BONE be Israël be mbe be nye’e mezik angôndô ya abui. Kalate Zambe a wô’ô kobô ajô bebôme mezik a beyia bia. Éve’an é ne na be nga tili abui bekalate ya Kalate Zambe ane bia. E bekalate bete, bi ne lañe kalate Besam, Jia Salomon a Miñyône mi Jérémie. Kalate éziñ a liti avale bôte be mbe be nyiñi’i melu mvus a jô na Kalate Zambe a liti ne fômelé na, bone be Israël be mbe be bela’ane mezik abui mame be mbe be bo’ok.

Bone be Israël be mbe be bela’ane mezik e bité bise ya ényiñe jap. Bone be Israël be mbe be bela’ane mezik asu na be kate mame me ne be nlem été. (Ésa. 30:29) Binga be mbe be bôme’e mengom, be yia bia a meva’a mese, be jeme’e fe éyoñe ba te telé mfefé njô bôt. Be mbe fe be bo’o de éyoñe bezimbi ba te bi medañe bita a éyoñe ba bo mebô’ô ya ékaña’a. (Betyi’i me. 11:34; 1 Sam. 18:​6, 7; 1 Bb. 1:​39, 40) Bone be Israël be mbe fe be yia bia éyoñe môt a te wu asu na be liti mintaé mi ne be nlem été. (2 Mka. 35:25) Da kôme fo’o yené na “bone be Israël be mbe be nye’e mezik,” aval encyclopédie biblique de McClintock et Strong a jô.

Bejô bôte ya Israël be mbe be nye’e mezik. Bejô bôte ya Israël be mbe be nye’e ba vô’ôlô mezik. Njô bôte Saül a nga loone David nda njô bôt asu na a zu yia nye bia. (1 Sam. 16:​18, 23) Éyoñe David émien a nga bo njô, a nga kôme biko mezik a tili bia a ta’a minsamba beyia bia. Mvuse ya valé, be nga su’ulane belane minsamba beyia bia mite e Temple. (2 Mka. 7:6; Amos 6:5) Njô bôte Salomon a mbe a bili beyia bia be too befam a binga.—Eccl. 2:8.

Bone be Israël be mbe be bela’ane mezik ékaña’a ba ve Yéhôva. Jame da dañe mfi é ne na, bone be Israël be mbe be bela’ane mezik asu na be kañe Yéhôva. Ajô te, beyia bia 4 000 be mbe be yia bia Temple ya Jérusalem. (1 Mka. 23:5) Be mbe be bôme’e biwoé, memvet, bingombé a metoñ. (2 Mka. 5:12) Ve sa ke ve mintyetyeñe beyia bia mmie étame mi mbe mi kañe’e Yéhôva a zene ya mezik. Abui bone be Israël é mbe é yia bia éyoñe ba ke Jérusalem asu mebôk. Be be mbe be loone bia bite na, Bia ya mbetan. (Bsa. 120-134) A avale mintilane bejuif mia liti, bone be Israël be mbe be yia Besam ya Hallel a.

Melu ma, mezik me ne fe nya mfii asu bebo bisaé be Yéhôva. (Jacq. 5:13) Me ne ngabe jia ya ékaña’a bia ve Yéhôva. (Éphé. 5:19) Mezik ma bo na bia be bobejañe bi bo nlatan. (Col. 3:16) Ma ve fe bia ngule nyul éyoñe bia tôbane minjuk. (Mame mi. 16:25) Mezik me ne mbamba zene ya liti Yéhôva mbunan a nye’ane wongan.