Deuteronomio 34:1-12
34 Unya si Moises mibiya sa desyertong kapatagan sa Moab ug mitungas sa Bukid sa Nebo,+ ngadto sa tumoy sa Pisga+ atbang sa Jerico.+ Ug gipakita kaniya ni Jehova ang tibuok yuta, gikan sa Gilead hangtod sa Dan,+
2 ang tibuok Neptali ug ang yuta sa Epraim ug Manases, ang tibuok yuta sa Juda hangtod sa dagat sa kasadpan,*+
3 ug ang Negeb+ ug ang Distrito,+ ang patag sa Jerico nga siyudad sa mga kahoyng palma, hangtod sa Zoar.+
4 Dayon giingnan siya ni Jehova: “Kini ang yuta nga akong gipanumpa kang Abraham, Isaac, ug Jacob dihang miingon ko, ‘Ihatag nako ni sa imong mga kaliwat.’*+ Gipakita nako ni kanimo, apan dili ka makatabok didto.”+
5 Human niana, si Moises nga alagad ni Jehova namatay sa Moab sumala sa giingon ni Jehova.+
6 Iyang gilubong siya sa walog sa yuta sa Moab nga atbang sa Bet-peor, ug walay nahibalo sa iyang lubnganan hangtod karon.+
7 Si Moises 120 anyos dihang namatay.+ Ang iyang mata wala mohalap, ug ang iyang kusog wala mawala.
8 Sulod sa 30 ka adlaw, si Moises gihilakan sa katawhan sa Israel didto sa desyertong kapatagan sa Moab.+ Unya natapos ang mga adlaw sa paghilak ug pagbangotan para kang Moises.
9 Si Josue nga anak ni Nun napunog kaalam* kay gipatong ni Moises ang iyang kamot diha kaniya;+ ug naminaw kaniya ang mga Israelinhon, ug gisunod gayod nila kon unsay gisugo ni Jehova kang Moises.+
10 Apan wala nay propeta sa Israel nga parehas ni Moises,+ nga suod kaayo kang Jehova.*+
11 Iyang gihimo ang tanang ilhanan ug milagro nga gisugo ni Jehova kaniya nga buhaton sa Ehipto, sa Paraon, sa tanan niyang alagad, ug sa tibuok niyang yuta.+
12 Gipakita sab ni Moises ang iyang gamhanang kamot ug dakong gahom atubangan sa tibuok Israel.+
Mga Footnote
^ Ang Dakong Dagat, ang Mediteranyo.
^ Literal, “binhi.”
^ O “kaalam gikan sa espiritu sa Diyos.”
^ Literal, “nga nailhan ni Jehova nawong sa nawong.”
