Salamat sa imong interes sa paghimog report bahin sa mga kalihokan sa mga Saksi ni Jehova. Kini nga giya giandam aron tabangan ka sa espeling ug kahulogan sa mga termino nga gigamit sa among relihiyon. Kon duna kay pangutana bahin sa topiko nga wala mahisgoti niini nga giya, palihog kontaka ang sangang buhatan sa mga Saksi ni Jehova.

Ang Bantayanang Torre Nagapahayag sa Gingharian ni Jehova. Ang kompletong ulohan sa pangunang magasin nga gi-publish ug gipanagtag sa mga Saksi ni Jehova. Gitawag sab ni nga Ang Bantayanang Torre. Ang ngalan niini nagpakita nga kini nga magasin motabang sa mga magbabasa nga padayong magbantay sa katumanan sa mga katuyoan sa Diyos. (Mateo 24:42) Ang publikong edisyon sa Ang Bantayanang Torre gitanyag nga walay bayad ngadto sa mga interesado. Ang tun-anang edisyon sa Ang Bantayanang Torre gigamit para sa senemanang pangutanag tubag nga panaghisgot sa mga kongregasyon sa tibuok kalibotan. Ang Bantayanang Torre walay hunong nga gi-publish sukad niadtong 1879. Usa ni sa kinadaghanan nga naapod-apod nga mga magasin sa tibuok kalibotan.

ansiyano. Hamtong sa espirituwal nga lalaking Saksi nga gitudlo aron magtudlo ug mag-atiman alang sa kaayohan sa matag usa sa kongregasyon. Kinahanglang padayon nga makab-ot sa usa ka ansiyano ang mga kuwalipikasyon nga gihisgotan sa Bibliya diha sa 1 Timoteo 3:1-7; Tito 1:5-9; Santiago 3:17, 18; ug 1 Pedro 5:2. Ang mga ansiyano walay suweldo ug dili mga empleyado sa ilang kongregasyon o sa bisan unsang korporasyon sa mga Saksi ni Jehova. Kadaghanang ansiyano nagtrabaho aron masuportahan ang ilang kaugalingon ug ang ilang pamilya. Kay walay mga posisyon diha sa organisasyon sa mga Saksi, ang mga ansiyano dili labaw sa ubang mga igsoon sa kongregasyon. Kini nga termino wala gamita ingong titulo sa pagpasidungog.

asembliya. Tan-awa:  sirkitong asembliya.

Assembly Hall sa mga Saksi ni Jehova. Usa ka dakong dapit sa pagsimba nga gipanag-iya sa mga Saksi ni Jehova ug gigamit alang sa dagkong panagkatigom sa daghang kongregasyon sa usa ka espesipikong lugar. Kini puwedeng tawgon nga “Assembly Hall.”

Bag-ong Kalibotang Hubad sa Balaang Kasulatan. Ang kompletong ulohan sa Hebreohanong Kasulatan (“Daang Tugon”) ug Gregong Kasulatan (“Bag-ong Tugon”) nga gihubad ug gi-publish sa mga Saksi ni Jehova. Puwede sab ning tawgon nga Bag-ong Kalibotang Hubad.

Bethel, Bethelite, pamilyang Bethel. Ang “Bethel” maoy usa ka Hebreohanong termino nga nagkahulogan ug “Balay sa Diyos.” Kini ang tawag sa mga pasilidad nga gigamit sa mga Saksi ni Jehova sa pagdumala ug pagsuportar sa ilang binase sa Bibliya nga mga kalihokan sa matag nasod o rehiyon. Ang mga Saksi nga nag-alagad niini nga mga pasilidad maoy bahin sa usa ka relihiyosong organisasyon ug gitawag ug mga “Bethelite.” Wala silay suweldo. Ingong grupo, gitawag silag “pamilyang Bethel” kay, sama sa usa ka pamilya, sila nagkinabuhi, nagsimba, ug nagtrabaho nga magkauban niini nga mga pasilidad. Ang terminong “Bethelite” wala gamita ingong titulo sa pagpasidungog.

brader. Usa ka bawtismadong lalaki nga Saksi ni Jehova. Dako ang unang letra niini kon isumpay sa apelyido sa usa ka lalaking Saksi (pananglitan, Brader Smith). Wala ni gamita ingong titulo sa pagpasidungog. Ingon niini sab ang ginahimo sa usa ka babayeng Saksi (pananglitan, Sister Smith).

Gilead, Gilead School. Pinamubo sa Watchtower Bible School of Gilead, nga naestablisar niadtong 1943. Sa primero, tunghaan ni sa pagbansayg mga misyonaryo. Karon, lima ni ka bulan nga kurso sa pagtuon sa Bibliya para sa mga Saksi ni Jehova nga gidapit niini nga tunghaan. Gagmayng letra ang “school” o “tunghaan” kon dili ni sumpay sa “Gilead.”

 internasyonal nga kombensiyon. Tulo ka adlaw nga panagkatigom alang sa pagsimba ug pagtuon sa Bibliya nga giorganisar sa mga Saksi ni Jehova ug himoon matag pipila ka tuig sa gipili nga mga siyudad sa tibuok kalibotan. Ang mga Saksi sa lainlaing nasod imbitado nga motambong ingong mga delegado. Kini nga mga kombensiyon bukas sa publiko ug ang katuyoan niini mao ang pagtabang sa mga nanambong nga mas masuod sa Diyos ug mapalig-on ang panaghiusa sa mga Saksi ni Jehova sa tibuok kalibotan. Sagad ang mga internasyonal nga kombensiyon himoon diha sa inabangang mga pasilidad ug magsugod sa Biyernes hangtod sa Dominggo. Kini walay bayad ug walay himoong pagpangolekta.

Jehova. Ang personal nga ngalan sa labing gamhanang Diyos ug Maglalalang sumala sa gipaila sa Kasulatan. (Salmo 83:18) Dili angayng tawgong “Jehova” (pananglitan, “Jehova na siya”) ang usa ka Saksi ni Jehova.

Jesu-Kristo. Ang bugtong nga Anak sa Diyos. (Juan 3:16) Giisip sa mga Saksi ni Jehova si Jesu-Kristo ingong ilang Lider ug naningkamot sila nga sundogon ang iyang ehemplo ug sundon ang iyang mga pagtulon-an. Para sa mga Saksi, siya ang labing bantogang tawo nga nabuhi sukad, ang pangunang Saksi ni Jehova, ug ang gamiton ni Jehova nga Diyos sa pagluwas sa katawhan.—Isaias 9:6, 7; Pinadayag 1:5.

kaigsoonan. Tibuok kalibotang panag-igsoonay sa mga Saksi ni Jehova.—1 Pedro 5:9.

Kingdom Hall sa mga Saksi ni Jehova. Dapit sa pagsimba nga gigamit sa usa ka kongregasyon o kapin pa. Sagad gitawag nig “Kingdom Hall.” Palihog ayaw gamita ang termino nga “simbahan.”

kombensiyon. Tan-awa:  internasyonal nga kombensiyon ug  rehiyonal nga kombensiyon.

Komite sa Sangang Buhatan. Sa matag sangang buhatan, dunay tulo o kapin pa nga mga ansiyano nga itudlo ingong membro sa Komite sa Sangang Buhatan aron magdumala sa mga kalihokan sa nasod o sa mga nasod nga sakop sa maong sangang buhatan.

kongregasyon. Usa ka organisadong grupo sa mga Saksi nga regular nga nagtigom alang sa pagsimba. Usa ka grupo sa mga ansiyano ang gitudlo sa pagdumalag lainlaing programa sa pagtudlo nga gibase sa Bibliya ug sa paghatag ug espirituwal nga giya alang sa kongregasyon ingong grupo ug ingong indibiduwal. Ang mga tigom sa kongregasyon bukas sa publiko. Kini walay bayad ug walay himoong pagpangolekta.

magmamantala. Ang usa kinsa bahin sa usa ka kongregasyon sa mga Saksi ni Jehova ug nakigbahin sa publikong pagministeryo. Aron mahimong magmamantala, ang usa kinahanglang nakasabot ug nagtuo sa pangunang mga pagtulon-an sa Bibliya ug nagkinabuhi uyon sa mga prinsipyo sa Bibliya. Ang mga magmamantala walay suweldo sa ilang pagministeryo ug dili sila empleyado sa kongregasyon o sa bisan unsang korporasyon sa mga Saksi ni Jehova. Kini nga termino wala gamita ingong titulo sa pagpasidungog.

Memoryal sa kamatayon ni Jesus. Ang tinuig nga paghandom sa kamatayon ni Jesu-Kristo. Gitawag sab ni nga Panihapon sa Ginoo, Kataposang Panihapon, Memoryal, o Memoryal sa kamatayon ni Jesus. Para sa mga Saksi ni Jehova, kini ang labing importante nga okasyon sa tibuok tuig ug kini lang ang relihiyosong seremonyas nga gisugo ni Jesus nga saulogon sa iyang mga sumusunod.—Lucas 22:19, 20.

 Mga Saksi ni Jehova. Usa ka relihiyosong grupo sa mga Kristohanon nga nagsimba kang Jehova nga Diyos ug naggamit sa ilang panahon sa pagsuportar sa pagtudlog Bibliya sa lainlaing paagi. Ang katuyoan sa ilang pagtudlog Bibliya mao ang pagpaambit sa maayong balita bahin sa Gingharian, o gobyerno, sa Diyos. (Mateo 24:14) Ang ngalan sa relihiyon nakapalahi nila sa ubang relihiyon, dili lang kay nagtumong ni sa usa nga ilang girepresentahan kondili sa buluhaton sab nga ilang ginahimo para sa ngalan sa Diyos. Ang usa ka tawo mahimo lang usa ka Saksi ni Jehova kon duna siyay igong pagsabot sa pangunang mga pagtulon-an sa Bibliya, mokuwalipikar nga makigbahin sa publikong pagsangyaw kauban ang usa ka kongregasyon sa mga Saksi ni Jehova, ug mabawtismohan ingong simbolo sa iyang personal nga pagpahinungod ngadto kang Jehova nga Diyos. Dihang hisgotan sa unang higayon sa usa ka artikulo, kinahanglang gamiton ang opisyal ug kompletong ngalan nga “Mga Saksi ni Jehova.” Puwede sab nga gamiton “ang mga Saksi.” Dihang magtumong sa usa ka indibiduwal, gamita ang “usa ka Saksi” o “usa sa mga Saksi ni Jehova.”—Isaias 43:10.

midweek nga tigom. Usa ka tigom sa kongregasyon nga ginahimo kas-a sa usa ka semana sa gipili nga adlaw, gikan sa Lunes hangtod sa Biyernes, ug sagad ginahimo sa gabii. Kini nga tigom dunay tulo ka bahin ug gitawag nig Atong Kristohanong Kinabuhi ug Ministeryo. Gidisenyo ni aron tabangan ang mga Saksi nga mahimong mas epektibong mga ministro sa Diyos. Sama sa uban pang tigom sa mga Saksi ni Jehova, puwedeng makatambong in person o pinaagig videoconference. Kini walay bayad ug walay himoong pagpangolekta.

ministeryal nga alagad. Hamtong sa espirituwal nga lalaking Saksi nga gitudlo sa pagtabang sa mga ansiyano sa pag-atiman sa kongregasyon. Aron makaalagad ingong ministeryal nga alagad, kinahanglang padayon niyang makab-ot ang mga kuwalipikasyon nga gihisgotan sa Bibliya diha sa 1 Timoteo 3:8-10, 12, 13 ug Tito 2:6-8. Ang mga ministeryal nga alagad nag-atiman ug nagtabang sa importanteng mga buluhaton sa kongregasyon. Sila walay suweldo ug dili empleyado sa kongregasyon o sa bisan unsang korporasyon sa mga Saksi ni Jehova. Kadaghanang ministeryal nga alagad nagtrabaho aron masuportahan ang ilang kaugalingon ug ang ilang pamilya. Ang ubang ministeryal nga alagad, sa ulahi, mahimong mokuwalipikar nga mag-alagad ingong ansiyano. Kini nga termino wala gamita ingong titulo sa pagpasidungog.

misyonaryo. Usa ka bawtismadong Saksi nga giasayn sa Nagamandong Lawas sa mga Saksi ni Jehova ngadto sa lainlaing dapit sa tibuok kalibotan. Ang mga misyonaryo andam nga mobiya sa ilang balay ug lagmit mobalhin sa laing nasod aron motabang sa pagsangyaw sa maayong balita sa Gingharian.—Mateo 24:14.

Miting Publiko. Usa ka senemanang tigom sa kongregasyon nga ginahimo sa Sabado o Dominggo. Kini dunay 30 minutos nga pakigpulong nga gibase sa Bibliya ug giandam para sa publiko. Sagad, sundan ni sa Pagtuon sa Bantayanang Torre, nga usa ka oras nga pangutanag tubag nga panaghisgot sa usa ka topiko nga gibase sa Bibliya. Gamiton niini nga pagtuon ang usa ka artikulo sa tun-anang edisyon sa Ang Bantayanang Torre. Sama sa uban pang tigom sa mga Saksi ni Jehova, puwedeng makatambong in person o pinaagig videoconference. Kini walay bayad ug walay himoong pagpangolekta.

Nagamandong Lawas sa mga Saksi ni Jehova. Usa ka gamayng grupo sa mga ansiyano nga gitudlo sa pag-atiman sa espirituwal nga mga panginahanglan sa mga Saksi ni Jehova sa tibuok kalibotan. Sagad tawgon ning “Nagamandong Lawas.” Sila ang may pangunang responsibilidad sa pagpangandam sa binase sa Bibliya nga mga publikasyon. Bisag ang Nagamandong Lawas ang nanguna sa pagdumala sa mga kalihokan sa mga Saksi ni Jehova sa tibuok kalibotan, si Jesu-Kristo lang ang giisip nila ingong Lider sa mga Saksi ni Jehova. Ang mga opisina sa Nagamandong Lawas naa sa Hedkuwarter sa mga Saksi ni Jehova sa Warwick, New York, U.S.A.

 pag-alagad sa kanataran. Ang publikong ministeryo sa mga Saksi, ingong pagsunod sa sugo ni Jesus sa pagsangyaw sa “maayong balita sa Gingharian” ngadto sa mga tawo “sa tibuok yuta sa pagpamatuod ngadto sa tanang kanasoran.”—Mateo 24:14; 28:19.

Pagmata! Magasin nga gi-publish ug giapod-apod sa mga Saksi ni Jehova. Una ning gi-publish niadtong 1919 ingong The Golden Age, ug niadtong 1937, giilisan ug Consolation ang ulohan niini. Sugod sa isyu sa Agosto 22, 1946, gitawag na nig Awake! o Pagmata! Ang ulohan nga Pagmata! gipili aron ipasiugda ngadto sa mga magbabasa nga angay silang mahibalo sa kahulogan sa mga panghitabo sa kalibotan. Usa ni sa kinadaghanan nga naapod-apod nga mga magasin sa tibuok kalibotan.

pagsangyaw. Tan-awa:  pag-alagad sa kanataran.

payunir. Ang tawag sa bawtismadong Saksi nga naggahin ug espesipikong gidaghanon nga oras diha sa publikong pagministeryo. Kasagaran, nagtumong ni sa “regular payunir,” nga naggahin ug 600 ka oras kada tuig (50 ka oras kada bulan). Usahay, nagtumong ni sa “oksilyare payunir,” nga naggahin ug 15 o 30 ka oras sa usa ka bulan o sa pipila ka nagsunod nga bulan. Ang mga payunir walay suweldo sa ilang pagministeryo ug dili sila empleyado sa kongregasyon o sa bisan unsang korporasyon sa mga Saksi ni Jehova. Kadaghanang payunir nagtrabaho aron masuportahan ang ilang kaugalingon. Kini nga termino wala gamita ingong titulo sa pagpasidungog.

 rehiyonal nga kombensiyon. Tulo ka adlaw nga panagkatigom sa daghang kongregasyon sa usa ka espesipikong lugar ug ginahimo kas-a sa usa ka tuig. Kini giandam aron tabangan ang mga tawo nga mas masuod sa Diyos. Bukas ni sa publiko. Ang programa naglakip sa mga sugyot nga motabang sa mga nanambong nga makabenepisyo sa tambag sa Bibliya, bisan unsa man ang ilang edad. Kini dunay mga pasundayag bahin sa adlaw-adlawng mga kahimtang ug sa mga asoy sa Bibliya nga nagpakita kon unsaon pagpadapat sa mga prinsipyo sa Bibliya. Ang mga kombensiyon sagad ginahimo sa dagkong inabangan nga pasilidad, sama sa mga arena, estadyum, ug mga convention center. Ang ginagmayng rehiyonal nga kombensiyon puwede sab himoon diha sa duol nga Assembly Hall sa mga Saksi ni Jehova. Sagad, himoon ang mga sesyon in person sugod sa Biyernes hangtod sa Dominggo. Sa miaging mga tuig, dunay mga rekording sa programa nga mabatonan online. Sama sa uban pang tigom sa mga Saksi ni Jehova, walay bayad ang pagtambong niini ug walay himoong pagpangolekta.

sangang buhatan. Ang pasilidad nga gigamit sa Komite sa Sangang Buhatan sa pagsuportar ug pagdumala sa espirituwal nga mga kalihokan sa mga Saksi ni Jehova sa usa ka nasod o kapin pa. Usahay, tawgon ni ug “branch.”

sirkito. Usa ka grupo sa mga kongregasyon sa mga Saksi ni Jehova diha sa usa ka espesipikong lugar.

 sirkitong asembliya. Usa ka adlaw nga panagkatigom sa daghang kongregasyon sa mga Saksi ni Jehova nga himoon kaduha sa usa ka tuig. Ang mga sirkitong asembliya bukas sa publiko ug giandam aron tabangan ang mga tawo nga mas masuod sa Diyos. Ang programa naglakip sa mga sugyot nga motabang sa mga nanambong nga makabenepisyo sa tambag sa Bibliya, bisan unsa man ang ilang edad. Kini dunay mga pasundayag nga nagpakita kon unsaon pagpadapat sa mga gitudlo sa Bibliya diha sa adlaw-adlawng pagkinabuhi. Sagad ginahimo ni sa mga Assembly Hall sa mga Saksi ni Jehova. Puwede sab ning himoon diha sa inabangang pasilidad o tan-awon online. Kasagaran, ang mga sesyon ieskedyul sa Sabado o Dominggo. Ang tanang sesyon walay bayad ug walay himoong pagpangolekta.

sister. Usa ka bawtismadong babaye nga Saksi ni Jehova. Dako ang unang letra niini kon isumpay sa apelyido sa usa ka babayeng Saksi (pananglitan, Sister Smith). Wala ni gamita ingong titulo sa pagpasidungog. Ingon niini sab ang ginahimo sa usa ka lalaking Saksi (pananglitan, Brader Smith).

tigdumala sa sirkito. Usa ka eksperyensiyadong ansiyano nga nag-alagad ubos sa pagdumala sa sangang buhatan. Siya (kauban sa iyang asawa, kon minyo) regular nga nagaduaw sa matag kongregasyon sa usa ka sirkito, sagad kaduha sa usa ka tuig. Siya nagdasig sa mga igsoon sa matag kongregasyon. Naghatag sab siyag pagdasig ug direksiyon sa mga ansiyano ug ministeryal nga alagad. Ang mga tigdumala sa sirkito nag-andam ug espesipikong instruksiyon base sa panginahanglan sa matag kongregasyon. Kini nga termino wala gamita ingong titulo sa pagpasidungog.

MATIKDI: Dihang maghimog report bahin sa mga Saksi ni Jehova, palihog gamita ang kompletong ngalan sa unang higayon nga gamiton kini. Para sa dugang impormasyon, tan-awa:  Mga Saksi ni Jehova.