1.   ?Weswan long ol poen ya i diskraebem filing we yu gat?

   •  Mi mi neva laekem bodi blong mi.

   •  Wanwan taem mi laekem bodi blong mi.

   •  Oltaem mi laekem bodi blong mi.

2.   ?Wanem nao yu laekem blong jenisim long bodi blong yu?

   •  Longfala blong yu

   •  Wet blong yu

   •  Sep blong bodi blong yu

   •  Hea blong yu

   •  Kala blong skin blong yu

   •  Saes blong masel blong yu

   •  Narafala

3.   Finisim sentens ya.

    Mi no laekem bodi blong mi . . .

   •  taem mi stanap long skel.

   •  taem mi lukluk mi wan long mira.

   •  taem mi komperem mi wetem ol narafala (ol fren, ol pija long magasin, ol akta).

4.   Finisim sentens ya.

    Mi stap skelem mi wan . . .

   •  evri dei.

   •  evri wik.

   •  wanwan taem nomo.

5.   ?Weswan long ol tok ya i diskraebem gud filing blong yu?

   •  Mi no laekem bodi blong mi. (Eksampol: “Evritaem we mi lukluk long mira, mi luk se mi fatfat nogud mo mi no luk naes. Mi stat blong lego kakae blong mi save lusum wet.”—Serena.)

   •  Mi gat stret tingting long bodi blong mi. (Eksampol: “Oltaem bambae i gat sam samting we yumi no laekem long bodi blong yumi, be yumi mas akseptem nomo. I krangke nomo blong wari from samting we yumi no save jenisim.”—Natanya.)

 Baebol i talem se yumi ‘no mas tinghae long yumi wan bitim mak.’ (Rom 12:3) Taswe i impoten blong yumi lukaot gud long yumi wan, be yumi no mas go bitim mak. Eksampol, yu brasem tut blong yu from yu wantem stap klin.

 ?Be olsem wanem sipos oltaem tingting blong yu i foldaon from bodi blong yu mo i go kasem mak ya we yu wari bitim mak? Sipos i olsem, maet bambae yu stap tingting se . . .

 I gat plante risen. Be hemia sam long olgeta:

•  Ol samting we yumi luk long media. “I gat plante pija we oli pulum tingting blong ol yangfala se oli mas stap bunbun, mo luk naes oltaem. Taswe sipos bodi blong yumi i no olsem hemia we yumi luk long media, bambae yumi harem se yumi nogud.”—Kellie.

•  Ol perens. “Mi makem se sipos wan mama i wari bitim mak from bodi blong hem, plante taem gel blong hem tu bambae i gat sem tingting long saed blong hem wan. Mo hemia i sem mak long saed blong ol papa mo boe blong olgeta.”—Rita.

•  Ting nating long yu wan. “Ol man we oli wari bitim mak from bodi blong olgeta, oltaem oli wantem we narafala i talem gudfala toktok long saed blong bodi blong olgeta. I isi blong man i kam taed blong stap wetem olgeta.”—Jeanne.

 Nating se i olsem, maet bambae yu askem se . . .

 Traem luk samting we sam yangfala oli talem.

 “I no oltaem we yu save jenisim samting we yu no laekem long bodi blong yu, taswe i moa gud blong akseptem samting ya. Sipos yu mekem olsem, ol narafala man bambae oli no makem nating.”—Rori.

 “Mekem bes blong yu blong stap helti. Sipos yu helti, yu sud glad long bodi blong yu. Mo sipos wan man i no glad long yu from bodi blong yu, man ya i no wan fren blong yu.”—Olivia.

 Stamba poen: Mekem bes blong yu blong luk naes. Be yu no mas wari from ol narafala samting. Fasin ya blong wari bitim mak from bodi blong yu, hem i wan denja. (Yu luk “ Stori Blong Julia.”)

 Mo tu, sipos yu gat stret tingting hemia bambae i halpem yu blong gat gudfala tingting long saed blong yu wan, hemia nao samting we wan yangfala woman nem blong hem Erin i lanem. Hem i talem se: “I tru se i gat sam samting we mi no laekem long saed blong bodi blong mi, be mi makem se mi harem nogud moa taem mi tingbaot samting ya. Naoia, mi eksasaes oltaem mo mi kakae gud. Taem mi mekem ol samting ya, mi makem se evri samting i kam gud moa.”

 Sipos yu gat stret tingting long bodi blong yu, bambae yu harem (mo yu luk) se yu naes. Baebol i save givhan. Hem i enkarejem yu blong wokem ol fasin ya:

•  Glad long bodi we yu gat. “I moa gud man i stap glad long ol samting ya we ae blong hem i luk, i bitim we hem i stap go olbaot blong kasem ol samting we hem i wantem. Samting ya tu i blong nating nomo, i olsem we man i stap ronem win nomo.”—Prija 6:9.

•  Gat stret tingting long eksasaes. “Fasin ya blong trenem bodi, i save givhan long man blong smoltaem nomo.”—1 Timoti 4:8.

•  Gat ol gudfala fasin. “Man i lukluk bodi nomo, be Jehova i lukluk samting we i stap long hat.”—1 Samuel 16:7.

 “Fes blong yumi i soemaot tingting we yumi gat long saed blong yumi wan. Sipos man i glad, bambae ol narafala oli luksave mo bambae i isi blong oli kam long hem.”—Sarah.

 “Naes bodi i save pulum man kwiktaem blong i lukluk yu. Be samting we i stap insaed long hat blong yu, mo ol gudfala fasin blong yu hemia nao samting we ol man bambae oli tingbaot yu from.”—Phylicia.

 Yu luk tu Ol Proveb 11:22; Kolosi 3:10, 12; 1 Pita 3:3, 4.