Niadtong Septiyembre 17, 2024, ang Grand Chamber sa European Court of Human Rights nagkahiusa sa desisyon nga ang katungod sa pasyente sa pagpili ug paagi sa pagtambal nga nahiuyon sa iyang personal nga tinuohan kinahanglang tahoron. Kining importante kaayo nga desisyon wala lang mag-obligar sa Spain kondili sa tanang 46 ka estado pod nga membro sa Council of Europe nga tahoron ang katungod sa pasyente sa pagpili ug paagi sa pagtambal nga iyang dawaton.

Niadtong Hunyo 2018, ang 47 anyos nga si Sister Rosa Pindo Mulla gi-admit sa ospital sa Madrid, Spain, aron himoon ang usa ka medical procedure nga dili ra komplikado. Sa wala pa ang procedure, gihatagan ni Rosa ang iyang mga doktor ug advance health-care directive ug iyang giingnan sila nga tungod sa iyang personal nga tinuohan ug sa iyang nabansay sa Bibliya nga konsensiya, dili siya magpaabono ug dugo. (Buhat 15:28, 29) Gisulat sa staff sa ospital ang mga instruksiyon ni Rosa diha sa medical chart niini. Pero wala kabalo si Rosa nga giawtorisahan diay sa usa ka huwes ang mga doktor ni Rosa sa paghimog komplikadong operasyon ug sa pag-abonog dugo kaniya. Human sa operasyon, puwerteng guola ni Rosa pagkabalo niya nga gibalewala sa staff sa ospital ang iyang klarong instruksiyon nga dili magpaabonog dugo.

Sa pagpahibalo sa hukom sa kaso nga Pindo Mulla v. Spain, ang tanang 17 ka huwes sa Grand Chamber nagkauyon nga “ang usa ka adulto nga pasyente naay katungod sa pagdumili” sa bisan unsang medikal nga pag-atiman nga dili niya gusto. Gikompirmar pod sa korte nga “ang usa sa pinakaimportanteng balaod sa health care mao ang pagtahod sa katungod sa pasyente sa pagdawat o pagdumili sa usa ka paagi sa pagtambal.”

Ingong nagkahiusa nga tibuok kalibotang panag-igsoonay, nalipay ta sa desisyon sa korte nga nagsuportar sa katungod ni Sister Pindo Mulla ug sa minilyong uban pa sa pagpilig medikal nga pagtambal nga nahiuyon sa ilang personal nga tinuohan ug prinsipyo.