E bi mbamba nda bôt a mbamba bemvôé
Abui bôte da yen ayaé ya bi mbamba élat a nda bôte jap a bemvoé bap. Bi tame yene miñye’elane ya Bible miziñ mi ne volô wo na ô yeme nyiñ a bôt.
TE SIMESANE VE WOMIEN
ÑYE’ELANE YA BIBLE: “Môt a bo’o te simesane ve émien, ve a simesa’ane fe bôte befe.”—Bephilippien 2:4, Mfefé Nkôñelan.
JÔME NALÉ A TINAN: Bi aye bi mbamba élat a bôte bevok éyoñe bia jeñe mame bi ne bo asu dap, sa ke ve mam be ne bo asu dangan. Nge bia simesane ve biabebien, bi ne ndaman élate bi bili a bôte bevok. Éve’an é ne na, nge nluk a simesane ve miñyiane mié, a ne su’ulane ke bo mejian. Jam afe e ne na, môt éziñ a vo’o kômbô bo mvôé a môt a ne kom ve wumulu émien. Ajô te, kalate The Road to Character a jô na, “bôte ba simesane ve bebien, teke ve’ele simesane bôte befe, ba ye tôban abui minjuk.”
JAM Ô NE BO:
-
Volô’ô bôte bevok. Benya bemvôé ba volane kom ése, a be ne ôjeja’a ya su’an. Mimfasane miziñ mia liti na, bôte ba volô bôte bevok be nji dañe kone depression a ba ji’a tabe bebiene ndi.
-
Tebe’ été bôte bevok. Môt a tebe été bôte bevok a jeñe na a yem, a wôk avale ba wô’ôtane nlem été. Éyoñe wo yeme tebe été bôte bevok, wo ye ke belane bifia bi ne balé be, bifia wo kuli ane wo bo fianga, ve ô kôme yeme yeme jôme wo bo, a na bifia bite bia ye balé be.
Éyoñe wo yeme tebe été bôte bevok, wo yene tyi’ibi ya jibi be. Nalé a volô na ô sa’ale fulu ôbangam, a na, ô bi kane mvôé ése.
-
Nyoñe’ éyoñe ya tabe a bôte bevok. Abim éyoñe wo tabe a bôte bevok, abime te fe wo ye kui na ô kôme be yem. Nge wo kômbô bi mbamba mvôé, wo yiane kobô mam a nye’e a ma ma fombô nye. Kôme’e ñhe vô’ôlô. Liti’i na wo nyoñe ngap a mam ma fombô nye. Mfasan éziñ ô ndeme liti na, “éyoñe minlañ mi n’édok, mia volô na bôt be dañe wô’ô avak.”
KÔME’E TOBE BEMVÔÉ BÔÉ
ÑYE’ELANE YA BIBLE: “Mbia mewoso ma ndamane mbamba mefulu.”—1 Becorinthien 15:33.
JÔME NALÉ A TINAN: Bôte wo yeñ a be ba ye kôé wo mefulu: mbamba mefulu nge abé mefulu. Bôte ba fase mefulu me môt a binam ba jô na, nyo mvôé a ne bo na ô bi mbamba mefulu nge ke abé mefulu. Éve’an é ne na, môt a ne taté na a nyu ta’a, nge jeñe na a tyam alu’u dé nge a bili bemvôé ba bo nalé.
JAM Ô NE BO: Jeñe’ bemvôé e zañe bôte wo kômbô vu amu be bili mbamba mefulu a mbamba ntaban. Ô ne jeñe na ô yeñ a bôte be nji balé bôte bevok a bifia, bôte be n’ésemen, a bôt be ne anyep.
MIÑYE’ELANE MIFE YA BIBLE
Yene’e bevidéo ba ve beluk, bisoé, a bone be bongô melebe ya Bible asu na be bi mbamba ényiñe nda bôt été
SA’ALE’ BIFIA BIA BALÉ BÔTE BEVOK.
“Bifia biziñ bi ne yené éveves, ve bi bala’an ane nkpwaté mekôn.”—MINKANA 12:18, Mfefé Nkôñelan.
BO’O ANYEP.
“Nlem ô ne ésôs w’aye vem.”—MINKANA 11:25.
NYOÑE’ BÔTE BEVOK AVALE WO YI NA BE NYOÑE WO.
“Mam mese mi anye’e bôt be bo’o mia, bo’ane fe be aval ete.”—MATTHIEU 7:12.
