Nahibaloan sa iyang asawa ang iyang sekreto. Puwerte niyang pangayog pasaylo. Misaad siya nga mohunong na, ug gituman to niya. Pero wala to magdugay kay nahimo na pod to niya pag-usab. Nahibaloan na pod ni sa iyang asawa, nangayo siyag pasaylo, ug misaad na pod nga mohunong.

 Naa ba ka sa ingon ana nga situwasyon? Kon mao, kinahanglan nimong masabtan kon sa unsang paagi ang pagtan-awg pornograpiya nakaapektar sa imong kapikas ug kon unsay puwede nimong himoon aron mahunong ni ug di na gyod himoon pag-usab. a

Niining artikuloha

•  Ang angay nimong mahibaloan

•  Ang imong mahimo

•  Kon ang imong bana nagtan-awg pornograpiya

 Ang pornograpiya makabungkag sa kaminyoon. Tungod niini, ang inosenteng kapikas masuko tingali ug mawad-an nag pagsalig. b

 Kon ang bana nagtan-awg pornograpiya, ang iyang asawa tingali mobati sa mosunod:

•   Giluiban. Si Sarah miingon, “Gibati nako nga morag balikbalik nga nanapaw ang akong bana.”

•   Naay kulang kaniya. Ang usa ka asawa naulaw ug mibati nga dili siya guwapa kay ang iyang bana nagatan-awg pornograpiya.

•   Wala nay pagsalig. “Dudahan na nako ang tanang lihok sa akong bana,” miingon si Helen.

•   Kabalaka. Si Catherine miingon, “Grabe ang akong kabalaka sa pagtan-awg pornograpiya sa akong bana, nga tungod ana, mao na lang nay pirmeng naa sa akong hunahuna.”

 Hunahunaa kini: Gisugo sa Bibliya ang bana nga higugmaon ang iyang asawa. (Efeso 5:25) Iya ba nang gituman kon siya ang hinungdan nga gibati sa iyang asawa ang usa sa mga gihisgotan sa ibabaw?

 Ang bisyo sa pagtan-awg pornograpiya dili sayon hunongon. “Nahunong sa akong bana ang pagpanigarilyo, paggamit ug marijuana, ug pag-inom-inom,” miingon si Stacey, “pero naglisod pa siyag hunong sa pagtan-awg pornograpiya.”

 Kon ingon ana ang imong kahimtang, ang mosunod nga mga sugyot makatabang nimo nga mahunong ni ug di na gyod himoon pag-usab.

•   Sayra kon nganong daotan ang pornograpiya. Ang pornograpiya magpalihok sa usa ka tawo nga himoon ang tanan sa pagtagbaw sa iyang kaugalingon, nga makawala sa gugma, pagsalig, ug pagkamaunongon nga importante aron magmalipayon ang kaminyoon. Ang paghimo pod niini nagpakitag kawalay-pagtahod sa Tigmugna sa kaminyoon, si Jehova nga Diyos.

   Prinsipyo sa Bibliya: “Angayng tahoron sa tanan ang kaminyoon.”—Hebreohanon 13:4.

•   Ayaw ibasol sa uban ang imong gihimo. Ayawg ingon, ‘Di man unta ko motan-awg pornograpiya kon mas mapinanggaon pa ang akong asawa.’ Dili makataronganon kon imong basolon ang imong asawa, kay puwede ni nimong himoong rason nga motan-aw pag-usab ug pornograpiya kon naay mahimo ang imong asawa nga wala ka ganahi.

   Prinsipyo sa Bibliya: “Ang matag usa masulayan dihang siya ginadani ug ginahaylo sa iyang kaugalingong tinguha.”—Santiago 1:14.

•   Magmatinud-anon sa imong kapikas. Si Kevin miingon: “Kada adlaw, sultihan nako ang akong asawa kon nagpadala ba ko sa tentasyon o wala. Kini nagpabati niya nga wala koy gitago niya.”

   Prinsipyo sa Bibliya: “Gusto namong magmatinud-anon sa tanang butang.”—Hebreohanon 13:18.

•   Pag-amping kanunay. Bisag pila na ka tuig nga nahunong nimo ang maong bisyo, puwede gihapon ning mobalik. Si Kevin, nga gihisgotan ganina, miingon: “Napulo ka tuig na nakong nahunong ang pagtan-awg pornograpiya ug abi nakog di na ni mobalik. Pero ang tinuod, wala pa ni mawala. Naghulat lang nig kahigayonan nga mobalik pag-usab.”

   Prinsipyo sa Bibliya: “Siya nga naghunahuna nga siya nagbarog magbantay nga dili siya mapukan.”—1 Corinto 10:12.

•   Kon nag-atubang ka sa tentasyon, paghunahuna una. Bisag dili nimo mapugngan nga motungha ang sayop nga tinguha, makapili ka kon magpadaog ba ka niini o dili. Ang tinguha dali rang molabay—tingali mas dali pa gani ning mawala kon maghunahuna kag laing mga butang.

   Prinsipyo sa Bibliya: ‘Ang matag usa ninyo kinahanglang mahibalo kon unsaon pagkontrolar sa iyang lawas aron magpabilin kining balaan ug dungganon. Ayawg sundoga ang mga tawo nga hakog ug walay pagpugong sa ilang gana sa sekso.’—1 Tesalonica 4:4, 5.

•   Likayi ang mga situwasyon nga makapukaw sa sayop nga tinguha. “Dihang naa ka sa makapatental nga situwasyon,” miingon ang librong Willpower’s Not Enough, “sama nig nagdagkot kag posporo. Gamay na lang nga sugnod . . . mosilaob na ang kalayo.”

   Prinsipyo sa Bibliya: “Hinaot walay daotan nga magdominar nako.”—Salmo 119:133.

•   Ayawg wad-a ang imong paglaom. Posible nga dugay pa—dangtan pa ganig mga tuig—ayha mabalik ang pagsalig sa imong kapikas kanimo. Pero gipakita sa mga eksperyensiya nga posible ni.

   Prinsipyo sa Bibliya: “Ang gugma taas ug pailob.”—1 Corinto 13:4.