Pinadayag Ngadto Kang Juan 11:1-19
11 Ug gihatag kanako ang usa ka tangbo* nga samag baston*+ dihang giingnan ko niya: “Tindog ug sukda ang sangtuwaryo sa templo sa Diyos ug ang halaran ug ipha kadtong mga nagasimba diha niana.
2 Apan kon bahin sa hawanan nga anaa sa gawas sa sangtuwaryo sa templo, pasagdi kini ug ayaw kinig sukda, kay kini gihatag na ngadto sa kanasoran, ug ilang yatakyatakan ang balaang siyudad+ sulod sa 42 ka bulan.+
3 Ipahinabo nako nga ang akong duha ka saksi managna sulod sa 1,260 ka adlaw nga magsul-ob ug sakong panapton.”
4 Sila gisimbolohan sa duha ka kahoyng olibo+ ug sa duha ka tangkawan*+ ug nagbarog sa atubangan sa Ginoo sa yuta.+
5 Kon may gustong maghimog kadaot kanila, manggula ang kalayo gikan sa ilang mga baba ug molamoy sa ilang mga kaaway. Sa pagkatinuod, kon may gustong maghimog kadaot kanila, niining paagiha siya pagapatyon.
6 Sila dunay awtoridad sa pagtak-op sa langit+ aron dili moulan+ sulod sa mga adlaw sa ilang pagpanagna, ug sila dunay awtoridad ibabaw sa mga tubig sa paghimo niining dugo+ ug sa paghampak sa yuta pinaagi sa tanang matang sa hampak bisag kapila sumala sa ilang gusto.
7 Inigkahuman nilag pamatuod, ang pintas nga mananap nga mogula gikan sa kahiladman makiggubat kanila ug dag-on sila ug patyon sila.+
8 Ug ang ilang patayng lawas magbuy-od sa dako nga dalan sa dakong siyudad nga sa espirituwal nga diwa gitawag ug Sodoma ug Ehipto, diin usab gipatay sa estaka ang ilang Ginoo.
9 Ug ang mga tawo nga gikan sa lainlaing rasa ug tribo ug pinulongan ug kanasoran motan-aw sa ilang patayng lawas sulod sa tulo ka adlaw ug tunga,+ ug dili sila motugot nga ilubong ang ilang patayng lawas.
10 Ug kadtong namuyo sa yuta magsadya tungod kanila ug maglipaylipay, ug magpadala silag mga gasa sa usag usa, kay kining duha ka propeta nagsakit niadtong namuyo sa yuta.
11 Human sa tulo ka adlaw ug tunga, ang espiritu sa kinabuhi gikan sa Diyos misulod kanila,+ ug sila nanindog, ug kadtong nakakita kanila nangahadlok pag-ayo.
12 Ug nakadungog silag kusog nga tingog gikan sa langit nga miingon kanila: “Saka diri.” Ug misaka sila sa langit diha sa panganod, ug ang ilang mga kaaway nakakita kanila.*
13 Nianang orasa nahitabo ang dakong linog, ug ang ikanapulong bahin sa siyudad napukan; ug 7,000 ka tawo ang nangamatay sa linog, ug ang nahibilin nangalisang ug naghimaya sa Diyos sa langit.
14 Ang ikaduhang kaalaotan+ milabay na. Tan-awa! Ang ikatulong kaalaotan moabot sa madali.
15 Ang ikapitong anghel mihuyop sa iyang trompeta.+ Ug dihay kusog nga mga tingog sa langit, nga miingon: “Ang gingharian sa kalibotan nahimo nang Gingharian sa atong Ginoo+ ug sa iyang Kristo,+ ug siya magmando ingong hari hangtod sa kahangtoran.”+
16 Ug ang 24 ka ansiyano+ nga naglingkod sa ilang mga trono atubangan sa Diyos nanghapa ug misimba sa Diyos,
17 nga miingon: “Kami nagpasalamat kanimo, Jehova* nga Diyos, ang Labing Gamhanan, kinsa mao ang karon+ ug ang kaniadto, kay gigamit nimo ang imong dakong gahom ug misugod ka sa pagmando ingong hari.+
18 Apan ang kanasoran nangasuko, ug ikaw nasuko kanila, ug ang gitakdang panahon miabot na sa paghukom sa mga patay ug sa pagganti+ sa imong mga ulipon nga mga propeta+ ug sa mga balaan ug sa nangahadlok sa imong ngalan, mga gagmay ug dagko, ug sa paglaglag sa mga nagalaglag* sa yuta.”+
19 Ug ang sangtuwaryo sa templo sa Diyos nga didto sa langit nabuksan, ug ang kaban sa iyang pakigsaad nakita nako didto sa iyang sangtuwaryo sa templo.+ Ug dihay mga kilat ug mga tingog ug mga dalugdog ug linog ug dagkong ulan nga yelo.
Mga Footnote
^ O “baston nga pangsukod.”
^ Iningles, lampstand.
^ O “nagtan-aw.”
^ Tan-awa ang Apendise A5.
^ O “nagadaot.”
