Ang Bibliya nagtagna nga ang mga kamatay (kaylap nga mga sakit, apil ang mga pandemic) mahitabo sa kataposang mga adlaw. (Lucas 21:11) Ang maong mga pandemic dili silot gikan sa Diyos. Gani, pinaagi sa iyang Gingharian, taposon sa Diyos sa dili madugay ang tanang problema sa panglawas, apil ang mga pandemic.

•  Gitagna ba sa Bibliya ang mga pandemic?

•  Diha bay higayon nga gisilotan sa Diyos ang mga tawo pinaagig sakit?

•  Ang mga pandemic ba karon silot gikan sa Diyos?

•  Matapos ba ang mga pandemic?

•  Mga teksto sa Bibliya bahin sa sakit

 Ang Bibliya wala magtagna ug espesipikong mga pandemic o sakit, sama sa COVID-19, AIDS, o Spanish flu. Pero gitagna niini ang mga “kamatay” ug “makamatayng hampak.” (Lucas 21:11; Pinadayag 6:8) Kini nga mga panghitabo maoy bahin sa ilhanan sa “kataposang mga adlaw,” nga gitawag sab ug “hinapos sa sistema sa mga butang.”​—2 Timoteo 3:1; Mateo 24:3.

 Ang Bibliya naghisgot ug pipila ka higayon diin gisilotan sa Diyos ang mga tawo pinaagig sakit. Pananglitan, may pipila ka tawo nga gisilotan niyag sanla. (Numeros 12:1-16; 2 Hari 5:20-27; 2 Cronicas 26:16-21) Pero kining pipila ka pananglitan dili samag mga pandemic nga makaapektar kang bisan kinsa, apil sa inosenteng mga tawo. Hinunoa, ang maong mga panghitabo maoy espesipikong paghukom sa mga tawo nga klarong mirebelde sa Diyos.

 Dili. Ang pipila nangangkon nga gigamit sa Diyos ang mga pandemic ug ang ubang sakit aron silotan ang mga tawo karon. Pero, wala suportahi sa Bibliya ang maong pangangkon. Ngano?

 Ang usa ka rason mao nga ang pipila ka magsisimba sa Diyos​—kaniadto ug karon—​nasakit. Pananglitan, ang matinumanong tawo nga si Timoteo ‘pirmeng nasakit.’ (1 Timoteo 5:23) Pero wala mag-ingon ang Bibliya nga timailhan ni nga wala siya uyoni sa Diyos. Mao sab karon. Ang pipila ka matinumanong alagad sa Diyos masakit o mataptan ug sakit. Kasagaran, nataptan sila kay naa sila sa sayop nga lugar sa sayop nga panahon.​—Ecclesiastes 9:11.

 Dugang pa, ang Bibliya nagtudlo nga wala pa moabot ang panahon nga silotan sa Diyos ang mga daotan. Hinunoa, kita nagkinabuhi “sa adlaw sa kaluwasan”​—sa ato pa, sa panahon diin ang Diyos mainitong nagdapit sa tanan nga makigsuod kaniya aron maluwas. (2 Corinto 6:2) Pananglitan, nagdapit siya sa tanan pinaagi sa tibuok kalibotang buluhaton nga pagsangyaw sa positibong mensahe​—ang “maayong balita sa Gingharian.”​—Mateo 24:14.

 Oo. Ang Bibliya nagtagna nga sa dili madugay, moabot ang panahon nga wala nay masakit. Ubos sa pagmando sa iyang Gingharian, ayohon sa Diyos ang tanang problema sa panglawas. (Isaias 33:24; 35:5, 6) Iyang wad-on ang pag-antos, kasakit, ug kamatayon. (Pinadayag 21:4) Ug iyang banhawon ang mga nangamatay aron matagamtam nila ang maayong panglawas dinhi sa yuta ubos sa hingpit nga mga kahimtang.​—Salmo 37:29; Buhat 24:15.

 Pinadayag 6:8: “Tan-awa! usa ka luspad nga kabayo, ug ang nagsakay niini ginganlag Kamatayon. Ug ang Lubnganan nagsunod sa iyang luyo. Ug gihatagan silag awtoridad . . . sa pagpamatay pinaagig . . . makamatayng hampak.”

 Kahulogan: Ang tagna bahin sa upat ka mangangabayo diha sa Pinadayag nagpakita nga ang mga pandemic mahitabo sa atong panahon.