Bôte be ne éjote nyul ba semé bôte bevok. Be nji bo ébiasé, nge yange na bôte be nyoñe be ngum aval. Môt a ne éjote nyul a nyoñe ngap a bôte bevok, a kañese fe yé’é be be.

Bôte béziñ ba simesane na môt a ne éjote nyul a ne ntetek, ve nalé a nji bo été. Fulu éte ja volô bôte na be yemelane bikobe biap a minné miap.

• É ne mfi asu na bi bi bemvôé. Kalate The Narcissism Epidemic a jô na, “Bôte be ne éjote nyul ba wô’an a bôte bevok,” a “ba kui na be ji’a late ngbwa a avale môt ese.”

• Ja ye bo nyo mone mfi melu ma zu. Nge nyo mon a yé’é bo éjote nyul den, da ye bo tyi’ibi na a yene bisaé melu ma zu. Dokita Leonard Sax a jô na: “Ésoé é ne éngelezek, teke yene mfi ya beta jeñe na a yem mam méziñ, a ye bo asuk éyoñ ba ye sili nye minsili asu ésaé éziñ. Ve ésoé ja jeñe na é kôme wô’ô jôme môt a kômbô nyoñe nye bisaé a yi, é ne ji’a bi ésaé éte.” *

Volô’ô nyo mon na a bo te bete émiene yôp.

ÑYE’ELANE YA BIBLE: “Amu na, nge môt a simesane na, a ne jôm éziñ éyoñ a ne momo jôm, a du’u émien.”​—Begalate 6:3.

• Sa’ale’e fulu ya kate nye mam me vo’o boban. Ô ne buni na wo bo nye mvaé éyoñ wo belane bifia ane: “Ô ne bi mam mese wo yi ényiñe jôé” a “Ô ne bo avale môt ese wo kômbô bo,” nde momo. Benyo bone be ne bi meva’a ényiñ nge be bili mbamba minsôñan a nge ba saé ngul asu na be tôé mie.

• Se’e nye asu ngumba jam a te bo. E jô nyo mon ve na, “Wo fo’o ô ne ma nya monô,” a nji volô nye na a bi fulu éjote nyul. Kate’e nye amu jé wo se’e nye.

• Sé’é abim éyoñ a lôt e beréseau sociaux. E beréseau sociaux, bôte be wô’ô wumulu bebien a liti beta be mam be nga bo. Mboan ôte wo selan a fulu éjote nyul.

• Ye’ele’ nyo mon na a bi fulu ya ji’a sili njaman. Éyoñe nyo mon a bo jam é ne abé, volô’ô nye na a meme jam ete.

 Ye’ele’ nye mvean akéva.

ÑYE’ELANE YA BIBLE: “Mi bo’o minleme ya ve akéva.”​—Becolossien 3:15.

• Mvean akéva asu ntéane biôm. Bongô ba yiane yé’é mvean akéva asu biôm bise bi nga tééban, a yemelane na abui mame y’été e ne mfi asu na bi nyiñ. Da sili na bi bi mvebe, mendim ya nyu, a bidi. Ô ne belane bive’ane bite asu na be yene mfi ya ve akéva, a semé biôm bise bi nga tééban.

• E yé’é be bôte bevok. Ye’ele’ nyo mon na a bo te bo bôte bevo’o éviele amu ba dañe nye bevôm béziñ, ve liti’i nye aval a ne vu be.

• E yeme ve akéva. Ye’ele nyo mon na a yeme jô na “akéva,” sa ke v’anyu. E yeme ve akéva a volô na bi bo éjote nyul.

Liti’i nyo mone na é ne mfi ya saéne bôte bevok.

ÑYE’ELANE YA BIBLE: “Ve a nje’eban nleme si, môt ase a semé’é nyô mbok a dañ nseman a semé émien; môt ase ya be mia te fombô ve mfa’a ya mam mé émien, ve môt ase ya be mia a fombô’ô fe mam me ya ba bevok.”​—Bephilippien 2:3, 4.

• Ye’ele’ nyo mon na a bo bisaé bi mo. Nge ô kate nyo mone na a bili ki na a bo bisaé ya nda, a ne v’ane wo jô nye na, ‘Sa ke wo wo yiane bo avale bisaé di!’ Bisaé ya nda bia yiane taté boban ôsusua na a ke bo bivôé. Liti’i nye na ésaé a bo é ne volô bôte bevok, a bo na be nye’e nye a semé nye.

• Ngôné’é na, e saéne bôte bevok a ne ébotan. Bongô ba ye bo bitôtôlô nge ba saéne bôte bevok. Ajô te, volô’ô nyo mon na a jeñe za a yi mvolan. Kate’e nye mam a ne bo asu dap. Se’e nye a va’a nye ngule nyul nté a volô be.