A bɛnnen don k’a ɲini ka a dɔn min na mɔgɔw bɛ sa, kɛrɛnkɛrɛnnenya la yɛrɛ ni o ye mɔgɔ ye min ka surun an na. Bibulu b’a fɔ ko: “Saya baga ye jurumu ye.”—1 Kɔrɛntekaw 15:56.

Mun na hadamadenw bɛɛ bɛ jurumu kɛ ani u bɛ sa?

Mɔgɔ fɔlɔw, Hadama ni Hawa, bɔnɛna u ka ɲɛnamaya la bawo u ye jurumu kɛ ka ɲɛsin Ala ma. (Jenɛse 3:17-19) U ye murutili min kɛ ka ɲɛsin Ala ma saya dɔrɔn de tun ye o kɔmana ye, ka d’a kan Ala de ye “ɲɛnamaya ji boyi” ye—Zaburu 36:10; Jenɛse 2:17.

Hadama ye jurumu kɔlɔlɔw lase a bɔnsɔnw bɛɛ ma. Bibulu b’a fɔ ko: “Jurumu donna diɲɛ la mɔgɔ kelen barika la, saya fana donna jurumu barika la. Saya sera Hadamadenw bɛɛ ma ten, k’a masɔrɔ u bɛɛ ye jurumu kɛ.” (Romɛkaw 5:12) Mɔgɔw bɛɛ bɛ sa ka d’a kan u bɛɛ ye jurumutɔw ye.—Romɛkaw 3:23.

Saya bɛna silatunun cogo min na

Ala ye waati dɔ layidu ta min na “a na saya ban badaa.” (Esayi 25:8) Walasa ka saya bɔ yen, fɛn min bɛ saya lana ni o ye jurumu ye, a ka kan ka o de bɔ yen. Ala bɛna o kɛ Yesu Krisita sababu la, o min “bɛ diɲɛ ka jurumu ta k’a bɔ yen.”—Yuhana 1:29; 1 Yuhana 1:7.