Krecɛnw ka Gɛrɛki sɛbɛnw bɛ kuma Barnabasi ani ciden Paul kan siɲɛ caman i n’a fɔ lakɔlɔsibaga taamakɛlaw, minnu tun bɛ taa bɔ jɛkuluw ye an san kɛmɛ fɔlɔ la. Mun na u tun bɛ o kɛ? U tun bɛ hami sɛbɛ yɛrɛ la krecɛnw tɔw ka hɛrɛ ko la. Paul y’a fɔ: “An ka kɔsegin . . . k’a filɛ yala ni balimaw bɛ cogo min na.” Ka kilomɛtiri ba caman kɛ walasa ka dusu don a balimaw kɔnɔ, o tun tɛ a tɔɔrɔ. (Kɛwalew 15:36) O kuntilenna kelen de bɛ an ka waati lakɔlɔsibaga taamakɛlaw la.

U bɛna ka dusu don an kɔnɔ. Kafo lakɔlɔsibagaw bɛɛ kelen kelen bɛ i mago don jɛkulu mugan ɲɔgɔnna na, a bɛ dɔgɔkun kelen kɛ ni u bɛɛ ye, siɲɛ fila san kɔnɔ. U ka ko dɔn ani u musow taw ni u furulen don, o b’an nafa kosɛbɛ. Ka a ɲini ka funakɛ ani denmisɛnninw dɔn, o ka di u ye ani a ka di u ye ka an bila sira waajuli la ani an ka Bibulu kalan na mɔgɔw kun. U bɛ dɛmɛ lase kɛrɛnkɛrɛnneyala jɛkulu mɔgɔ dɔw ma, u kɛtɔ ka taa bɔ u ye ni maakɔrɔw ye. Lajɛw la ani lajɛbaw la u bɛ jɛmukanw di minnu bɛ dusu don an kɔnɔ.—Kɛwalew 15:35.

U bɛɛ u mago don bɛɛ la. Kafo lakɔlɔsibagaw bɛ jɛkuluw mɔgɔw bɛɛ dɛmɛ walisa u ka jɛɲɔgɔnya ɲuman sɔrɔ ni Jehova ye. U bɛ u dalajɛ ni maakɔrɔw ye ani cidenyabaara magannaw ye walasa taaɲɛ minnu kɛra, ka olu kɔlɔsi ani ka laadilikanw di u ma ka kɛɲɛ ni u ka kan ka u jɔyɔrɔw fa cogoya min na. U bɛ tutigɛbagaw dɛmɛ walasa u ka se ka tɔnɔ ɲuman sɔrɔ waajulibaara la. Ka mɔgɔ kuraw dɔn, o bɛ u nisɔndiya ani u bɛ a ɲini k’a dɔn ni o mɔgɔw bɛ ka ɲɛtaa kɛ alako ta fan fɛ. U kelen-kelen bɛɛ b’a bɔ u yɛrɛ la k’u yɛrɛ di, i n’a fɔ ‘baarakɛɲɔgɔn ye an kosɔn.’ (2 Kɔrɛntekaw 8:23) U ka dannaya ani u bɛ cɛsiri min kɛ Ala kɔ, o ye misali ɲuman ye an bolo, an ka kan ka min ladege.—Heburuw 13:7.

• Mun na kafo lakɔlɔsibagaw bɛ taa bɔ jɛkuluw ye?

• I bɛ se ka nafa bɔ u ka bɔnyew la cogo di?