AYÉ’É 42
JIA 103 Bemvendé—Mimveane mi Yéhôva
Liti’i na wo nye’e ésaé ‘bôte be ne ane mimveane’ ba bo ékôane bekristen été
“Éyoñ a nga bete bevôme be ne ôyabe yôp . . . , a nga ve bôt ane mimvean.”—ÉPHÉ. 4:8.
BETA BE MAME BIA ZU YEN
Ayé’é di, bia zu yen avale bevolô, bemvendé a bejome bikôane bekristene ba volô bia. Bia zu fe yen avale bi ne liti na bia nye’e ésaé bôte bete ba bo.
1. Mame mevé méziñe Yésus a nga bo asu dangan?
TEKE môt éziñe si va a ne ésôs aval ane Yésus. Éyoñ a mbe si, a nga belan étua ngule jé na a volô bôte bevok. (Luc 9:12-17) A nga bo mveane wo dañ éyoñ a nga ve ényiñe jé asu dangan. (Jean 15:13) To’o éyoñ a mbe a wômôya, a nga ke ôsu a liti fulu ésôs. Fo’o ve aval a nga ka’ale, a nga sili Yéhôva na a ve bia mfufube nsisim, nnye ate a ye ye’ele bia a volô bia minlem. (Jean 14:16, 17, ayemé; 16:13) Yésus a belane fe bisulane biangane na a ke ôsu a yañele bia asu na bi bo bôte ya si ése beyé’é.—Matt. 28:18-20.
2. Beéphésien 4:7, 8 a jô na nsamba bôt éziñ ô ne avale ‘bôt é ne ane mimvean.’ Bôte bevé be ne nsamba ôte?
2 Yésus a nga bo bia mvean ôfe. Nlômane Paul ô nga tili na éyoñe Yésus a nga ke yôp, “a nga ve bôt ane mimvean.” (Lañe’e Beéphésien 4:7, 8.) Paul a nga jô na Yésus a nga ve bôte bete ane mimvean asu na be suk ékôane bekristen abui mezen. (Éphé. 1:22, 23; 4:11-13) Melu ma, nsamba ‘bôte be ne ane mimvean,’ bi ne lañe bevolô, bemvendé a bejome bikôane bekristen. a É ne été na bôte bete ba bo bikop amu be be’e metyi ya abé. (Jacq. 3:2) Ve Tate wongane Yésus Krist a belane bidima bi bobejañe bite na a volô bia.
3. Va’a éve’ane ja liti aval avé bi ne suk ésaé ‘bôte be ne ane mimveane’ ba bo.
3 Yésus a nga ve ‘bôte be ne ane mimveane’ mbe’e ya yemete ékôane bekristen. (Éphé. 4:12) Ve bia bevo’o bi ne volô be na be yeme be’e beta mbe’e ate. Bi ne ve’e de a mame ma boban éyoñe ba lôñ Aba Éjôé. Bôte béziñe ba nyoñe ngap ésaé melôñ. Ba bevo’o ki ba suk ésaé a zene ya bidi nge ke biôme bife. Avale te da da, a zene ya mame bia jô a bo, bia bese bi ne suk ésaé bevolô, bemvendé a bejome bikôane bekristene ba bo. Bi tame zu yen avale bi ne yene mfi ya beta ésaé bôte bete ba bo a avale bi ne liti na, bia nye’e be a na bia nye’e fe Yésus, nnye ate a nga ve ‘bôte bete ane mimvean.’
BEVOLÔ YA ÉKÔANE BEKRISTENE BA VE “NGULE YA VOLÔ BÔTE BEVOK”
4. Ntete mimbu ôsu, aval avé bevolô be mbe ‘ngule ya volô bôte bevok’?
4 Ntete mimbu ôsu, be nga telé bobejañe béziñ ane bevolô. (1 Tim. 3:8) Da yené ve ane mbe Paul a mbe a kobô’ô be, éyoñ a nga jô na bôte béziñe be bili “ngule ya volô bôte bevok.” (1 Cor. 12:28) Bevolô be mbe be yiane bo abui ésaé ékôane bekristen asu na bemvendé be bi éyoñe ya bo ésaé ya ye’ele a jome bobejañ a besita. Éve’an é ne na, bevolô mbe be mbe be yiane suk ésaé ntilane Mimvulekane mi kalate, nge kuse biôme bise bi mbe be bi sili’i asu na ésaé éte é boban.
5. Beta bisaé bivé biziñe bevolô ya ékôane bekristene ba bo melu ma?
5 Tame yene beta bisaé biziñe bevolô ya ékôane bekristene jôé ba bo. (1 P. 4:10) Be ne ve be ésaé ya ba’ale minkobe ya ékôane bekristene nge tebele mebôta me nkañete. Be ne bañete bekalate a futi be ata’a bekalate ya ékôane bekristen asu na bekañete be bi be. Be ne saé beminsini ya Aba Éjôé nge ke accueil, be ne fe suk ésaé ya ba’ale Aba Éjôé mfuban. Bisaé bite bise bi ne mfi asu na ékôane bekristen é wulu mvo’é. (1 Cor. 14:40) Bevolô béziñe ba bo fe bisaé ésulane ya zañe sondô (Ényiñe Kristen a ésaé nkañete jangan) a ba bo minkañete ya mengana bôt. Mvolô a ne fe suk abeñe nkañete éziñ. Biyoñe biziñ, ba ke fe liti bemvendé éyoñe ba jome bobejañ a besita.
6. Beamu bevé béziñe ba tindi bia na bi nye’e ésaé bevolô ya ékôane bekristene ba bo?
6 Bibotane bivé ékôane bekristene ja bi amu ésaé bevolô? Beberly, b sita éziñe ya Bolivie a jô na: “Ma ve bevolô bangan akiba amu ésaé ése ba bo. Ma kôme bu’ubane bisulan, me ne fe yia bia a ve biyalan. Me ne wô’ô minkañete a nyoñe besikôlô ya bevidéo a befôtô. Be bôô évevé na mbia jam éziñ a bo teke kui bôte ba vô’ôlô ésulan a ba volô bôte be vo’o zu tabe ésulan Aba Éjôé na be tabe bisulane be too menda map. Éyoñ ésulan é maneya, ba nyoñe ngap ésaé ya bo mfuban Aba Éjôé, ba fombô moné a ne minkop a ve ngule ya ve bia bekalate bia sili. Be ne beta ébotan!” Leslie a nyiñe Colombie, a nnôm a ne mvendé a jô na: “Ma ve bevolô akiba amu ba volô nnôme wom abui. Nge teke be, ve a yeme a abui bisaé. Ba bo ésaé jap a ayôñ ése a be ne nkômesane ya volô.” Bia bese bia ve bevolô bangan akiba amu ésaé ba bo.—1 Tim. 3:13.
7. Aval avé bi ne liti na bia nye’e ésaé bevolô ya ékôane bekristene ba bo? (Fombô’ô fe fôtô.)
7 É ne été na bi ne wô’ô mvaé amu ésaé bevolô ba bo, ve Kalate Zambe a ve bia abendé di: “Mi yeme fe ve akiba.” (Col. 3:15) Krzysztof, mvendé éziñe ya Finlande a liti na a nye’e ésaé bevolô. A jô na: “Me ne tili be kalate nge lôme be message a bili éfus éziñe ya Kalate Zambe a kañete aval avé mvolô éziñ a nga ve ma ngule nyule nge amu jé ma nye’e ésaé a bo.” Pascal a Jael, mbe bete ba nyiñe Nouvelle-Calédonie, ba bo ngum avale meye’elan asu bevolô ya ékôane bekristen. Pascal a jô na: “Melu me ndôme lôte ma, bi nga ye’elan asu bobejañe ya ékôane bekristene jangane be be’e mimbe’e. Bi nga bo fe meye’elane me nja’an a mvean akiba.” Yéhôva a vô’ôlô avale meye’elan éte a ékôane bekristen ése ja yene mfi ya été.—2 Cor. 1:11.
BEMVENDÉ YA ÉKÔANE BEKRISTENE “BA SAÉ A NGULE JAP ÉSE”
8. Amu jé Paul a nga jô na bemvendé ya ntete mimbu ôsu “ba saé a ngule jap ése”? (1 Bethessalonicien 5:12, 13)
8 Bemvendé ya ntete mimbu ôsu be nga saé a ngule jap ése asu ékôane bekristen. (Lañe’e 1 Bethessalonicien 5:12, 13; 1 Tim. 5:17) Be mbe be ‘tebele’e’ ékôane bekristen, be wulu’u bisulan a nyoñe mintyi’an. Be mbe be ‘lebe’e’ bobejañ a besita, be va’a be mingume melep a nye’an ôse asu na ékôane bekristen é bo mvo’é. (1 Thes. 2:11, 12; 2 Tim. 4:2) Be mbe fe be saék a ngul ése na be nyoñe ngap a menda me bôte map, a asu na bebiene be ke ôsu a bo ngule mfa’a ya nsisim.—1 Tim. 3:2, 4; Tit. 1:6-9.
9. Bemvendé ya melu ma be be’e avale mimbe’e avé?
9 Bemvendé ya melu ma be bili abui mame ya bo. Be ne bekañete mbamba foé. (2 Tim. 4:5) A ayôñ ése, ba tebe ôsu mfa’a ya nyoñe ngap ésaé nkañete, ba tak ésaé nkañete ya abôta nkañete dap. Ba ye’ele bia avale bi ne yeme kañete a ye’ele bôte mejô me Zambe. Ba bo ésaé jap a mvam ése a be ne betyi’i mejô be nji bo ôbangam. Éyoñe kristene ja bo beta nsem, bemvendé ba jeñe na be volô nye na a beta lat a Yéhôva. Ve ba véé fe mise mfa’a ya ba’ale ékôane bekristene mfuban. (1 Cor. 5:12, 13; Gal. 6:1) Beta mbe’e bemvendé be bili a ne na be ne beba’ale. (1 P. 5:1-3) Ba bo abeñe minkañete é tii Kalate Zambe, ba ve ngule ya yeme môt ase ya ékôane bekristen a ba jome bobejañ a besita. Bemvendé béziñe ba su’u fe ésaé nlôñan a mba’alane Meba me Éjôé, ba bo nta’ane mam asu bitôkan a ba saé e comités de liaison hospitaliers (CLH) a Émo’o asu njomane minkôkon, be bili fe mimbe’e mife. Bemvendé ba saé a ngul ése asu dangan!
10. Beamu bevé béziñe ba tindi bia na bi nye’e bemvendé bangane ba saé a ngul ése?
10 Yéhôva a nga ka’ale na beba’ale ya ékôane bekristene ba ye nyoñe bia ngap a na bia ye “bo te beta ko woñ, nge tabe ne vema.” (Jér. 23:4) Johanna, sita éziñe ya Finlande a nga yene na mejô mete me ne abôm ane koé éyoñe nyia a nga fame ngul ôkon. A kañete na: “Ma yen ayaé ya kate bôte bevo’o mame me ne ma nlem été. Akusa bo nalé, mvendé éziñe me nji kôme yem é nga jibi ma a ye’elan a ma a bôé ma nleme si na Yéhôva a nye’e ma. Me maneya vuane mam a nga kate ma, ve ma yeme na nlem ô nga bômbô ma si. Me too ndi na Yéhôva nnye a nga lôme nye na a volô ma mbamba éyoñ.” Aval avé bemvendé ya ékôane bekristene jôé be nga volô wo?
11. Aval avé bi ne liti na bia nye’e ésaé bemvendé ya ékôane bekristene ba bo? (Fombô’ô fe fôtô.)
11 Yéhôva a yi na bi liti bemvendé nye’an “amu ésaé ba bo.” (1 Thes. 5:12, 13) Henrietta a nyiñe Finlande a jô na: “Bemvendé ba volô bôte bevok a nleme wop ôse. Ve nalé a nji tinane na be bili abui éyoñ, abui ngul, nge na ba tôbane ki minjuk. Biyoñe biziñ, ma jô be na: ‘Ye me kate wo jam éziñ? Ô ne mbamba mvendé. Me too ndi na wo yeme de.’” Sita éziñe ya Turquie a ne jôé na Sera a jô na: “Bemvendé ba yi na be ve be ngule nyul asu na be ke ôsu a bo ésaé jap. Ajô te, bi ne tili be kalate nge bañete be na be zu di mon éfuse mbôñ a bia, nge kui nkañete a be.” Ye wo nye’e ésaé mvendé éziñe ya ékôane bekristene jôé ja bo? Jeñe’e na ô kate nye de.—1 Cor. 16:18.
Ô ne ve bemvendé ngule ja ye volô be na be ke ôsu a bo ésaé jap (Fombô’ô abeñe 7, 11, 15)
BEJOME BIKÔANE BEKRISTENE BA VE BIKÔANE BEKRISTENE NGULE NYUL
12. Nta’ane mam ôvé ô nga bo na bikôane bekristene ya ntete mimbu ôsu bi bi ngule nyul? (1 Bethessalonicien 2:7, 8)
12 Yésus Krist a nga ve ékôane bekristene ‘bôte be ne ane mimvean’ asu na be bo fe ésaé éfe. A mvolane wé, bemvendé ya Jérusalem be nga lôme Paul, Barnabas a bobejañe befe na be ke ba jome bikôane bekristen. (Mame mi. 11:22) Amu jé? Amu be mbe be bili ve nsôñane wua ane wu ô nga tindi be na be telé bevolô: nsôñane ya ve bikôane bekristene ngule nyul. (Mame mi. 15:40, 41) Bôte bete be nga nyume bebiene mbamba ényiñ a telé binyiñe biap mbia bité asu na be ye’ele a ve bôte bevo’o ngule nyul.—Lañe’e 1 Bethessalonicien 2:7, 8.
13. Bejome bikôane bekristene be be’e avale mimbe’e avé?
13 Bejome bikôane bekristene ba ke mulu éyoñ ése. Bevo’o ba bo mintete bekilimita na be ke jome bikôane bekristen. Sondô ase a jom ékôane bekristen, njome bikôane bekristen a bo minkañete a jome bobejañ a besita. A wulu fe ékôane benkpwa’a mefan a ékôane bemvendé a bikôan asu ésaé nkañete. A kômesane minkañete a bo nta’ane mam asu bitôkan a beta bitôkan. A ne ñye’ele e besikôlô benkpwa’a mefan, a bo nta’ane mam asu ésulane benkpwa’a mefan é ne ngum avale ja lôt éyoñ étôkane ya alu da é ne. Nge ô vaa mame mete mese, a bili fe mimbe’e mife mia so nye wofise ya Béthel a mivo’o ya été a yiane mie bo avôl avôl.
14. Beamu bevé béziñe ba tindi bia na bi nye’e ésaé bejome bikôane bekristene ba bo?
14 Aval avé bikôane bekristene bia yene mfi ya ésaé bejome bikôane bekristene ba bo? Mojañ éziñe ya Turquie a se’e bejome bikôane bekristen amu ésaé ba bo. A jô na: “Njomane wop ôse wo tindi ma na me nyoñ abui éyoñe ya volô bobejañ a besita. Ma yem abui bejome bikôane bekristen, ve teke wua ya be be a boya ma na me wô’ôtane na a bili abui ésaé nge na me yen ane nge me vo’o subu nye bebé.” Johanna bia te jô nye yôp a nga bo nkañete ya menda menda ba njome bikôane bekristen, ve be nji koone môt éziñ. A jô na: “Ma ye ke vuane môs ôte. A ayôñ ése, njome bikôane bekristen a nga ve ma ngule nyul. Bobenyañe bame bebaé be nga ke nyiñe vôme mfe a ba jembane ma abui. A nga volô ma na me yeme na, to’o bi vo’o tabe a bibu’a ya menda me bôte mangane nge ke a bemvôé bangan éyoñ ése éyoñe ji, mfefé émo, bia ye bi fane ya bo de.” Abui ya be bia é ngenan é simesane mbamba be mame bejome bikôane bekristene be nga bo be.—Mame mi. 20:37–21:1.
15. (a) Avale 3 Jean 5-8 a liti, aval avé bi ne liti na bia nye’e ésaé bejome bikôane bekristene ba bo? (Fombô’ô fe fôtô.) (b) Amu jé bia yiane liti na bia nye’e ésaé binga be bobejañe be be’e mimbe’e ba bo, a aval avé bi ne bo de? (Fombô’ô nka’ale ô ne nlô ajô na, “ Te vuane binga bap.”)
15 Nlômane Jean ô nga kate Gaïus na a bo ésôs a bobejañe ba zu jome be, a na a “suu be avale da yiane mise me Zambe.” (Lañe’e 3 Jean 5-8.) Zene jia ya bo de é ne éyoñe bia bañete be na be zu di mon éfuse mbôñ. Zene fe é ne éyoñe bia su’u nta’ane mame ba bo asu ésaé nkañete e sondô njoman. Leslie bia te jô nye yôp a bo mame méziñ asu na a liti na a nye’e ésaé bejome bikôane bekristene ba bo. A jô na: “Ma ye’elan asu na Yéhôva a jalé miñyiane miap. Bia nnôme wome bia tili fe be bekalate na bi kate be na minjomane miap mia volô bia abui.” Te vuane na bejome bikôane bekristene be ne bôt ane bia. Biyoñe biziñe be ne kon, minleme mi ne tyebe be yôp a be ne fe bili atek. Éko éziñe mbamba bifia biôé nge ke mone dase wo ye ve njome bikôane bekristene wôé a ne bo zene Yéhôva a belane je na a yalane meye’elane mé na a volô nye!—Mink. 12:25.
ÉKÔANE BEKRISTENE JA YI ‘BÔTE BE NE ANE MIMVEAN’
16. Avale kalate Minkana 3:27 a liti, minsili mivé bobejañe be ne sili bebien?
16 E si ése, bia yi abui bobejañ é ne saé ane ‘bôte be ne ane mimvean.’ Nge ô ne mojañ a dubaneya, ye ô ne volô bôte bevok “éyoñe ngule ya bo [d]e é ne wo wo”? (Lañe’e Minkana 3:27.) Ye ô bili nsôñane ya bo mvolô? Nge ô ntoo mvolô, ye ô ne tôé nsôñane ya bo mvendé? c Ye ô ne bo mintyendane mia ye volô wo na ô ke Sikôlô bekañete mbamba foé? Sikôlô ate a ye volô wo na ô bo avale môte Yésus a ye tu’a belane de. Nge wo yene na ô vo’o tôé minsôñane mite, ye’ela’ane Yéhôva. Sili’i nye na a ve wo mfufube nsisim asu na ô yeme bo ésaé ése ba ye ve wo.—Luc 11:13; Mame mi. 20:28.
17. ‘Bôte be ne ane mimveane’ be ne ndeme ya na Yésus Krist, Njô wongan a bo jé?
17 Bobejañe Yésus a nga telé ane ‘bôte be ne ane mimveane’ be ne ndeme ya na Yésus a wulu bia melu ya asu’ulane ma. (Matt. 28:20) Ye ô nji wô’ô mvaé amu bi bili Njô bôt a nye’e bia, Njô bôt a ne ésôs a nyi a nyoñe ngap a bia a ve bia biwôlô bi bobejañe bia jalé miñyiane miangan? Jeñe’e ñhe fane ya liti na wo nye’e ésaé bobejañe bete ba bo a ngule jap ése. Nde fe, te ve’ele vuane ve Yéhôva akiba, nnye ate a ne anjeñe ya “mbamba mvean ase a das ése.”—Jacq. 1:17.
JIA 99 Bizu’u bi bobejañ
a Bemvendé be ne bibu’a ya Tin ékôan, ba be ne bevolô ya Tin ékôan, ba be ne bibu’a ya Émo’o ja wulu wofise ya Béthel a ba be be’e mimbe’e mife be fe be ne nsamba ‘bôte be ne ane mimvean.’
b Bi nga tyendé biyôlé biziñ.
c Nge wo kômbô yeme mam ô ne bo asu na ô bo mvolô nge ke mvendé ya ékôane bekristen, lañe’e minlô mejô mi ne na, “A bobejañ, ye mi bili nsôñane ya bo bevolô ya ékôane bekristen?” a “A bobejañ, ye mi bili nsôñane ya saé ane bemvendé?” Nkume mmombô a bete ya Ngon awôm a jia mbu 2024.
