Unsay Hitsura sa Yawa?

I-PLAY

Tubag sa Bibliya

Ang Yawa maoy dili makitang espiritung persona, nga nagpasabot nga wala siyay lawas nga atong makita.—Efeso 6:11, 12.

Sa mga drowing, ang sagad nga hitsura sa Yawa maoy samag kanding nga linalang nga may mga sungay, ikog, ug kahig. Ang pipila nag-ingon nga ang unang nagdrowing ug ingon niana mao ang mga artist nga nabuhi kapig 1,000 ka tuig kanhi. Ug posible nga naimpluwensiyahan sila sa mga estorya sa katigulangan ug sa karaang mitolohiya.

Unsay giingon sa Bibliya bahin sa Yawa?

Ang Bibliya naggamit ug lainlaing pagtandi maylabot sa Yawa. Kini makatabang nato nga mahibaloan, dili ang iyang hitsura, kondili ang iyang personalidad. Apil sa maong mga pagtandi ang mosunod:

Anghel sa kahayag. Siya nagpakaaron-ingnon nga nagtanyag ug butang nga maayo aron ang mga tawo mosunod sa iyang pagtulon-an imbes nianang sa Diyos.—2 Corinto 11:14.
Leyon nga nagngulob. Siya nag-atake sa mga magsisimba sa Diyos.—1 Pedro 5:8.
Dakong dragon. Siya makahahadlok, gamhanan, ug nagpahinabog grabeng kadaot.—Pinadayag 12:9.

Mga teksto sa Bibliya bahin sa Yawa

2 Corinto 11:14: “Si Satanas kanunayng nagpakaaron-ingnong anghel sa kahayag.”

Kahulogan: Si Satanas nagpakaaron-ingnong maayo aron malimbongan ang mga tawo sa pagsunod sa iyang mga pagtulon-an imbes nianang sa Diyos.
Efeso 6:11: “Isul-ob ang kompletong armadura gikan sa Diyos aron lig-on mong makabarog batok sa mga lit-ag sa Yawa.”

Kahulogan: Ang Yawa naggamit ug daotang mga taktika aron ang mga tawo mosupak sa Diyos.
Santiago 4:7: “Pagpasakop mo sa Diyos; apan sukli ang Yawa, ug siya mokalagiw gikan kaninyo.”

Kahulogan: Masuklan sa usa ka tawo si Satanas pinaagi sa pagsunod sa Diyos imbes sa Yawa.
1 Pedro 5:8: “Ang inyong kaaway, ang Yawa, naglibotlibot nga samag leyon nga nagngulob, nga nangitag matukob.”

Kahulogan: Ang Yawa nagdumot niadtong nagsunod sa Diyos, ug gusto niyang daoton ang ilang relasyon Kaniya.