KALANSEN 34

An bɛ se ka an ka kanuya jira Jehova la cogo di?

A BILA A LA

Yala i y’a ye ko i gɛrɛla kosɛbɛ Ala la kabini i ye Bibulukalan daminɛ wa? Yala i b’a fɛ ka ta’a fɛ ka i ni Ala ka teriya barika bonya wa? Ni o don, i k’a to i hakili la ko ni Jehova bɛ k’a ye ko ale ka kanuya bɛ ka bonya i la kosɛbɛ ka ta’a fɛ, Jehova fana bɛna ta’a fɛ ka i kanu ani k’a janto i la kosɛbɛ. I bɛ se k’a jira a la cogo di ko i b’a kanu?

1. An b’a jira Jehova la cogo di ko an b’a kanu?

An bɛ an ka kanuya jira Jehova la an kɛtɔ ka a kan minɛ. (1 Yuhana 5:3 kalan.) A tɛ mɔgɔ si diyagoya k’a kan minɛ. Nka a bɛ cogoya di an kelen-kelen bɛɛ ma an k’a sugandi ni an b’a kan minɛ walima ni an t’a kan minɛ. Mun na a b’o kɛ? Bawo Jehova b’a fɛ an ka a kan minɛ ni an “dusukunw bɛɛ ye.” (Romɛkaw 6:17) O kɔrɔ ye ko, a t’a fɛ i k’a kan minɛ bawo i ka kan ka o kɛ, nka a b’a fɛ i k’a kan minɛ bawo i b’a kanu. Nin gafe in tilayɔrɔ 3nan ani 4nan dabɔra ka i dɛmɛ i k’i ka kanuya jira Jehova la i kɛtɔ ka a diyanyekow kɛ ani ka i yɛrɛ tanga kow ma minnu man di a ye.

2. Mun na a bɛ se ka gɛlɛya an bolo ka an ka kanuya jira Jehova la?

“Mɔgɔ tilennen degun kow ka ca”. (Zaburu 34:20) An bɛɛ bɛ ka siɲɛ ta ni an yɛrɛw ka dafabaliyakow ye. Wariko gɛlɛya bɛ se ka kɛ an na, mɔgɔ dɔw bɛ se ka tilenbaliyakow kɛ an na, ani fana gɛlɛya wɛrɛw bɛ se ka kɛ an na. Ni gɛlɛyaw bɛ an kan, a bɛ se ka kɛ an bolo ko Jehova bɛ min ɲini an fɛ o kɛli ma nɔgɔn. Ka d’a kan a bɛ se ka kɛ ko Jehova kanbilali de ka nɔgɔn an ma o waati la. Nka Jehova bɛ min ɲini i fɛ ni i y’o kɛ, i b’a jira o fɛ ko i bɛ Jehova kanu ka tɛmɛn fɛn tɔw bɛɛ kan. O la, i b’a jira ko i ye kantigi ye ka ɲɛsin a ma. O la sa, ale fana bɛ kɛ kantigi ye ka ɲɛsin i ma. A tɛna i bila abada.—Zaburu 18:26 kalan.

DƆ FARA I KA DƆNNIYA KAN

Kun min na i ka kantigiya nafa ka bon Jehova bolo, an ka o sɛgɛsɛgɛ. An k’a ɲini k’a dɔn fana fɛn min bɛ se ka i dɛmɛ i ka to kantigiya la a kɔ.

3. Gɛlɛya dɔ min bɛ i yɛrɛ kun kan

Bibulu kɔnɔ, Job ka kitabu kɔnɔ, Sitanɛ ye fɛn dɔ fɔ Job ani mɔgɔ tɔw bɛɛ ma minnu b’a fɛ ka Jehova bato. Job 1:1, 6–2:10 kalan, o kɔ aw ka baro kɛ nin ɲininkaliw kan:

Ka kɛɲɛ ni Sitanɛ ka fɔta ye, a y’a jira ko Job tun bɛ ka Ala kan minɛ kun jumɛn kama?—Job 1:9-11 lajɛ.
Sitanɛ ye mun de fɔ Hadamadenw bɛɛ ko la ni e yɛrɛ sen b’o la?—Job 2:4 lajɛ.

Job 27:5b kalan, o kɔ aw ka baro kɛ nin ɲininkali kan:

Job y’a jira cogo di ko a bɛ Jehova kanu tiɲɛ yɛrɛ la?

Job ye a ka kanuya jira Jehova la a kɛtɔ ka to kantigiya la a kɔ

An bɛ an ka kanuya jira Jehova la an kɛtɔ ka to kantigiya la a kɔ

4. Jehova dusu nisɔndiya

Ntalenw 27:11 kalan, o kɔ aw ka baro kɛ nin ɲininkaliw kan:

Ni i ye hakili sɔrɔ ani ka Jehova kan minɛ, o bɛ mun kɛ a la? Mun na?

5. I bɛ se ka kɛ kantigi ye Jehova ma

Kanuya min bɛ an na ka ɲɛsin Jehova ma, o bɛ an bila an ka a kofɔ mɔgɔ wɛrɛw ye. An ka kantigiya bɛ an bila ka o kɛ hali tuma min na o kɛli man nɔgɔn. A’ye WIDEYO lajɛ, o kɔ aw ka baro kɛ nin ɲininkaliw kan:

WIDEYO: I ka dannaya lafasa hali kɔrɔbɔli kɔnɔna na (5:09)

Ka Jehova kofɔ mɔgɔ wɛrɛw ye, yala o kɛli ma deli ka gɛlɛya i ma wa?
Wideyo kɔnɔ, mun de ye Grayson dɛmɛ ka se sɔrɔ a ka siran kan?

Jehova bɛ fɛn minnu kanu ni an bɛ olu kanu, ani a bɛ fɛn minnu koniya ni an bɛ olu koniya, a bɛ nɔgɔya an bolo ka kɛ kantigiw ye a ma. Zaburu 97:10 kalan, o kɔ aw ka baro kɛ nin ɲininkaliw kan:

Ka kɛɲɛ ni fɛnw ye i ye minnu kalan, Jehova bɛ fɛn minnu kanu olu dɔw ye jumɛnw ye? A bɛ fɛn minnu koniya, olu dɔw ye jumɛnw ye?
I bɛ se ka i dege cogo di ka fɛn ɲumanw kanu ani ka fɛn juguw koniya?

6. Ni an ye Jehova kan minɛ, an bɛ nafa sɔrɔ o la

Ka Jehova kan minɛ, o de ka fisa tuma bɛɛ. Esayi 48:17, 18 kalan, o kɔ aw ka baro kɛ nin ɲininkaliw kan:

Yala e hakili la, an bɛ se ka da a la ko Jehova b’a dɔn tuma bɛɛ fɛn min ka fisa an ma wa? Mun na?
I ka Bibulukalan ani i bɛ ka kalan min kɛ Ala lakika Jehova ko la, olu bɛ ka i nafa cogo di fo ka se sisan ma?

MƆGƆ DƆW B’A FƆ KO: “An tɛ se ka Ala nisɔndiya tiɲɛ yɛrɛ la abada.”