brekem promes ya we oli mekem wetem ol woman blong olgeta.’ (Malakae 2:16) Taem wan long tufala  i go slip wetem wan narafala man no woman, hemia i spolem gud mared blong tufala. Tufala i save seraot mo biaen tufala i divos. Long taem olsem, ol pikinini bambae oli harem nogud tumas.

Ol rabis pija oli save spolem gud ol pikinini tu. Brian we yumi tokbaot hem finis i talem se: “Taem mi mi gat ten yia, mi faenem ol buk blong papa blong mi we oli soemaot ol rabis pija blong man wetem woman. Ale, mi stap haed blong lukluk ol buk ya. Mi no kasem save from wanem mi laekem blong lukluk ol pija ya. Stat long taem ya, hem i kam wan fasin we mi stap mekem oltaem. Mo kam kasem taem we mi bigwan, mi gohed yet blong lukluk ol rabis pija ya.” Ol man blong stadi oli faenemaot se, ol rabis pija oli save pulum tingting blong wan yangfala blong i slip olbaot, blong i fosem narafala blong slip wetem hem, mo i save mekem tingting mo filing blong hem i olbaot.

STAMBA POEN: Ol rabis pija oli olsem wan posen we i spolem fasin blong yu blong fren gud wetem ol narafala. Mo i save mekem yu yu harem nogud bitim mak.—Ol Proveb 6:27.

BAEBOL I TALEM SE: “Yufala i mas kilimaot ol fasin ya blong yufala, we oli blong wol ya nomo. Hemia ol fasin olsem. Ol man oli stap mekem nogud wetem woman, ol woman oli stap mekem nogud wetem man, mo olgeta oli stap mekem ol samting blong sem. Ol man oli stap wantem woman tumas, ol woman oli stap wantem man tumas, mo olgeta oli stap wantem tumas ol sin. Mo olgeta oli stap wantem evri samting, be fasin ya, we man i stap wantem evri samting, hemia i olsem nomo we hem i stap mekem wosip long ol narafala god.”—Kolosi 3:5.

I klia nomo we Jehova * i no laekem nating ol man we oli stap lukluk ol rabis pija. God i no sem blong tokbaot fasin blong man i slip wetem woman. Hem nao i wokem tabu haf blong bodi blong yumi, from we hem i wantem se man mo woman we tufala i mared, tufala i harem gud blong slip tugeta. Mo hemia i pulum tufala blong tufala i laeklaekem tufala mo blong tufala i save gat ol pikinini.—Jemes 1:17.

?From wanem Jehova i no laekem nating we man i lukluk ol rabis pija? Yu traem tingbaot sam long ol risen ya.

• Hem i save se fasin ya blong lukluk ol rabis pija i save spolem gud laef blong man.—Efesas 4:17-19.

• Hem i lavem yumi mo hem i wantem protektem yumi long ol samting we oli save spolem yumi.—Aesea 48:17, 18.

• Jehova i wantem lukaot gud long ol mared mo i wantem lukaot gud long ol famle.—Matiu 19:4-6.

• Hem i wantem we tingting blong yumi i klin mo yumi respektem raet blong narafala.—1 Tesalonaeka 4:3-6.

• Hem i wantem we yumi respektem tabu haf ya blong bodi blong yumi mo yumi yusum long fasin we i stret.—Hibrus 13:4.

• Jehova i save se ol rabis pija oli save pulum man blong i tingbaot samting we hem nomo i wantem. Mo oli pulum tingting blong man i gowe long prapa fasin blong man blong slip wetem woman. Ol rabis pija ya oli soemaot tingting blong Setan nomo.—Jenesis 6:2; Jud 6, 7.

STAMBA POEN: Fasin ya blong lukluk ol rabis pija, i save mekem se wan man i no moa fren gud wetem God.—Rom 1:24.

Be Jehova i sore long olgeta we oli wantem tumas blong sakemaot fasin ya blong lukluk ol rabis pija. Baebol i talem se: “Hae God, hem i gat sore, mo oltaem hem i glad tumas blong mekem i gud long man. Hem i no save kros kwik, fasin blong hem we oltaem i stap lavem man tumas, hem i gud we i gud, i bitim mak. Hem i savegud we hem i mekem yumi long graon. Oltaem hem i stap tingbaot we yumi kamaot long asis nomo.” (Ol Sam 103:8, 14) Hem i stap singaot olgeta we tingting blong olgeta i stap daon blong oli kam long hem. ‘Nao hem bambae i sore long olgeta, mo long gladhat blong hem, hem bambae i givhan long olgeta, stret long taem we trabol i kasem olgeta.’—Hibrus 4:16; Yu lukluk bokis ya,  “Blokem Tingting Ya Blong Wantem Lukluk Ol Rabis Pija.”

Plante man oli letem God i givhan long olgeta. ?Olsem wanem? ?God i save givhan gud long man? Yu traem luk olsem wanem Baebol i tokbaot sam man we oli winim ol fasin we i nogud. Hem i taem se: ‘God i wasemaot ol sin blong yufala finis blong mekem yufala i klin, yufala i tabu, yufala i man blong hem, mo hem i mekem yufala i stret man finis long fes blong hem.’ (1 Korin 6:11) Yumi wanwan i save talem olsem Aesea we i talem se: ‘God nao i stap givim paoa long mi, mo i stap mekem mi mi strong.’—Aesea 12:2.

Susan we yumi tokbaot hem finis, i sakemaot rabis fasin ya we oltaem hem i stap lukluk ol rabis pija. Hem i talem se: “Jehova nomo i naf blong givhan long yu blong yu sakemaot tingting ya blong wantem lukluk ol rabis pija. Sipos yu askem long hem blong i givhan mo i lidim yu, bambae yu harem se tingting blong yu i klin long fes blong hem. Bambae hem i no save mekem yu yu harem nogud.”