YA EMWA KHIAN ERHUANEGBE
IRUẸMWI 10
Rhiegbe Yọ
Ilele: “Ma keghi wa mu egbe ne ima ya kporhu iyẹn nọ maan ọghe Osanobua ma uwa, uhiẹn, ma na vbe mu egbe ne ima ya ya ẹdagbọn ima ru iyobọ ne uwa, rhunmwuda ne ima na hoẹmwẹ uwa ẹsẹse.”—1 Tẹs 2:8.
Emwi Ne Jesu Ru
1. Ghee VIDIO na, ra u ghi tie Jọn 3:1, 2. Iyeke ọni, u ghi mu avbe inọta na roro:
-
Vbua yayi wẹẹ, ẹre ọ si ẹre ne Nikodimọs na bu e Jesu rre vbe asọn?—Ya ghee Jọn 12:42, 43.
-
Ne Jesu na kporhu ma e Nikodimọs vbe asọn, vbe ọni a ya rhie ẹre ma hẹ wẹẹ, irẹn mu egbe ne irẹn ya ya emwa khian erhuanegbe irẹn?
Vbe Ima Miẹn Ruẹ Vbe Obọ E Jesu?
2. Rhunmwuda ne ima na hoẹmwẹ emwa, ẹre ọ si ẹre ne ima na mu egbe, ne ima ya ru iyobọ ne iran ya khian erhuanegbe Jesu.
Ya Egbe Taa E Jesu
3. Gu ọmwa ne u gu ruẹ e Baibol ruẹ emwi vbe ehe kevbe ẹghẹ nọ gha yẹẹ ọre. A sẹtin miẹn wẹẹ, ọ mwẹ ẹdẹ nọ hoo na ya gha ma irẹn emwi vbe uzọla, ọ sẹtin vbe gha hoo na gu irẹn ruẹ emwi vbe owiẹ ra ota, ra ẹghẹ nọ rhirhi gha khin. U sẹtin vbe roro ẹre deghẹ isiwinna, ra owa, ra ihe ọvbehe ẹre ọ hoo na na gha gu irẹn ruẹ e Baibol. U ghi hia ne u fi emwamwa ruẹ werriẹ, ne u miehe na sẹtin gha gu ẹre ruẹ emwi vbe ehe kevbe ẹghẹ nọ gha yẹẹ ọre.
4. Gha gu ẹre ruẹ emwi vbe ẹghẹ hia. Adeghẹ u rẹnrẹn wẹẹ, u i khian gha rre owa, ghẹ gi ọni mu idobo ye iruẹmwi ọghe uwa. Nọghayayerriọ, mu avbe inọta na roro:
-
U gha sẹtin gu ọmwa nii ruẹ emwi vbe ẹdẹ ọvbehe vbe uzọla nii ra?
-
U gha sẹtin tie ẹre vbe efoni kẹkan ra vbe vidio kọl, ne u gu ẹre ruẹ emwi ra?
5. Na erhunmwu gie Jehova nọ ru iyobọ nuẹn. Rinmwian e Jehova nọ ru iyobọ nuẹn ne egbe ọmwa ne u gu ruẹ e Baibol ghẹ wọọ ruẹ, ọ gha khọnrẹn wẹẹ, ẹ i ruẹ emwi vbe ẹghẹ hia, ra ẹ i rherhe rhie emwi nọ ruẹ ye uyinmwẹ. (Fil 2:13) Ẹ i mwẹ ne ọmwa ne u gu ruẹ e Baibol ghẹ gha mwẹ uyinmwẹ eso nọ maan; rinmwian e Jehova nọ ru iyobọ nuẹn, ne u ya gha bẹghe uyinmwẹ esi nọ mwẹ.
VBE YA GHEE
Itan 3:27; Iwinna 20:35; 2 Kọr 12:15
