Jehova b’a fɛ i ka a dɔn ka ɲɛ. Mun na? A jigi b’a kan ko ni i bɛ ta’a fɛ k’a ɲini ka fɛn caman dɔn a jogow, a ka ko kɛcogow ani a sagonataw kan, i bɛna ta’a fɛ k’a ɲini ka kɛ a teri ye. Yala i bɛ se ka kɛ Ala teri ye tiɲɛ yɛrɛ la wa? (Zaburu 25:14 kalan.) I bɛ se ka mun kɛ walasa i ka kɛ Ala teri ye? Bibulu bɛ o ɲininkaliw jaabiw di ani k’a jira kun min na, i ni Jehova ka teriya de ye teriya bɛɛ la nafama ye i bɛ se ka min sɔrɔ.

1. Jehova b’a ɲini i fɛ i ka mun de kɛ?

“A’ ye gɛrɛ Ala la, ale fana na gɛrɛ aw la.” (Yakuba 4:8) O kɔrɔ ye mun ye? Jehova bɛ k’a ɲini i fɛ i ka kɛ a teri ye. A bɛ se ka gɛlɛya dɔw bolo ka da a la ko u bɛ se ka kɛ Ala teri ye, bawo u tɛ se ka a ye. Nka, an mago b’a la ka fɛn o fɛn dɔn Jehova jogow ko la walasa ka gɛrɛ a la, a ye o fɛnw bɛɛ fɔ an ye a ka Kuma kɔnɔ, ni o ye Bibulu ye. Ala ye cikan min di an ma Bibulu kɔnɔ, ni an bɛ o kalan, an ni Jehova ka teriya barika bɛ bonya hali k’a sɔrɔ an ma deli k’a ye.

2. Mun na Jehova de ye Teriw bɛɛ la ɲuman ye i bɛ se ka min sɔrɔ?

Mɔgɔ si tɛ i kanu ka tɛmɛn Jehova kan. A b’a fɛ i ka nisɔndiya sɔrɔ ani ka a deli tuma o tuma ni i mago bɛ dɛmɛ na. I bɛ se ka i “hami kow bɛɛ da ale kan, katuguni a bɛ a janto” i la. (1 Piɛrɛ 5:7) Jehova labɛnnen bɛ tuma bɛɛ ka a teriw dɛmɛ, ka u dusu saalo ani ka u lamɛn.—Zaburu 94:18, 19 kalan.

3. Jehova bɛ mun de ɲini a teriw fɛ?

Jehova bɛ mɔgɔw bɛɛ kanu, “nka mɔgɔ tilennenw teri don.” (Ntalenw 3:32) Fɛn minnu ka ɲi Jehova bolo, a b’a ɲini a teriw fɛ u ka o fɛnw kɛ, ani fɛn minnu man ɲi a bolo, a b’a ɲini a teriw fɛ u ka u yɛrɛw tanga o fɛnw ma. A bɛ se ka kɛ ko dɔw b’a miiri ko u tɛ se ka ɲɛnamaya kɛ abada ka kɛɲɛ ni Jehova ka sariyakolow ye ɲuman ni juguman ko la. Nka Jehova bɛ an faamu kosɛbɛ. Mɔgɔ o mɔgɔ, min bɛ Jehova kanu tiɲɛ yɛrɛ la ani ka a seko bɛɛ kɛ walasa ka a kodiya a ye, Jehova bɛ sɔn o tigi la.—Zaburu 147:11; Kɛwalew 10:34, 35.

 DƆ FARA I KA DƆNNIYA KAN

4. Ibrahima tun ye Jehova teri ye

Bibulu maana min bɛ kuma Ibrahima ko la (a tun welela fana Abrama), o bɛ an dɛmɛ k’a faamu a kɔrɔ ye min ye ka kɛ Ala teri ye. Ibrahima ka ko kalan Jenɛse 12:1-4 kɔnɔ. O kɔ aw ka baro kɛ nin ɲininkaliw kan:

• Jehova y’a fɔ Ibrahima ye ko a ka mun de kɛ?

• Jehova ye mun de layidu ta a ye?

• Ibrahima ye mun de kɛ?

5. Jehova bɛ fɛn minnu ɲini a teriw fɛ

Tuma caman na, an bɛ fɛn dɔw ɲini an teriw fɛ.

• A bɛ diya i ye, i teriw ka fɛn minnu kɛ i ye, olu dɔw ye jumɛnw ye?

1 Yuhana 5:3 kalan, o kɔ aw ka baro kɛ nin ɲininkali kan:

• Jehova bɛ mun de ɲini a teriw fɛ?

Walasa ka Jehova kan minɛ, fo an ka an jogow walima an sɔn yɛlɛma. Esayi 48:17, 18 kalan, o kɔ aw ka baro kɛ nin ɲininkali kan:

• Mun na Jehova b’a ɲini a teriw fɛ u ka yɛlɛmaw kɛ?

 6. Jehova bɛ fɛn minnu kɛ a teriw ye

 BAKURUBAFƆLI

Jehova b’a fɛ ka kɛ i Teri ye, wa a bɛna i dɛmɛ i ka gɛrɛ a la.

Seginnkanni

• Jehova bɛ a teriw dɛmɛ cogo di?

• Mun na Jehova b’a fɔ a teriw ye ko u ka yɛlɛmaw kɛ?

• Yala e hakili la, Jehova bɛ fɛn minnu ɲini a teriw fɛ, olu ka gɛlɛn kojugu wa? Mun na?