Nogat. Baebol i no tijim se wol i flat. a I tru se Baebol i no wan buk blong sayens, be evri samting long Baebol i laenap wetem save blong ol saentis. Ol tok blong Baebol “i tru mo i stret, mo bambae oli stap oltaem nomo, gogo i no save finis.”—Ol Sam 111:8.

•  ?Baebol i minim wanem taem i tokbaot “ol fo kona long wol”?

•  ?Setan i yusum wanem blong traem Jisas?

 Ol tok we Baebol i talem olsem “ol fo kona long wol” mo “stat long narasaed wol i go kasem narasaed,” i no min se wol i skwea o i flat olsem we i gat ol en blong hem. (Aesea 11:12; Job 37:3) Tok ya i wantem minim olgeta ples long wol. Baebol i yusum ol tok ya not, saot, is, mo wes, long sem fasin.—Luk 13:29.

 Hibru tok ya we oli tanem i kam “ol kona” o en blong wol, i olsem wan pijatok we i kamaot long tok ya “ol wing.” Wan buk (The International Standard Bible Encyclopedia) i talem se: “From we pijin i yusum wing blong hem blong kavremap ol pikinini blong hem, oli yusum [Hibru tok ya] blong minim en blong samting we i kavremap wan bigfala ples.” Sem buk ya i talem se long Job 37:3 mo Aesea 11:12, “tok ya i minim mak blong solwota, mak blong graon, o mak blong ol kantri blong wol.” b

 Taem Setan i traem Jisas, hem i “tekem Jisas i go antap long wan hil we i hae we i hae, mo i soem long hem olgeta kantri long wol, wetem ol flas samting we oli gat.” (Matiu 4:8) Samfala oli ting se ol tok ya i soemaot se i gat wan ples long wol ya, we man i save stanap long hem blong luk evri ples long wol. Be i luk olsem se “hil we i hae we i hae” long vas ya i no wan prapa hil. Tingbaot from wanem i stret blong talem olsem.

•   I no gat wan hil long wol we man i save stanap long hem blong lukluk olgeta kantri long wol.

•   Setan i no soemaot ol kantri nomo be “ol flas samting we oli gat” tu. Man i no save luk ol samting ya sipos i stap longwe tumas. Taswe i luk olsem se Setan i soemaot ol samting ya long Jisas long wan vison. Maet hem i mekem olsem wan man we i yusum skrin blong soemaot pija blong ol defdefren ples long wol.

•   Luk 4:5 i talem se Setan i soemaot “olgeta kantri long wol ya wantaem.” Ae blong man i no naf blong luk olgeta kantri blong wol wantaem nomo. Hemia i soemaot se Jisas i no luk ol samting ya long prapa ae blong hem, be Setan i yusum wan narafala rod.