ZENE JA SOO MEVAK
E vak a abime bi bili a e bo anyep
BIYOÑE TAÑEYA Ô WÔ’ÔYA BÔTE BE VE’E MEVAK, NGE MBAMBA ÉNYIÑ A AKUM? Bemilion be bôte ba kañese ôsimesan ôte be wô’ô lôt abui mewolo me nkolo akekui na be tek, fo’o ve amu ba jeñe moné. Ve, ye akum a moné bia soo benya mevak? Jé mame bia yene den ma liti?
Nlô ajô éziñe ya kalate mefoé ba loone na Journal of Happiness Studies wo jô na, éyoñe bi jaléya miñyiane miangane mi ne bia mfi, e bi abui moné a vo’o volô bia na bi beta bi mevak a lôt abim bi mbili. Moné émien a nji bo ajô. Nlô ajô ya kalate mefoé Monitor on Psychology wo jô na, a ne “ndume bôte ba juan [na be bi moné] nje ja soo minjuk.” Bifia bite bia lu’an a melebe bia koone me Kalate Zambe, melebe me nga vebane den a nto mimbu toyini ébaé, me jô’ô na: “Ôzañ akum ô ne ndi wua ya mbia be mam mevale mese: nde te bôte bevo’o be nga jeñ . . . a be maneya jii bebien a jama alun.” (1 Timothée 6:9, 10) Alun ete e ne bo jé?
WOÑ A ÔYO MOMO AMU BA YIANE KAMAN AKUM. “Ôyo ya môt a bo ésaé ô ne mvaé, to a di tyôtyoé nge abui; ve njaéane bidi ya nkukum w’aye bo te suu nye a ke ôyo.”—Ecclésiaste 5:12.
NTE’ANE NLEM ÉYOÑE BE NJI KUI NA BE BI MAM BA TO BE YANGE’E. A zen éziñ, nte’an ôte wo so amu njeñane moné ô ne ñyian ô vo’o jaléban. Kalate Zambe a jô na: “Nyô a nye’e argent, nlem w’aye ke jaé a argent; nge nyô a nye’e abui, te ke jaé a nkô’ôlane ya abui.” (Ecclésiaste 5:10) A nde fe, ôzañ akum ô ne bo na, môt a biasé mam me ne mfi a mam ma soo mevak, ane mbamba éyoñ a ne lôt a nda bôte jé a bemvôé bé, nge mame ya nsisim.
ÔLUN A MINTAÉ NLEM ÉYOÑE MONÉ NGE NGULE BIA TE VE NA BI BI MONÉ JA JA NTUK. “Te ndeñele womiene na, ô bo kum; jôké’é ñyemane mame wôé womien. Ye w’aye ve mis mfa’a jôm é ne momo? Amu akum d’abo fo’o ebiene mefap, aval ane ndôé j’ayele a ke yôp été.”—Minkana 23:4, 5.
MEFULU MA VOLÔ BIA NA BI BO MEVAK
E YEME VAK A BIÔM BI BILI. “Bi nji soo jôme si nyôna été. Avale te fe bia ye bulan teke kee jôm. Nde nge bi bili bidi a mengômesan, bia yene mvaé.” (1 Timothée 6:7, 8) Bôte be ne mevak be ne teke ke ba kobô menyiñ nge bo bisok a bôte befe, a mboan ôte wo bo be na be bo te bi nsisim éviele. A mbôle be nji tyelé ékpwaé jap vôme be se ngule ya ke kui, ba kamane bebien mfa’a ya mintaé ya nlem, a minlem mi bôô be si.
E BO ANYEP. “Môt a ve, a nyô a nyoñ, nyô a ve a dañe yen ébotan.” (Mam Minlôman 20:35) Bôte be ne anyep be ne mevak amu ba nye’e be va’a bôte bevok ava’a nlem, ja’a na jôme be ne ve é ne ve mon étun éyoñ, nge abime ngul éziñ be bili. Be wô’ô bi abui nye’an, nya ésemé, a benya bemvôé, mame moné a se ngule ya kus!—Luc 6:38.
E TELÉ BÔT ÔSU SA KE BIÔM BI MO. “Esua bijebejeba’a é ne mvaé e vôme nye’an ô né, a dañ avoñe nyak e vôme ziñ é né.” (Minkana 15:17, Mfefé Nkôñelan) Jé éfuse ji ja kômbô liti? E bi mbamba bemvôé ba nye’e wo a dañe mfi a lôt akum. A avale bia ye yen ôsu, nye’an ô ne nya mfii asu ya na bi bo mevak.
Minga éziñe ya Amérique du Sud a to jôé na Sabina, a nga yene mfi ya miñye’elane ya Kalate Zambe. Éyoñe nnôm a nga li’i nye, Sabina a nga biban a ngul ése na a toñ émien a bengo bé bebaé. A mbe a bili mesu m’ésaé mebaé; a mbe a vee ndibe tyé, mewolo 4. Akusa bo a mbe a yeme, Sabina a nga tyi’i na a yé’é Bible. Nalé a nga soo nye jé?
A nji bi moné a lôt abim a mbe a bili. Ve, ôsimesane wé a lat a ényiñ ô nga tyendé. A nga bi meva’a môt a ne bi éyoñ a jalé miñyiane mié mfa’a ya nsisim. (Matthieu 5:3) A nga bi benya bemvôé e zañe bebo bisaé be Zambe. A nga bi meva’a ma so éyoñe ba volô bôte bevo’o na be’ fe be yeme benya mejôô.
Kalate Zambe a jô na: ‘Fek ja kabe amu mimbooné mié.’ (Matthieu 11:19, Mfefé Nkôñelan) Bifia bite bia liti na, e yeme vak a abime bi bili, e bo anyep, a e telé bôt ôsu sa ke biôm bi mo, a ne mame bia yiane bo!
