Niadtong Septiyembre 15, 2024, gibuksan sa Sachsenhausen Memorial and Museum sa Oranienburg, Germany, ang temporaryong exhibit nga gitawag ug “Jehovah’s Witnesses Stand Firm Against Nazi Assault.” Magpabiling bukas ang exhibit hangtod sa tungatunga sa Disyembre 2024. Gibuksan ang exhibit atol sa ika-85 nga anibersaryo sa pagpatay kang Brader August Dickmann. Si August ang unang nailhan nga midumili sa pagsundalo ug gipatay tungod sa relihiyon ubos sa pagmando sa Nazi.

Gipamatay sa gobyerno sa Nazi ang kapig 280 ka Saksi ni Jehova nga gisentensiyahan ug kamatayon kay midumili sila sa pagsundalo. Ang 33 ka display panel sa exhibit naay mga text ug mga picture nga naghisgot sa mga eksperyensiya sa pipila niining matinumanong mga Saksi. Usa niini mao ang eksperyensiya ni Sister Emmy Zehden. Niadtong Hunyo 9, 1944, siya gipatay sa prisohan sa Plötzensee sa Berlin, Germany, kay maisogon niyang gitagoan ang iyang sinagop nga si Horst, si Gerhard Liebold, ug si Werner Gaßner. Kining tulo ka brader midumili sa pagsundalo.

Panahon sa opening ceremony sa exhibit, giinterbiyo si Brader Hans-Joachim Rehwald bahin sa iyang papa nga si Josef. Niadtong 1938, si Josef midumili nga mahimong sundalo sa Germany. Mao nga gidakop siya ug gisentensiyahan ug usa ka tuig nga pagkapriso. Sa ulahi, napriso siya sa tulo ka concentration camp, apil ang Sachsenhausen. Nakita pod niya ang pagpatay kang August Dickmann. Bisan pa sa daghang pagsulay, si Josef nagpabiling matinumanon kang Jehova. Human ma-tour ang exhibit, ang usa ka brader miingon: “Bilib kaayo ko sa kaandam mosakripisyo sa mga igsoon niadtong panahona aron magpabiling neyutral. Andam pa gani nilang isakripisyo ang ilang kinabuhi. Gusto pod kong magpabiling matinumanon kang Jehova bisag unsa pay mahitabo.”

Gipabilhan gyod nato ang atong mga igsoon nga maisogong mibarog batok sa pagmando sa Nazi. Sa pagkakaron, daghan gihapong Saksi ang padayong gilutos tungod sa pagpabiling neyutral. Kining talagsaong ehemplo sa atong mga igsoon sa pagkamaunongon kang Jehova magpasalig kanato nga kita tabangan ug palig-onon ni Jehova dihang mag-atubang tag mga pagsulay.—1 Pedro 5:10.