Jehova Seerew bɛ hami kosɛbɛ u balimakɛw ni u balimamusow ko la. (1 Piɛrɛ 2:17) An caman hakilinata ni Tannis hakilinata bɛ ye kelen ye, o min ye balimamuso dɔ ye min bɛ bɔ Keniya. A ko: “Balima minnu bɛ diɲɛ fan bɛɛ, a ka di ne ye kosɛbɛ ka olu ka kibaruyaw sɔrɔ.” Tannis ani Jehova Seere miliyɔn caman minnu bɛ diɲɛ fan bɛɛ, olu bɛ mun de kɛ walasa ka kunnafɔniw sɔrɔ balimaw kan? Kabini san 2013, an bɛ se ka u kiburuyaw sɔrɔ jw.org siti kan, kunnafoniw sɔrɔyɔrɔ la.

 Kunnafoniw sɔrɔyɔrɔ la, kibaruyaw bɛ yɛn Jehova Seerew ko la an bɛ se ka da minnu na. Kunnafoni caman bɛ di o yɔrɔ la i n’a fɔ, Bibulu minnu bɛ bɔ kan wɛrɛw la, kasaaratɔw dɛmɛni baara kunnafoniw, sojɔbaaraw kunnafoniw ani ko wɛrɛw minnu nafa ka bon. O yɔrɔ bɛ kunnafoniw di an ma fana balimaw ko la minnu bɛ kaso la u ka dannaya kosɔn. Ko minnu bɛ kɛ an ka waajuli kanpaɲiw sen fɛ ani Hakilijigin seli fana sen fɛ, kunnafoniw bɛ di olu fana kan minnu bɛ dusu don an kɔnɔ. Jɔni de bɛ ɲininiw kɛ o kunnafoniw kan ani u bɛ labɛn cogo jumɛn na?

 Kunnafoniw bɛ sɔrɔ yɔrɔ min na an ka siti kan, service des relations publiques (SRP) (ni o ye foroba kunnafoniw baarada ye), olu de bɛ o kow ɲɛnabɔ. O baarada bɛ Jɛkulu sigiyɔrɔsoba la, wa Ɲɛmɔgɔ kulu ka Komitew ka baarako labɛnbagaw komite de bɛ u ɲɛminɛ. SRP baarada kɔnɔna na, balimakɛ ni balimamuso minnu bɛ yen, olu ka ca ni 100 ye—wa balimaw bɛ o la minnu b’a bɔ u yɛrɛ la ka baara kɛ jɛkuluba ye k’u to u ka so—. O balimaw cɛma, kunnafoni sɛbɛnbagaw bɛ olu la, ɲininikɛlaw bɛ u la ani minnu bɛ jaw dilan ɔrdinatɛri sababu fɛ ani minnu bɛ bayɛlɛmali kɛ kan wɛrɛw la. Balima wɛrɛw fana bɛ yen minnu bɛ kuma ni gofɛrɛnɛman mɔgɔw ye, ni karamɔgɔw ye ani ni kunnafoni dibagaw ye. SRP baarada bɛ dɛmɛ sɔrɔ ka bɔ bureaux des relations publiques (BRP) baarada 80 yɔrɔ olu minnu bɛ tɔn bolofaraw la diɲɛ fan bɛɛ.

 Walasa ka barokun kura dɔ labɛn, SRP baarada mɔgɔw bɛ baara kɛ ni BRP mɔgɔw ye. Ni balimaw y’a ye ko, ko kɛlen dɔ fɔli bɛ diya mɔgɔw ye, u bɛ ɲininiw kɛ o barokun kan ani u mana kunnafoni jɛlen minnu sɔrɔ o ko kan, u bɛ olu bɛɛ fara ɲɔgɔn kan. A bɛ se ka kɛ ko u bɛ mɔgɔw hakilina ɲini a ko kan ani fana ka kuma a ko dɔnbaga ŋanaw fɛ. Ni u tilara o bɛɛ la tuma min na, u bɛ barokun kɔnɔkumaw sɛbɛn, ka yɛlɛmaw kɛ a la ni o ka kan, ka segin k’a kalan tuguni, ka fotow kɛ a la k’a hakilinaw kɔkɔrɔdon ani k’a ci Komitew ka baarako labɛnbagaw ka komite ma walasa ka u ka yamaruya sɔrɔ.

 An balimaw hakilina ye mun ye ka ɲɛsin kunnafoniw ma minnu bɛ sɔrɔ jw.org siti kan? Cheryl ye balimamuso dɔ ye min bɛ bɔ Filipini. A ko: “A ka di ne ye kosɛbɛ ka kunnafoniw kalan Jehova ka jɛkuluba ni a ka mɔgɔw ko la sɔgɔmada fɛ sani ne ka fɛn wɛrɛw kɛ.”

 Kunnafoni minnu bɛ jw.org siti kunnafoniw sɔrɔyɔrɔ la, olu kalanbagaw y’a jateminɛ ko danfaraba de bɛ o kunnafoniw ni kunnafoni tɔw cɛ minnu bɛ sɔrɔ yɔrɔ wɛrɛw la. Tatiana, ale min bɛ bɔ Kazakhstan, o ko: “Kunnafoni minnu bɛ jw.org siti kan, olu ka di ne ye kosɛbɛ bawo ne bɛ se ka da o kunnafoniw na. U kumaw ye tiɲɛ ye wa kow kɛra cogo min na tiɲɛ yɛrɛ la, o de bɛ u kɔnɔ.” Balimamuso dɔ min tɔgɔ ye ko Alma, ale bɛ bɔ Mekisiki. Ale fana ko: “An bɛ kunnafoni jugu minnu mɛn kunnafoni tɔw la, danfaraba de bɛ o kunnafoniw ni jw.org siti kunnafoniw cɛ bawo jw.org siti kunnafoniw bɛ dusu don an kɔnɔ kosɛbɛ.”

 Kunnafoni minnu bɛ jw.org siti kunnafoniw sɔrɔyɔrɔ la, tiɲɛ don ko an bɛ se ka da olu la nka o dɔrɔn tɛ, o kunnafoniw bɛ an ka dannaya fana barika bonya. Bernard, o min bɛ bɔ Keniya, o ko: “Jw.org siti kunnafoniw ye ne dɛmɛ k’a ye ko balima minnu bɛ diɲɛ fan bɛɛ, ko olu ni ne bɛɛ bɛ denbaya kelen kɔnɔ hali ni an tɛ yɔrɔ kelen na. Ne bɛ se ka u tɔgɔw ni u ka gɛlɛya kɛrɛnkɛrɛnnew ko fɔ ne ka deliliw kɔnɔ.” Balimamusɔ dɔ min tɔgɔ ye ko Bybron, ale min fana bɛ bɔ Keniya, ale ko: “Ne mana a ye tuma o tuma ko Bibulu dɔ bayɛlɛmana kan wɛrɛ la ani ka bɔ, o ka di ne ye kosɛbɛ. Barokun minnu bɛ kuma o kow kan, o bɛ ne hakili jigin a la ko Jehova tɛ mɔgɔ bɔ mɔgɔ la.”

 Kɔrɔbɔli bɛ balima minnu kan, olu kibaruyaw sɔrɔli bɛ dusu don an kɔnɔ kosɛbɛ. Jackline, o min fana bɛ bɔ Keniya, o ko: “Ne mana miiri o balimaw ka jagɛlɛya la, o bɛ ne ka dannaya barika bonya kosɛbɛ. Fɛn minnu b’a to u bɛ muɲuli kɛ, ne b’a ɲini ka o dɔn. Mɔgɔw bɛ fɛn minnu jate ko fitiniw ye, i n’a fɔ delili, Bibulukalan ani hali dɔnkili da, olu de bɛ an balimaw dɛmɛ u ka fanga sɔrɔ.”

 Balimamuso dɔ min tɔgɔ ye ko Beatriz, o min bɛ bɔ Costa Rica o y’a fɔ ko kunnafoni minnu bɛ di kasaaratɔw dɛmɛni baara kan, ko olu ka di ale ye kosɛbɛ. A y’a fɔ fana ko: “Kunnafoni minnu bɛ jw.org siti kunnafoniw sɔrɔyɔrɔ la, olu b’a to ne k’a ye an ka jɛkuluba bɛ balimaw dɛmɛ ni kanuya ye cogo min na, teliya la ani cogo la min bɛ u nafa kosɛbɛ. O b’a jira ne la tiɲɛ yɛrɛ la ko Jehova de ka jɛkuluba don.”

 Ka kunnafoni labanw sɔrɔ an balimaw kan minnu bɛ diɲɛ fan bɛɛ, tiɲɛ na, o ye nisɔndiya koba ye. O tun tɛna se ka kɛ ni aw tun ma bolomafaraw di an ka baaraw kama diɲɛ bɛɛ kɔnɔ, cogoyaw fɛ minnu caman kofɔlen don donate.mt1130.com kan. Aw bolo labilalalen bɛ bolomafara minnu di, aw ni ce olu kosɔn.