SELI minnu ɲɛsinnen bɛ diinɛ kow ma ani seli gansanw, n’u bɛ kɛ diɲɛ fan caman na bi, o seliw ma bɔ Bibulu kɔnɔ. O la sa, o seliw bɔra min? N’i bɛ se ka taa gafelasagonyɔrɔ dɔ la, gafew bɛ min fɔ seliw ko la minnu bɛ kɛ ka caya i ka dugu la, i bɛna fɛn nafamaba sɔrɔ olu ko la. An ka misali dɔw ta.

Paki. Gafe min tɔgɔ ko The Encyclopædia Britannica, o b’a fɔ ko: “An tɛ hakilina foyi sɔrɔ Bibulu Layidu kura kɔnɔ min  b’a jira ko Paki seli tun bɛ kɛ.” Paki seli daminɛna cogo jumɛn na? O bɛ bɔ josɔnnaw ka bato de la. Hali ni a fɔra ko o bɛ kɛ walisa ka Yesu ka lakununni seli de kɛ, laada minnu ni Paki seli bɛ taa ɲɔgɔn fɛ, olu kow tɛ Krecɛnya ye. Misali la “Paki sonsannin,” min lakodɔnnen bɛ kosɛbɛ. Gafe min tɔgɔ ko The Catholic Encyclopedia, o b’a fɔ ko: “Sonsannin ye josɔnnaw ka taamasyɛn ye, wa o tun ye bangeli taamasyɛn ye tuma bɛɛ.”

San Kura seli. Don ani laada minnu sirilen bɛ San Kura seli la, olu kɛcogo tɛ kelen ye duguw la. O seli daminɛni bɛ bɔ yɔrɔ min na, an ka o lajɛ. Gafe min tɔgɔ ko The World Book Encyclopedia, o b’a fɔ ko: “San 46 ka kɔn Krisita tile ɲɛ, masakɛ Jules César y’a latigɛ ko san Zanwuyekalo tile 1 ka kɛ i ko San Kura don. Romɛkaw tun ye o don di Janus de ma, n’o tun ye dondaw ani daminɛ ala ye. Zanwuyekalo tɔgɔ dara Janus la, ɲɛda fila tun bɛ min na: Kelen ɲɛsinnen bɛ ɲɛfɛ, kelen tɔ ɲɛsinnen bɛ kɔfɛ.” O la sa, San Kura seli sinsinnen bɛ josɔnnaw ka laadaw de kan.

Saint-Valentin. Gafe min tɔgɔ ko The World Book Encyclopedia (1973), Tome XX, ɲɛ 204, o b’a fɔ ko: “Krecɛn fila minnu sara u ka dannaya kosɔn, n’u tɔgɔ ye ko Valentin, Saint-Valentin bɛ bɛn u saya don seli de ma. Nka, laada minnu sirilen bɛ o don na . . . a ka c’a la, olu bɛ bɔ fɔlɔ Romɛkaw ka seli de la min tɔgɔ ko Lupercal. O tun bɛ kɛ san o san Feburuyekalo tile 15. O tun bɛ nɔɔrɔ da Junon kan, n’o tun ye musow ni furu ka ala musoman ye Romɛkaw fɛ yen. O seli tun bɛ nɔɔrɔ da Pan fana kan, n’o tun ye dunuya ka ala ye u fɛ.”

Seli wɛrɛw. Seli minnu bɛ kɛ diɲɛ kɔnɔ, an tɛ se ka kuma olu bɛɛ kan. Nka, seli minnu bɛ nɔɔrɔ da hadamadenw walima jɛkuluw kan, Jehova tɛ sɔn olu ma. (Jeremi 17:5-7; Kɛwalew 10:25, 26) A to i hakili la fana ko seli min ɲɛsinnen bɛ diinɛ ma, o bɔyɔrɔ b’a to o seli bɛ diya Ala ye walima o tɛ diya a ye. (Esayi 52:11; Jirali 18:4) K’an sen don seliw la minnu tɛ diinɛ seliw ye, Ala bɛ o seliw ye cogo min na, Bibulu sariyakolo minnu fɔlen bɛ nin gafe Tilayɔrɔba 16nan na, olu bɛna i dɛmɛ ka o latigɛ.