Ang diabolical ironclad beetle (Phloeodes diabolicus) nagpuyo sa kasadpang North America. Sumala sa mga researcher, kini nga bakukang makadaog ug gibug-aton nga mga 39,000 ka pilo sa gibug-aton sa lawas niini ug mabuhi gihapon ni bisag maligsan ug sakyanan. Sa unsang paagi mahimo ni sa maong bakukang?

 Ang ibabaw ug ubos nga bahin sa kabhang sa bakukang nasumpay sa mga giringgiring (ridge) sa isigkakilid niini. Ang usa ka klase sa giringgiring lig-on ug dili maunsa dihang maduot maong mapanalipdan ang importanteng mga organo. Ang laing klase niini dili kaayo gahi maong mas daling mausab ang porma niini. Ang usa pa ka klase sa giringgiring makatabang nga malihok ang kabhang sa bakukang. Kay flexible ang maong klase sa giringgiring, ang bakukang makasuksok sa ilalom sa panit sa kahoy o makatago sa mga giwang sa bato.

 Dugang pa, dunay linya nga morag nagpikas sa kabhang sa bakukang. Kini nga linya dunay daghang tunggoytunggoy nga gitawag ug blade nga nagkatakdo samag mga piraso sa jigsaw puzzle. Tungod niini, mabahin ang kabug-at sa bisan unsa nga modat-og o moduot niini. Ang mga blade gama sa mga layer sa tisyu nga nagtapot pinaagig mga protina. Dihang maduot, mangliki ang mga protina pero maulian ra ni sa ulahi. Tungod niining gagmayng mga liki, ma-absorb sa blade ang presyur pero dili kini malugti.

 Ang mga researcher nag-ingon nga ang kabhang niini nga bakukang puwedeng sundogon sa pagdisenyog mga sakyanan, tulay, bilding, ug uban pa, nga dili maunsa bisan pag mabangga o matay-og.

 Unsay imong hunahuna? Ang kabhang ba sa diabolical ironclad beetle resulta sa ebolusyon? O gidisenyo kini?