From we i gat tumas denja, plante papa mo mama oli no letem ol pikinini blong olgeta oli yusum sosol media. Be sipos yu letem tineja blong yu i yusum sosol media, ?olsem wanem yu save halpem hem blong i stap sef mo yusum gud?

Long atikol ya

•  Ol samting we oli impoten moa

•  Filing blong tineja

•  Fasin blong tineja blong yusum Intenet

•  Sam samting blong storian long olgeta

 Samting we yu mas save: I gud blong halpem tineja blong i no spenem tumas taem long sosol media, from we hem i save kam slef blong samting ya.

 Rul blong Baebol: “Faenemaot ol samting we oli moa impoten.”—Filipae 1:10.

 Blong tingbaot: ?Tineja blong yu i stap yusum sosol media taem hem i sud slip, mekem skulwok, o spenem taem wetem famle? Ol man blong mekem risej oli talem se ol tineja oli nidim blong slip naen aoa evri naet. Be olgeta we oli spenem plante aoa long sosol media, maet oli slip seven aoa nomo.

 Samting we yu save mekem: Tokbaot ol samting we oli impoten moa wetem tineja blong yu, mo from wanem i waes blong no spenem tumas taem long sosol media. Putum sam rul we oli no strong tumas, olsem, no letem tineja i yusum ol divaes long rum blong slip long naet. Yu wantem halpem hem blong i bos long tingting blong hem, hemia wan fasin we bambae i givhan long hem long ol yia biaen.—1 Korin 9:25.

 Samting we yu mas save: Maet sam yangfala oli jenisim smol, ol pija we oli putum long sosol media, blong mekem oli naes moa, mo blong soemaot se oli stap gat gudtaem. Taem yangfala blong yu i luk ol pija ya, maet hem i harem se i stap hem wan, i wari, o tingting blong hem i foldaon.

 Rul blong Baebol: “Yufala i mas sakemaot . . . jalus.”—1 Pita 2:1.

 Blong tingbaot: ?Tineja blong yu i ting se hem i no naes, taem hem i komperem hem wetem ol fren blong hem long sosol media? ?Hem i ting se oli gat gudtaem long laef blong olgeta, be laef blong hem i boring?

 Samting we yu save mekem: Storian wetem yangfala blong yu long saed blong denja blong komperem hem wan wetem ol nara yangfala. Maet ol gel oli wari moa i bitim ol boe, from we ol gel oli wantem blong gat ol fren mo blong luk naes. Maet yu talem long tineja se sam samtaem i gud hem i lego sosol media. Wan yangfala we nem blong Jacob, i talem se: “Mi mi dilitim wan app long sosol media blong smoltaem. Hemia i givhan long mi blong mi tingbaot wanem samting i moa impoten, mo blong stretem tingting we mi gat long mi wan mo long ol narafala.”

 Samting we yu mas save: Samfala oli talem se taem yu yusum sosol media, i olsem we yu laef long medel blong wan bigfala hip blong man. Taswe i mas gat samfala we oli kasem rong tingting o oli rao long ol narafala.

 Rul blong Baebol: “Yufala i mas tekemaot olgeta nogud filing long hat blong yufala, wetem fasin blong kros, boel long kros, singaot bigwan, mo ol rabis tok . . . yufala i mas kaen long yufala.”—Efesas 4:31, 32.

 Blong tingbaot: ?Tineja blong yu i stap gosip wetem ol yangfala long sosol media, hem i rao wetem samfala, o i talem ol tok we i no kaen?

 Samting we yu save mekem: Tijim tineja blong yu blong i gat respek mo gudfala fasin long Intenet. Buk ya Digital Kids i talem se: “Wok blong ol papa mo mama i blong givim klia tijing long ol pikinini, se oli neva mas yusum ol tok we i strong tumas mo i spolem ol narafala, nating se oli toktok stret long ol man o oli yusum sosol media.”

 Tingbaot se yumi no nidim sosol media blong stap laef, mo se plante perens oli no letem ol tineja blong olgeta oli yusum sosol media. Sipos yu letem tineja blong yu i yusum, yu mas meksua se hem i naf blong no spenem tumas taem long sosol media, jusum ol gudfala fren, mo no joen long eni samting we i no stret.