?God i Gat Hamas Nem?

PLEI

Ansa we Baebol i givim

God i gat wan prapa nem blong hem nomo. Long Hibru, oli raetem se יהוה mo plante taem oli tanem i kam “Jehovah” long Inglis. a God i talem tru long profet blong hem Aesea, se: “Mi mi Jehova. Hemia nem blong mi.” (Aesea 42:8) Nem ya i kamaot samwe 7,000 taem long ol olfala hanraet blong Baebol, hemia i plante taem moa i bitim tok ya God, o eni nem blong ol narafala man. b

?I gat sam narafala nem blong Jehova?

Baebol i tokbaot se God i gat wan prapa nem blong hem nomo, be nating se i olsem, hem i yusum sam toktok mo plante taetel blong tokbaot hem. Long lis we i stap, i gat sam long ol taetel ya mo toktok we i soemaot sam long ol fasin blong Jehova.

Taetel	Refrens	Mining
Allah	(No gat)	Long lanwis Arab, tok ya “Allah” i no wan prapa nem, be hem i wan taetel we i minim “God.” Ol Baebol long lanwis Arab mo ol narafala lanwis, oli yusum “Allah” we i sem mak long “God.”
God We i Gat Olgeta Paoa	Jenesis 17:1	Hem i gat bigfala paoa. Hibru tok ya ʼEl Shad·daiʹ, “God We i Gat Olgeta Paoa,” i kamaot seven taem long Baebol.
Alfa mo Omega	Revelesen 1:8; 21:6; 22:13	‘Stat mo en,’ o “faswan mo laswan,” i min se i no gat wan God We i Gat Olgeta Paoa bifo long Jehova, mo bambae i no gat afta long hem. (Aesea 43:10) Alfa mo omega oli ol faswan mo laswan leta long Grik alfabet.
Olfala Ya Blong Bifo Olgeta	Daniel 7:9, 13, 22	Hem i no gat stat. Hem i stap longlongtaem finis i kam, bifo we man o eni samting i stat.—Ol Sam 90:2.
Krieta (God Ya We i Wokem Olgeta Samting)	Aesea 40:28	Hem i wokem olgeta samting we i stap.
Papa	Matiu 6:9	Hem i givim laef.
God	Jenesis 1:1	Wan samting we man i wosipim; Wan we i strong. Hibru tok ya ʼElo·himʹ i plural, hemia i soem se Jehova i hae tumas, i stret blong kasem ona, mo i gat glori.
God blong ol god	Dutronome 10:17	God ya we i hae olgeta, hem i defren long “ol god we oli no save mekem wan gudfala samting,” we samfala oli stap wosipim.—Aesea 2:8.
Bigfala Tija	Aesea 30:20, 21	Hem i givim tijing mo advaes we i givhan long man.—Aesea 48:17, 18.
Bigfala Man We i Mekem Ol Samting	Ol Sam 149:2	Hem i mekem olgeta samting nao oli stap.—Revelesen 4:11.
Hapi God	1 Timoti 1:11	Hem i glad mo i hapi.—Ol Sam 104:31.
Man blong harem ol prea	Ol Sam 65:2	Hem i lesin long evri prea we ol man we oli bilif, oli mekem long hem.
Mi Stap We Mi Stap	Eksodas 3:14, King James Version	Hem i kam eni samting we i nidim, blong mekem tingting blong hem i kamtru. Oli transletem tok ya tu i kam “Bambae mi jenis i kam olsem samting we mi wantem.” O “Bambae Mi Kam Samting We Mi Jusum.” (The Emphasised Bible, we J. B. Rotherham i wokem; Niu Wol Translesen) Toktok ya i givhan blong eksplenem nem ya Jehova we i kamaot long nekis vas.—Eksodas 3:15.
Jalus	Eksodas 34:14, King James Version	Hem i no wantem nating se man i go wosipim narafala god. Oli transletem tok ya tu se “no laekem nating narafala god” mo ‘wantem se ol man oli no go mekem wosip long ol narafala god.’—God’s Word Bible; Niu Wol Translesen.
King oltaem nomo gogo i no save finis	Revelesen 15:3	Rul blong hem i no gat stat mo en.
Masta	Ol Sam 135:5	Ona o masta; Long Hibru ʼA·dhohnʹ mo ʼAdho·nimʹ.
Hae God	Ol Sam 47:2	Hem i gat posisen we i hae olgeta.
Man Ya We i Tabu We i Tabu	Ol Proveb 9:10	Hem i tabu (fasin blong hem i klin we i klin) moa i bitim ol narafala samting.
Man Blong Wokem Graonpot	Aesea 64:8	Hem i gat raet blong bos long ol man wanwan mo ol nesen, stret olsem we wan man blong wokem graonpot i gat raet blong bos long klei.—Rom 9:20, 21.
Man We i Pembak	Aesea 41:14; King James Version	Hem i yusum ransom sakrefaes blong Jisas Kraes, blong pembak ol man long sin mo ded.—Jon 3:16.
Bigfala ston	Ol Sam 18:2, 46	Wan sefples blong haed mo wan ples blong stap sef.
Sevia	Aesea 45:21	Tekemaot ol man long denja mo long ded.
Man Blong Lukaot Long Sipsip	Ol Sam 23:1	Hem i kea long ol man we oli wosipim hem.
Hae Masta	Jenesis 15:2	Hem i gat olgeta otoriti; Long Hibru, ʼAdho·naiʹ.
Man We i Hae Olgeta	Daniel 7:18, 27	Hem i king we i hae olgeta.

Nem blong ol ples long Hibru Haf Blong Baebol

Sam nem blong ol ples long Baebol, oli gat prapa nem blong God long olgeta, be oli no ol narafala nem blong God.

Nem blong ples	Refrens	Mining
Jehova-jaire	Jenesis 22:13, 14	“Jehova Bambae i Givim.”
Jehova-nisae	Eksodas 17:15	“Jehova i Saen Pos Blong Mi,” o “Saen blong mi.” (Today’s New International Version) Jehova i wan God we ol man blong hem oli save ron i go long hem blong kasem proteksen mo help.—Eksodas 17:13-16.
Jehova-salom	Jajes 6:23, 24	“Jehova Hem i Pis.”

Ol risen blong save mo yusum nem blong God

God i mas filim se prapa nem blong hem Jehova i impoten, from we hem i wantem se i stap plante taosen taem long Baebol.—Malakae 1:11.
Oltaem Jisas we i Pikinini blong God, i makem se nem blong God i impoten. Eksampol, hem i prea long Jehova se: “Plis yu mekem we nem blong yu i tabu.”—Matiu 6:9; Jon 17:6.
Olgeta we oli save mo yusum nem blong God oli tekem faswan step blong kam fren blong Jehova. (Ol Sam 9:10; Malakae 3:16) Gudfala frensip olsem i mekem se God i save mekem i gud long olgeta, olsem we hem i promes se: “From we hem i lavem mi tumas, bambae mi sevem hem. Bambae mi protektem hem, from we hem i save nem blong mi.”—Ol Sam 91:14.
Baebol i talem se: “I gat plante samting long heven no long wol we ol man oli singaot olgeta se god, mo i tru se i gat plante ‘god’ mo plante ‘masta.’” (1 Korin 8:5, 6) Be yet, hem i makem klia se i gat wan tru God nomo, we nem blong hem Jehova.—Ol Sam 83:18.

a Sam Hibru skola oli laekem moa “Yahweh.”

b Wan sot nem blong God, hemia “Jah,” i kamaot samwe 50 taem long Baebol, wetem tok ya “Hallelujah,” o “Alleluia,” we i min se “Presem Jah.”—Revelesen 19:1; American Standard Version; King James Version.