Daghan ang nag-isip sa krus ingong labing komon nga simbolo sa Kristiyanidad. Apan, ang Bibliya wala maghubit sa instrumento nga diha niana si Jesus namatay, mao nga walay bug-os makatino sa porma niini. Bisan pa niana, ang Bibliya nagpamatuod nga si Jesus namatay, dili sa krus, kondili sa tul-id nga estaka.

 Ang Bibliya sagad naggamit sa Gregong pulong nga stau·rosʹ dihang magtumong sa instrumento nga diha niana si Jesus gipatay. (Mateo 27:40; Juan 19:17) Bisag sagad kining gihubad nga “krus,” daghang eskolar nagkauyon nga ang pangunang kahulogan niini maoy “tul-id nga estaka.” a Sumala sa A Critical Lexicon and Concordance to the English and Greek New Testament, ang stau·rosʹ “wala gayod magkahulogag duha ka pirasong kahoy nga nagkuros.”

 Ang Bibliya naggamit usab sa Gregong pulong nga xyʹlon ingong sinonimo sa stau·rosʹ. (Buhat 5:30; 1 Pedro 2:24) Kining pulonga nagkahulogag “troso,” “estaka,” o “kahoy.” b Busa, ang The Companion Bible mihinapos: “Wala ganiy Gregong pulong diha sa B[ag-ong] T[ugon] nga nagpasabot ug duha ka pirasong kahoy.”

Dalawaton ba sa Diyos ang paggamit ug krus diha sa pagsimba?

 Bisag unsa pay porma sa instrumento nga diha niana si Jesus namatay, ang mosunod nga mga kamatuoran ug mga teksto sa Bibliya nagpakita nga dili gayod kita angayng mogamit ug krus diha sa pagsimba.

1.   Gisalikway sa Diyos ang pagsimba nga naggamit ug mga imahen o simbolo, lakip na ang krus. Ang Diyos nagsugo sa mga Israelinhon nga dili mogamit ug “dagway sa bisan unsang simbolo” sa ilang pagsimba, ug ang mga Kristohanon gisugo usab sa ‘pagkalagiw gikan sa idolatriya.’—Deuteronomio 4:15-19; 1 Corinto 10:14.

2.   Ang unang-siglong mga Kristohanon wala mogamit ug krus diha sa pagsimba. c Ang mga pagtulon-an ug panig-ingnan sa mga apostoles naghatag ug sumbanan nga angayng sundon sa tanang Kristohanon.—2 Tesalonica 2:15.

3.   Ang paggamit ug krus diha sa pagsimba dunay paganong sinugdanan. d Gatosan ka tuig human sa kamatayon ni Jesus, dihang ang mga simbahan mitipas gikan sa iyang mga pagtulon-an, ang bag-ong mga membro sa simbahan “gitugotan sa paghupot sa ilang paganong mga timaan ug simbolo,” nga naglakip sa krus. (The Expanded Vine’s Expository Dictionary of New Testament Words) Apan, ang Bibliya wala mokonsentir sa pagsagop sa paganong mga simbolo aron makakabig ug bag-ong mga membro.—2 Corinto 6:17.