Kaniadto, ang mga siyentista nagtuo nga suyopon sa dila sa hummingbird ang nectar pinaagig proseso nga gitawag ug capillary action, diin ang mga likido mosaka rag iya diha sa nigpis nga tubo. Pero base sa bag-ong mga pagtuon, ilang nadiskobrehan nga kini nga langgam naggamit ug mas maayong paagi—pondohon niini ang nectar diha sa iyang dila.

 Hunahunaa: Dihang ang dila sa hummingbird matuslo sa nectar, kini matunga ug magsanga. Sa tumoy sa matag sanga, dunay morag gagmayng brush nga nakatiklop. Dihang ang mga sanga matuslo sa nectar, mabukhad ang mga brush niini ug ang mga tumoy sa dila mobuka. Tungod niana, makuha sa langgam ang nectar pinaagi sa pagtilap imbes sa pagsuyop niini. Dihang ipabalik na sa hummingbird ang dila niini, matiklop ang mga brush sa mga sanga sa tumoy sa dila ug mapondo sa sulod ang nectar.

 Kining tanan mahitabo nga “wala ray 0.1 segundos,” miingon ang mga researcher nga si Alejandro Rico-Guevara, Tai-Hsi Fan, ug Margaret Rubega. Sila midugang: “Ang tumoy sa dila maoy maayo kaayong device nga maka-trap o makapondog likido ug maka-adjust dayon dihang matuslo sa likido.”

 Dugang pa, ang hummingbird dili mogamit ug bisan unsang enerhiya sa paghimo niini. Tungod sa porma ug pagkadisenyo sa mga tumoy sa dila sa langgam, awtomatiko ning mabukhad dihang matuslo sa likido ug matiklop dihang mahaw-as na kini.

 Kay ang dila sa hummingbird episyente kaayo sa pag-trap o pagpondog likido, nagtuo ang mga researcher nga ang disenyo niini magamit sa medisina, robotics, ug ubang field. Puwede sab ning makatabang sa pagdisenyog mga tool nga magamit sa paglimpiyo ug mga likido o oil spill.

 Unsay imong hunahuna? Ang komplikadong dila ba sa hummingbird mitungha pinaagig ebolusyon? O gidisenyo kini?