KALANSEN 31

Ala ka Masaya ye mun ye?

A BILA A LA

Cikanw bɛɛ la nafama min bɛ Bibulu kɔnɔ, o bɛ Ala ka Masaya de kan. Jehova sagonata tun ye min ye ka ɲɛsin dugukolo ma kabini daminɛ na, a bɛna baara kɛ ni nin Masaya ye ka o dafa. Masaya ye mun ye? An b’a dɔn cogo di ko a bɛ ka mara kɛ kabini sisan? A ye mun kɛ ka ban? Ani a bɛna mun kɛ don nataw la? Nin kalansen in ani kalansen nata fila bɛna o ɲininkaliw jaabiw di an ma.

1. Ala ka Masaya ye mun ye ani jɔni de y’a masakɛ ye?

O Masaya ye gofɛrɛnɛman dɔ ye Jehova Ala ye min sigi sen kan. A ka Masakɛ ye Yesu Krisita de ye, o bɛ ka mara kɛ sankolo la. (Matiyu 4:17; Yuhana 18:36) Bibulu b’a fɔ Yesu ko la ko: “A na kɛ masakɛ ye . . . badaa-badaa.” (Luka 1:32, 33) Ikomi Yesu ye Ala ka Masaya masakɛ ye, a bɛna mara kɛ mɔgɔw bɛɛ kun na dugukolo kan.

2. Jɔni bɛna mara kɛ ni Yesu ye?

Yesu tɛ mara kɛ a kelen na. “Bɔnsɔnw bɛɛ ni kanw bɛɛ ni mɔgɔw bɛɛ ani siyaw bɛɛ” mɔgɔ dɔw ni Yesu “na sigi masaya la” ɲɔgɔn fɛ. (Jirali 5:9, 10) Mɔgɔ joli de bɛna mara kɛ ni Krisita ye? Kabini Yesu nana dugukolo kan, mɔgɔ miliyɔn caman kɛra a nɔfɛmɔgɔw ye. Nka olu cɛla, mɔgɔ 144 000 dɔrɔn de bɛ taa sankolo la walasa ka mara kɛ ni Yesu ye. (Jirali 14:1-4 kalan.) Tɔw bɛɛ, minnu bɛ kɛ dugukolo kan, olu bɛna kɛ Masaya maradenw ye.—Zaburu 37:29.

3. Mun na Ala ka Masaya ka fisa ni Hadamadenw ka gofɛrɛnɛmanw ye?

Hali ni Hadamaden marabagaw b’a ɲini ka fɛn ɲumanw kɛ, u b’a fɛ ka fɛn minnu kɛ, se tɛ u ye ka olu bɛɛ kɛ. Ni u ye mara kɛ ka waati dɔ kɛ, mɔgɔ wɛrɛw bɛ sigi u nɔ na ka mara kɛ. Marabaga minnu bɛna sigi u nɔ na, laala olu bɛ u yɛrɛw de nafa ɲini ani laala yɛrɛ u t’a fɛ ka mɔgɔw dɛmɛ. Nka Ala ka Masaya marabaga, o min ye Yesu ye, ale tɛna bɔ yen abada walasa mɔgɔ wɛrɛ ka mara kɛ a nɔ na. Ala ye “masaya [dɔ] lawuli. O tɛna se ka tiɲɛ.” (Daniɛl 2:44) Yesu bɛna mara kɛ dugukolo bɛɛ kun na, wa a tɛna mɔgɔ dɔw minɛcogo fisaya ni dɔw ye. Kanuya, ɲumanya ani tilennenya bɛ Yesu la ani a bɛna mɔgɔw kalan u ka o jogow waleya ka ɲɛsin ɲɔgɔn ma.—Esayi 11:9 kalan.

DƆ FARA I KA DƆNNIYA KAN

An k’a lajɛ kun min na Ala ka Masaya ka fisa ni Hadamadenw ka gofɛrɛnɛmanw bɛɛ ye.

4. Gofɛrɛnɛman setigi dɔ bɛna dugukolo bɛɛ mara

Se min bɛ Yesu bolo ka mara kɛ, o ka bon ni Hadamaden marabagaw bɛɛ ta ye minnu kɛra yen tariku kɔnɔna na. Matiyu 28:18 kalan, o kɔ aw ka baro kɛ nin ɲininkali kan:

Fanga min bɛ Yesu bolo ka mara kɛ, danfara jumɛn bɛ o ni Hadamaden marabagaw ta cɛ?

Hadamaden gofɛrɛnɛmanw bɛ falen-falen tuma caman, ani u bɛɛ kelen-kelen bɛ dugukolo fan dɔ dɔrɔn de mara. Ala ka Masaya dun? Daniɛl 7:14 kalan, o kɔ aw ka baro kɛ nin ɲininkaliw kan:

Ala ka Masaya “tɛ tiɲɛ abada.” Mun na o ka ɲi?
Ala ka Masaya bɛna dugukolo bɛɛ mara. Mun na o ka ɲi?

5. Hadamadenw ka mara ka kan ka bɔ yen

Mun na Ala ka Masaya ka kan ka sigi Hadamadenw ka gofɛrɛnɛmanw nɔ na? A’ye WIDEYO lajɛ, o kɔ aw ka baro kɛ nin ɲininkali kan:

WIDEYO: Ala ka Masaya ye mun ye?—Yɔrɔ dɔ (1:41)

Hadamadenw ka mara nana ni mun de ye?

Waajulikɛla 8:9 kalan, o kɔ aw ka baro kɛ nin ɲininkaliw kan:

Yala e hakili la, Ala ka Masaya ka kan ka sigi Hadamadenw ka gofɛrɛnɛmaw nɔ na wa? Mun na?

6. Ala ka Masaya marabagaw bɛ an faamu

Ikomi an ka masakɛ Yesu delila ka ɲɛnamaya kɛ iko Hadamaden, o la a bɛ se ka “hinɛ an na an ka barikantanya kow la”. (Heburuw 4:15) Cɛw ani muso kantigiw 144 000 minnu bɛna mara kɛ ni Yesu ye, Jehova de ye olu sugandi ka bɔ “bɔnsɔnw bɛɛ ni kanw bɛɛ ni mɔgɔw bɛɛ ani siyaw bɛɛ la.”—Jirali 5:9.

Yesu ni a marakɛɲɔgɔnw bɛɛ b’a dɔn Hadamadenya ye min ye. Yala o dɔnni bɛ i dusu saalo wa? Mun na?

Jehova ye cɛ dɔw ani muso dɔw sugandi ka bɔ yɔrɔw bɛɛ la walasa u ka mara kɛ ni Yesu ye

7. Ala ka Masaya ka sariyaw ka fisa ni Hadamaden gofɛrɛnɛmanw bɛɛ ka sariyaw ye

Gofɛrɛnɛmanw bɛ sariyaw sigi minnu ka kan ka u ka jamanadenw nafa ani ka u lakana. Ala ka Masaya fana ye sariyaw sigi a ka maradenw ka kan ka tugu minnu kɔ. 1 Kɔrɛntekaw 6:9-11 kalan, o kɔ aw ka baro kɛ nin ɲininkaliw kan:

E hakili la, diɲɛ bɛ kɛ cogo di ni mɔgɔw bɛɛ bɛ ka tugu Ala ka sariyaw kɔ jogo ta fan fɛ? a
Yala e hakili la, yamaruya bɛ Jehova bolo k’a ɲini Masaya maradenw fɛ u ka taama ka kɛɲɛ ni o sariyaw ye wa? Mun na?
Mun de b’a jira ko mɔgɔ minnu tɛ ka taama ka kɛɲɛ ni o sariyaw ye, olu bɛ se ka yɛlɛma?—Tilayɔrɔdennin 11 lajɛ.

Gofɛrɛnɛmanw bɛ sariyaw sigi walasa ka u ka jamanadenw lakana ani ka u nafa. Ala ka Masaya ka sariyaw ka fisa ni Hadamaden gofɛrɛnɛmanw bɛɛ ka sariyaw ye. O sariyaw bɛ Masaya maradenw lakana ani ka u nafa

MƆGƆ DƆ BƐ SE KA NIN ƝININKALI KƐ: “Ala ka Masaya ye mun ye?”