“Ayawg kabalaka sa bisan unsa, apan sa tanang butang ipahibalo sa Diyos ang inyong mga hangyo pinaagi sa pag-ampo ug pangamuyo uban ang pagpasalamat; ug ang kalinaw nga gikan sa Diyos, nga labaw sa tanang pagsabot, magbantay sa inyong kasingkasing ug hunahuna pinaagi ni Kristo Jesus.”—Filipos 4:6, 7, Bag-ong Kalibotang Hubad.

 “Ayaw kamo kabalaka sa bisan unsa kondili pangayoa sa Dios ang inyong gikinahanglan uban ang pagpasalamat sa tanan ninyong pag-ampo. Ug ang kalinaw sa Dios nga dili matugkad sa tawo, manalipod sa inyong kasingkasing ug hunahuna diha sa inyong pagkahiusa kang Cristo Jesus.”—Filipos 4:6, 7, Ang Bag-ong Maayong Balita Biblia.

 Dihang ang mga magsisimba sa Diyos sobrang mabalaka, sila makaampo kaniya alang sa paghupay. Siya nagsaad nga hatagan silag kalinaw sa hunahuna, nga makatabang nila sa pag-atubang sa ilang mga kabalaka ug manalipod sa ilang hunahuna ug emosyon. Gihisgotan sa bersikulo 6 ang mga klase sa pag-ampo nga makatabang nila sa pagbaton sa maong kalinaw.

 Ang mga pangamuyo maoy mga pag-ampo diin ang usa ka tawo sinserong magpakiluoy alang sa tabang sa Diyos. Siya lagmit mangamuyo sa Diyos dihang ma-stress o naa sa kapeligrohan, sama sa gihimo ni Jesus. (Hebreohanon 5:7) Sagad ang maong mga pag-ampo balikbalik nga himoon.

 Makahimo sab tag espesipikong mga hangyo sa Diyos. Ang iyang mga magsisimba makahangyo “sa tanang butang,” o “sa bisan unsa,” nga ilang gikinahanglan. Pero ang maong mga pag-ampo kinahanglang uyon sa kabubut-on sa Diyos nga mabasa sa Bibliya.—1 Juan 5:14.

 Ang pagpasalamat ngadto sa Diyos maoy pagpahayag sa atong apresasyon sa tanan niyang nahimo ug himoon para kanato. Kon magpokus ta sa mga rason kon nganong angay tang magpasalamat sa Diyos, makatabang ni nato nga magpabiling malipayon.—1 Tesalonica 5:16-18.

 Tubagon sa Diyos ang maong mga pag-ampo, ug hatagan niyag kalinaw ang iyang mga magsisimba. “Ang kalinaw nga gikan sa Diyos” nagtumong sa kalinaw nga resulta sa suod nga panaghigalaay uban kaniya. (Roma 15:13; Filipos 4:9) Kini nga kalinaw “labaw sa tanang pagsabot” kay kini gikan sa Diyos ug ang ikatabang niini labaw pa sa atong gidahom.

 Ang teksto nag-ingon nga ang kalinaw nga gikan sa Diyos magbantay sa atong kasingkasing. Ang Gregong pulong nga gihubad ug “magbantay” maoy termino nga naghubit sa ginahimo sa mga sundalo aron bantayan ang usa ka kinutaang siyudad. Sa susama, ang kalinaw nga gikan sa Diyos manalipod sa emosyon ug hunahuna sa usa ka tawo. Kini makatabang aron dili siya malumsan sa grabeng mga problema.

 Ang kalinaw nga gikan sa Diyos manalipod nato “pinaagi ni Kristo Jesus,” tungod kay pinaagi kang Jesus kita mahimong higala sa Diyos. Gihatag ni Jesus ang iyang kinabuhi ingong halad lukat sa atong mga sala. Kon duna tay pagtuo niya, panalanginan ta sa Diyos. (Hebreohanon 11:6) Pinaagi sab kang Jesus, kita makaduol sa Diyos. Si Jesus miingon: “Walay makaadto sa Amahan kon dili pinaagi kanako.”—Juan 14:6; 16:23.

 Ang basahon sa Filipos maoy sulat ni apostol Pablo sa mga Kristohanon nga nagpuyo sa siyudad sa Filipos. a Sa kapitulo 4 sa maong basahon, gidasig ni Pablo ang mga Kristohanon sa kongregasyon nga maglipay, ug iyang gipasalamatan sila sa ilang pagkamahinatagon, nga naghatag niyag kalipay. (Filipos 4:4, 10, 18) Iyang gipakita kon sa unsang paagi ang pag-ampo moresultag kalinaw nga gikan sa Diyos, ug iyang gihisgotan kon unsang mga butang ang angay natong hunahunaon ug buhaton aron madawat ang tabang gikan sa “Diyos sa kalinaw.”—Filipos 4:8, 9.