STORI BLONG FRAN PEJ
?Hu Ya Ol Witnes Blong Jehova?
Becky we i blong California, Amerika, i talem se: “Mi mi save Mike plante yia finis. Hem i wan Witnes blong Jehova. Be mi no kasem save long skul blong hem. ?Hu ya Jehova? ?From wanem ol Witnes oli no mekem lafet olsem ol narafala? Ating Mike i stap long wan krangke skul ya.”
Zenon we i blong Ontario, Kanada, i talem se: “Taem ol man long narasaed yad oli stat blong stadi Baebol wetem ol Witnes blong Jehova, mi mi stap tingting se: ‘!Nem ya ol Witnes blong Jehova i narakaen! ?Nem ya i minim wanem?’”
Kent we i blong Washington, Amerika, i talem se: “Mi mo woman blong mi, mitufala i no stap go long jos. Taswe mitufala i ting se ol Witnes blong Jehova oli kam blong mekem mitufala i sem. Mo mitufala i ting se sipos ol bigfala jos oli no givim save we mitufala i wantem, wan krangke skul olsem ol Witnes blong Jehova, bambae i no save givim tu.”
Cecilie we i blong Esbjerg, Denmak, i talem se: “Blong talem stret, mi no save se oli hu, mo mi no save bilif blong olgeta.”
Ating yu luk finis ol Witnes blong Jehova taem oli stap prij long ol haos wanwan mo long pablik ples. Oli stap givimaot ol buk we oli tokbaot Baebol, mo oli stap askem long ol man sipos oli wantem stadi Baebol wetem olgeta. Maet yu bin karem magasin ya long wan long olgeta. Be ating yu wantem save yet se ol Witnes blong Jehova oli hu. Maet tingting blong yu i sem mak long olgeta we yumi tokbaot antap.
Ating yu gat sam kwestin olsem: ?Wanem bilif blong ol Witnes blong Jehova? ?Oli kasem mane wea blong sapotem wok blong prij, mo ol haos wosip blong olgeta? ?From wanem oli storian wetem ol man long haos blong olgeta mo long ol pablik ples? Sipos yu gat kwestin olsem, ?yu save faenem ansa wea?
Cecilie, we yumi tokbaot hem finis, i talem se: “Mi mi ridim plante toktok long Intenet long saed blong ol Witnes blong Jehova. Mi harem ol toktok olbaot, mo mi lesin long plante man we oli toktok nogud long ol Witnes. From samting ya, mi mi gat nogud tingting long olgeta.” Afta, Cecilie i toktok wetem wan Witnes blong Jehova, mo hem i harem gud long ansa we Witnes ya i givim long ol kwestin blong hem.
?Olsem wanem? ?Yu yu wantem kasem ol stret ansa blong ol kwestin blong yu long saed blong ol Witnes blong Jehova? I gud yu toktok stret long ol Witnes blong Jehova we oli printim magasin ya, from we olgeta oli save gud. (Ol Proveb 14:15) Mifala i save se ol haf we oli kam biaen bambae oli givhan long yu blong yu kasem save se mifala i hu, wanem bilif blong mifala, mo wok we mifala i mekem.
